ព្រះសីហនុ៖ ស្របពេលដែលអ្នកវិនិយោគចិនយ៉ាងច្រើន ឈានជើងចូលខេត្តព្រះសីហនុ ធ្វើឲ្យដីឡើងថ្លៃយ៉ាងគំហុគ ដោយក្រុនហ៊ុនចិន ទិញគ្រប់កន្លែងធ្វើអគារពាណិជ្ជកម្ម ក្នុងនោះក្រុមហ៊ុនចិនមួយ ក៏ជម្នះកសាងអគារដ៏ធំមួយ នៅម្តុំរង្វង់មូលតោពីរ តែរកមធ្យោបាយការពារ ដោយសង់រូបសំណាកដំរីចំនួន៥ ដើម្បីទប់ទល់មហិទ្ធិឫទ្ធិដ៏ខ្លាំងខ្លារបស់តោទាំងពីរ។
លោកពុយ គា អ្នកកាសែតជើងចាស់ និងជាមន្រ្តីជាន់ខ្ពស់ក្លឹបអ្នកកាសែត នៅថ្ងៃទី៦កក្កដានេះ បានសរសេរលើហ្វេសប៊ុកថា រាប់ទសវត្សរ៍មកហើយពុំមាននរណាម្នាក់ ហ៊ានសង់សំណង់ ឬបើកហាងលក់ដូរនៅលើដីច្រមុះជ្រូក ដ៏ធំមួយ នៅទល់មុខតោពីរ កណ្តាលក្រុងព្រះសីហនុឡើយ ព្រោះអ្នករកស៊ីមានជំនឿថា ជំនួញរបស់គេអាចនឹងត្រូវវិនាសឬខាតឡុងចុង ព្រោះរូបសំណាកតោពីរ សំឡឹងចំពីមុខ នឹងធ្វើឱ្យហុងស៊ុយធ្លាក់ ប៉ុន្តែដោយសារដីនៅក្រុងព្រះសីហនុ ឡើងថ្លៃហួសពីការស្មាន និងពិបាករកកន្លែងល្អៗ បានតទៅទៀត ក្រុមហ៊ុនចិនក៏ជម្នះកសាងអគារដ៏ធំមួយ តែរកមធ្យោបាយការពារ ដោយសង់រូបសំណាកដំរីចំនួន៥ ដើម្បីទប់ទល់មហិទ្ធិឫទ្ធិដ៏ខ្លាំងខ្លារបស់តោទាំងពីរ។ យោងតាមឯកសារសត្វ សត្វដំរីអាចសម្លាប់តោបាន ហើយដំរីមួយអាចទប់ទល់ជាមួយតោញីចំនួន៧ ឬតោឈ្មោលពីរទើបអាចសម្លាប់សត្វដំរីមួយបាន។
លោកពុយ គា បានថ្លែងថា មានរឿងដំណាលជាច្រើន ស្តីពីចៅហ្វាយខេត្តព្រះសីហនុ ដែលខ្លាចតោស៊ីឱ្យធ្លាក់ពីតំណែង។ នៅពេលមួយនោះ មានចៅហ្វាយខេត្តមួយរូប ដាច់ចិត្តអញ្ជើញគ្រូទាយ មកពីហុងកុង ដើម្បីរកវិធីទប់តំណែងគាត់។ គ្រូហុងស៊ុយនោះ បានឱ្យឳវាទថាត្រូវតែដាក់គ្រាប់ឃ្លី ចូលក្នុងមាត់តោ ដើម្បីកុំឱ្យខាំបាន។ កាលដើមឡើយ រូបសំណាកតោហាមាត់ ពុំមានគ្រាប់ឃ្លីនៅខាងក្នុងឡើយ។ យ៉ាងណាក៏ដោយ នេះគ្រាន់តែជាការអង្កេតមួយរបស់ខ្ញុំតែប៉ុណ្ណោះ រីឯជំនឿជារឿងរបស់បុគ្គល ព្រោះអ្នកមានគេមិនជឿលើជំនឿអរូបីណា ដែលគ្មានហេតុផលច្បាស់លាស់នោះទេ ឧទាហរណ៍៖ ក្នុងនោះក៏មានអ្នកសង់ផ្ទះចំផ្លូវដែលបុកចំពីមុខដែរ ហើយធ្វើឱ្យគេកាន់តែមានជាងមុន ....៕ ដោយ៖បញ្ញាស័ក្តិ