ខេត្តកណ្តាល៖ មិនដឹងរឿងអីសោះ បុរសម្នាក់ស្ទុះឡើងទៅលើអេស្កាវ៉ាទ័រ កំពុងកាយដី ចាប់តៃកុង យកកណ្តៀវបម្រុងអារក ដែលករណីគំរាមកំហែងថានឹងសម្លាប់ ដែលហេតុការណ៍គួរឲ្យភ្ញាក់ផ្អើលនេះ កើតហេតុ នៅថ្ងៃ សុក្រ ០៤កើត ខែអាសាឍ ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី ៥ ខែកក្កដា ឆ្នាំ២០១៩ វេលាម៉ោង ១៧និង៣០នាទី នៅចំណុចចុងព្រែកឌុច ស្ថិតក្នុងភូមិព្រែកក្រាញ់ ឃុំព្រែកអំបិល ស្រុកស្អាង ខេត្តកណ្តាល ។
នគរបាលស្រុកស្អាង បានឲ្យដឹងថា ជនរងគ្រោះ៖ឈ្មោះ វុទ្ធី កុសល់ ភេទប្រុស អាយុ ១៧ឆ្នាំ ជនជាតិខ្មែរ មុខរបរកសិករ មានទីលំនៅភូមិកោះខែល ឃុំកោះខែល ស្រុកស្អាង ខេត្តកណ្តាល ។
ជនសង្ស័យ ឈ្មោះ ហាក់ វែង ភេទប្រុស អាយុ ៣៤ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកក្រាញ់ ឃុំព្រែកអំបិល ស្រុកស្អាង ខេត្តកណ្តាល (ឃាត់ខ្លួន) ។ ក្នុងពេលឃាត់ខ្លួន សមត្ថកិច្ចដកវត្ថុតាង កណ្តៀវដងឈើចំនួន១។
នគរបាលមូលដ្ឋាន បានរៀបរាប់ពីសភាពរឿងហេតុ៖ នៅថ្ងៃ ខែ ឆ្នាំ កើតហេតុខាងលើជនរងគ្រោះកំពុងតែបើកអេស្កាវ៉ាទ័រកាយដី ភ្លាមនោះស្រាប់តែជនសង្ស័យ មានកាន់កណ្តៀវនៅដៃ បានស្ទះឡើងលើអេស្កាវ៉ាទ័រ ហើយចាប់ជនរងគ្រោះអារក ប៉ុន្តែត្រូវបានជនរងគ្រោះរើបម្រាស់រួចខ្លួន ហើយក៏រត់ទៅរកឲ្យគេជួយ ។
ក្រោយពីទទួលព័ត៌មានភ្លាមនោះ កម្លាំងប៉ុស្តិ៍ព្រែកអំបិល បានចុះទៅកន្លែងកើតហេតុធ្វើការឃាត់ខ្លួនជនសង្ស័យ មកធ្វើការសាកសួរ និងចាត់ការតាមនីតិវិធី៕ ដោយ៖កូឡាប