កំពង់ឆ្នាំង ៖ ជនសង្ស័យម្នាក់ក្នុងករណីប្លន់ម៉ូតូឌុប នៅឃុំតាំងក្រសាំង ស្រុកទឹកផុស កាលពីថ្ងៃទី៤ ខែកក្កដា ឆ្នាំ២០១៩ ត្រូងសមត្ថកិច្ចចាប់ខ្លួនបានហើយ។
ជនសង្ស័យដែលត្រូវសមត្ថកិច្ចចាប់ខ្លួនពីបទប្លន់នេះឈ្មោះមុំ សុខន ភេទប្រុស មានទីលំនៅក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ។ ជននេះត្រូវសមត្ថកិច្ចនគរបាលខេត្តកំពង់ឆ្នាំង ចាប់ខ្លួន កាលពីថ្ងៃទី៥ ខែកក្កដា ឆ្នាំ២០១៩ និង ដកហូតបានវត្ថុតាង គឺម៉ូតូរបស់ជនរងគ្រោះផងដែរ ។
គួរំលឹកថា បុរសអ្នករត់ម៉ូតូឌុបម្នាក់ត្រូវបាន ជនសង្ស័យយកកាំបិតចាក់ប្លន់យកម៉ូតូមួយគ្រឿងទៅបាត់ដោយសុវត្តិភាព ។
ជនសង្ស័យល្បួជនរងគ្រោះអោយឌុបចេញពីកំពង់ផែកាណូតដរ ដល់កន្លែងស្ងាត់ ក៏ធ្វើសកម្មភាពចាក់ប្លន់តែម្តង ។
ហេតុការណ៍ចាក់ប្លន់យកម៉ូតូនេះ បានកើតឡើងកាលពីវេលាម៉ោងជាង១០ថ្ងៃទី៤ ខែកក្កដា ឆ្នាំ២០១៩ នៅត្រង់ចំណុចព្រៃរណ្ដៅថ្ម ក្នុងភូមិក្រាំងតាមុំ ឃុំតាំងក្រសាំង ស្រុកទឹកផុស ខេត្តកំពង់ឆ្នាំង ។
សមត្ថកិច្ចបានអោយដឹងថា ជនរងគ្រោះមានឈ្មោះ ម៉ាត់ សូហ្វីយ៉ា ភេទប្រុស អាយុ៦០ឆ្នាំ អតីតជាគ្រូបង្រៀន ចូលនិវត្តន៍ ។ ជនរងគ្រោះជិះម៉ូតូម៉ាកហុងដាសេ១២៥ ឆ្នាំ២០១១ បិទតែម ឆ្នាំ២០១៣ ពាក់ស្លាកលេខបាត់ដំបង១K-៦០ ៤៣ ។
សមត្ថកិច្ចបានអោយដឹងទៀតថា នៅមុនពេលកើតហេតុ ជនរងគ្រោះបានទៅរត់ម៉ូតូឌុបនៅម្តុំកំពង់ផែកាណូតដរ នៅវេលាម៉ោងប្រមាណជាង៩ ជនសង្ស័យបានហៅម៉ូតូរបស់ជនរងគ្រោះជិះ ដោយប្រាប់ថា ទៅចំការអំពៅ ស្ថិតនៅឃុំតាំងក្រសាំង ស្រុកទឹកផុស ដោយគេប្រាប់ថាទៅធ្វើការនៅទីនោះ ។
ហើយបានចចារគ្នាត្រូវក្នុងតម្លៃ២ម៉ឺនរៀល ។ ពេលដឹកទៅដល់ចំណុចព្រៃរណ្ដៅថ្ម ដែលជាកន្លែងស្ងាត់ ជនសង្ស័យបានប្រាប់អោយឈប់ រួចបានចាប់ទាញសក់ក្បាលជនរងគ្រោះបំរ៉ុងអាករ តែពេលនោះជនរងគ្រោះដឹងក៏រើបំរាស់ ហើយក៍ត្រូវជនសង្ស័យចាក់ត្រូវដៃ និង ភ្នែក រងបួសធ្ងន់ រត់អោយគេជួយ ។
ក្នុងពេលនោះជនសង្ស័យបានជិះម៉ូតូរបស់ជនរងគ្រោះគេខ្លួនបាត់ដោយសុវត្តិភាព ។ ភ្លាមៗនោះជនរងគ្រោះត្រូវបានសមត្ថកិច្ចដឹកយកមកសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង ៕ ដោយ៖កូឡាប