កែប៖ រាត្រីឆ្លងឆ្នាំសកលខេត្តកែប កើតមានឧប្បត្តិហេតុឆេះកាំជ្រួច បណ្តាលឲ្យរបួស ៨នាក់នៅវេលាម៉ោងប្រមាណ ១១យប់ថ្ងៃទី៣១ ខែធ្នូ ឆ្នាំ២០១៧ នៅចំណុចឆ្នេរកែប(ឆ្នេរចាស់) ដែលអាជ្ញាធរត្រៀមបាញ់អបអរសាទរពេលឆ្លងឆ្នាំ បណ្តាលឲ្យរបួស។
របាយការណ៍បានបញ្ជាក់ថា ក្រោយឆេះនោះ កម្លាំងសមត្ថកិច្ច និងអាជ្ញាធរបានចេញអន្តរាគមន៍ភ្លាមៗ និងបាញ់ទឹកពន្លត់ទៅវិញភ្លាមៗផងដែរ។ ដោយឡែកជនរងគ្រោះត្រូវបានបញ្ជូនទៅលាងរបួសនៅមន្ទីរពេទ្យ ហើយក៏បានអនុញ្ញាតឲ្យត្រឡប់ទៅផ្ទះវិញក្រោយលាងរបួសផងដែរ។
លោក អ៊ឹង សំអុល ស្នងការនគរបាលខេត្តកែបបានថ្លែងថា នៅយប់ថ្ងៃកើតហេតុ អាជ្ញាធរខេត្តកែប បានរៀបចំពិធីឆ្លងឆ្នាំ២០១៧ ឈានចូលឆ្នាំថ្មី២០១៨ នៅឆ្នេរកែប ពីចំណុចផ្សារក្ដាម ដល់ឆ្នេរថ្មី ដោយមានប្រជាពលរដ្ឋមកពីគ្រប់ទិសទីប្រមាណជាង១០ម៉ឺននាក់ ចូលរួមអបអរ និងកម្សាន្តសប្បាយក្នុងកម្មវិធីផ្សេងៗ។
លោកបន្តថា កម្មវិធីបានដំណើរការរលូន ដោយមានការរៀបចំសណ្ដាប់ធ្នាប់ និងការរក្សាសន្តិសុខពីសំណាក់កងកម្លាំងនៅក្នុងខេត្ត។ ទោះបីជាមានការរៀបចំឲ្យល្អហើយយ៉ាងណាក្ដី ប៉ុន្តែឧប្បត្តិហេតុចៃដន្យបានកើតឡើង នៅវេលាម៉ោងប្រមាណ១១យប់ ដោយមានករណីឆេះកាំជ្រួច ដែលអាជ្ញាធរគ្រោងបាញ់អបអរសាទរឆ្នាំថ្មី នៅឆ្នេរកែប បណ្ដាលឲ្យមនុស្ស៨នាក់ រងរបួសរលាកស្រាលៗ ហើយ ត្រូវបានបញ្ជូនទៅលាងរបួសនៅមន្ទីរពេទ្យខេត្តកែប ហើយចាកចេញទៅផ្ទះវិញអស់ហើយ។ ករណីនេះ អាជ្ញាធរបានប្រើឡានទឹក៤គ្រឿង ដើម្បីអន្តរាគមន៍ពន្លត់ភ្លើងដែលឆេះ ដោយប្រើប្រាស់ទឹកអស់១០ឡាន។
មិនខុសពីបណ្តាខេត្តគោលដៅទេសចរណ៍ដូចជាសៀមរាប និងព្រះសីហនុនោះឡើយ នៅក្នុងខេត្តកែប ដែលជាខេត្តទេសចរណ៍តំបន់ឆ្នេរនៅរាត្រីឆ្លងឆ្នាំសកល ទទួលបានការអញ្ជើញចូលរួមលេងកម្សាន្ត និងរង់ចាំឆ្លងឆ្នាំពីអ្នកទេសចរជាតិ និងអន្តរជាតិយ៉ាងច្រើនកុះករ។ របាយការណ៍ពីសាលាខេត្តកែប បានឲ្យដឹងថា អ្នកទេសចរដែលទៅរង់ចាំឆ្លងឆ្នាំនៅក្នុងខេត្តកែបនាយប់មិញនេះ មានរហូតដល់ទៅជាង ១០ម៉ឺននាក់៕ ដោយ៖បញ្ញាស័ក្តិ
