ភ្នំពេញ៖ក្រសួងសាធារណការ បានបញ្ជាក់ថា ប្រព័ន្ធលក់លេខចុះបញ្ជីពិសេសផ្ទាល់ខ្លួន ក្រៅពីផ្តល់លទ្ធភាពឲ្យទិញទុក ក៏នឹងអនុញ្ញាត ធ្វើការដេញថ្លៃតាមប្រព័ន្ធអនឡាញជាមួយបច្ចេកវិទ្យាស្វ័យប្រវត្តិកម្ម បដិវត្តន៍ឧស្សាហកម្មជំនាន់ទី 4.0។
ថ្ងៃសុក្រ ៤កើត ខែអាសាធ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៥ ខែកក្កដា ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន លោកស្រី កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួង ដើម្បីគ្រប់គ្រងការលក់លេខចុះបញ្ជីរថយន្តគ្រួសារ និងរថយន្តធុនស្រាល បានដឹកនាំ កិច្ចប្រជុំពិភាក្សា អំពីការរៀបចំលិខិតបទដ្ឋានគតិយុត្តនានា ដែលពាក់ព័ន្ធនឹងអនុក្រឹត្យ ស្តីពីការចុះបញ្ជីផ្តល់ប័ណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ និងវឌ្ឍនភាព នៃការលក់លេខចុះបញ្ជីយានយន្តរបស់គណៈកម្មការអន្តរក្រសួង។
លោកស្រី បានថ្លែងថា កិច្ចប្រជុំនេះ បានផ្ដោតសំខាន់លើរបៀបវារៈចំនួនពីរ រួមមាន៖ ១. ពិភាក្សាបញ្ចប់លើសេចក្ដីព្រាងប្រកាសអន្តរក្រសួង ស្តីពីការលក់លេខចុះបញ្ជីរថយន្តគ្រួសារ និងរថយន្តធុនស្រាល ។ ២. ផ្ដល់យោបល់លើការរៀបចំប្រព័ន្ធលក់លេខពិសេសផ្ទាល់ខ្លួន
សម្រាប់ប្រព័ន្ធលក់លេខចុះបញ្ជីពិសេសផ្ទាល់ខ្លួន ក្រៅពីការទិញលេខ និងស្នើសុំទិញលេខតាមប្រព័ន្ធអនឡាញ ក្រសួងក៏រៀបចំឲ្យមានជាការដេញថ្លៃអនឡាញ ជាមួយបច្ចេកវិទ្យាស្វ័យប្រវត្តិកម្ម បដិវត្តន៍ឧស្សាហកម្មជំនាន់ទី 4.0 ផ្តល់លទ្ធភាពឲ្យអ្នកដេញថ្លៃអាចដេញថ្លៃពីគ្រប់ទីកន្លែង និងគ្រប់ពេលវេលាដោយគ្រាន់តែមានគណនីជាមួយគ្រឹះស្ថានហិរញ្ញវត្ថុដៃគូជាការស្រេច។
លោកស្រីប្រធានអង្គប្រជុំ បានលើកឡើងថា ចំពោះជំហានបន្ទាប់ គណៈកម្មការនឹងធ្វើទស្សនកិច្ចនៅប្រទេសសិង្ហបុរី ដើម្បីសិក្សាស្វែងរកធាតុចូលបន្ថែមទៀត ទៅលើការរៀបចំលិខិតបទដ្ឋាន បែបបទ និងនីតិវិធីនៃការដេញថ្លៃ ដើម្បីត្រៀមខ្លួន ក្នុងការអនុវត្តការលក់លេខចុះបញ្ជីពិសេសផ្ទាល់ខ្លួននាពេលឆាប់ៗខាងមុខនេះ៕ ដោយ៖កូឡាប
