អាជ្ញាធរកូរ៉េខាងត្បូង បានចាប់បានកប៉ាល់ទី ២ដែលត្រូវគេសង្ស័យថាបានផ្គត់ផ្គងប្រេងឲ្យប្រទេស កូរ៉េខាងជើង ដែលល្មើសទៅនឹងទណ្ឌកម្មរបស់អង្គការសហប្រជាជាតិ។
កប៉ាល់ដឹកប្រេងដែលមានដោតទង់ជាតិប្រទេសប៉ាណាម៉ា មានឈ្មោះ Koti ហើយវាត្រូវបានចាប់ដោយកូរ៉េខាងត្បូង នៅកំពង់ផែ ក្បែរទីក្រុង Pyeongtaek។
កាលពីពេលថ្មីៗនេះ អាជ្ញាធរកូរ៉េខាងត្បូងបានចាប់កប៉ាល់មួយគ្រឿងរបស់ហុងកុង ដែលត្រូវគេសង្ស័យថា បានផ្ទេរប្រេងចំរាញ់ដោយសម្ងាត់ចំនួន ៦០០តោន ទៅឲ្យកប៉ាល់របស់កូរ៉េខាងជើង។ ការលួយផ្គត់ផ្គងប្រេងទៅដល់របបព្យុងយ៉ាងគឺល្មើសទៅនឹងទណ្ឌកម្មរបស់អង្គការសហប្រជាជាតិ។
ចំនែកកប៉ាល់ទី ២ ដែលត្រូវចាប់ទុក មានបុគ្គលិកភាគច្រើនជាជនជាតិចិន និងមីយ៉ានម៉ា ហើយអាចផ្ទុកប្រេងបានរហូតដល់ ៥.១០០តោន។ នេះបើតាមការចេញផ្សាយរបស់ការសែតកូរ៉េខាងត្បូងឈ្មោះ Yonhap។
កាលពីសប្តាហ៏មុន ប្រធានាធិបតីអាមេរិច ដូណាល់ ត្រាំ បានចោទប្រកាន់ប្រទេសចិនថាអនុញ្ញាតិឲ្យមានការដឹកជញ្ជូនប្រេងខុសច្បាប់ទៅឲ្យកូរ៉េខាងជើង។
នៅក្នុងបណ្តាញទំនាក់ទំនងសង្គមថ្មីតធឺ លោកត្រាំ បាននិយាយថា ប្រទេសចិនត្រូវបានគេចាប់បានប្រព្រឹត្តខុសច្បាប់។
ប៉ុន្តែការចោទប្រកាន់របស់ត្រាំ ត្រូវបានប្រទេសចិនបដិសេធ។ ចិនកាលពីដើមខែធ្នូ បានគាំទ្រនូវសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដើម្បីដាក់ទណ្ឌកម្មបន្ថែលើរបបព្យុងយ៉ាង ដោយក្នុងនោះរួមមានវិធានការកាត់បន្ថយការផ្គត់ផ្គងប្រេងទៅកូរ៉េខាងជើងឲ្យបាន ៩០ភាគរយ។ សុភ័ក្ត្រ