មេដឹកនាំហុងកុងគឺអ្នកស្រី Carrie Lam បានប្រកាសថា ច្បាប់ធ្វើបត្យាប័នដ៏ចម្រូងចម្រាស់ ដែលអនុញ្ញាតឲ្យមានការបញ្ជូនជនសង្ស័យទៅកាត់ទោសនៅប្រទេសចិន “បានស្លាប់បាត់ហើយ”។
នៅក្នុងសន្និសិទថ្ងៃអង្គារនេះ អ្នកស្រីបានថ្លែងថា កិច្ចប្រឹងប្រែងរបស់រដ្ឋាភិបាលក្នុងការធ្វើច្បាប់ធ្វើបត្យាប័ន បានបរាជ័យ។
ទោះយ៉ាងណា អ្នកស្រីមិនបានបញ្ជាក់ថា ច្បាប់នោះត្រូវដកចេញទាំងស្រុង ឬយ៉ាងណាទេ ខណៈពេលដែលអ្នកគាំទ្រ ទាមទារឲ្យរដ្ឋាភិបាលបោះបង់ចោលវា។
សូមបញ្ជាក់ថា សេចក្តីព្រាងច្បាប់ធ្វើបត្យាប័ន បានធ្វើឲ្យមានការផ្ទុះការតវ៉ាអស់ជាច្រើនសប្តាហ៍មកហើយ នៅក្នុងទីក្រុងហុងកុង ហើយដោយសារតែមានការគាំទ្រដ៏ខ្លាំងក្លា ពីប្រជាជនហុងកុង រដ្ឋាភិបាលបានសម្រេចចិត្តព្យូរច្បាប់នោះ។
អ្នករិះគន់ បានថ្លែងថា ច្បាប់នោះអាចនឹងធ្វើឲ្យប៉ះពាល់ ដល់ប្រព័ន្ធតុលាការឯករាជ្យ របស់ហុងកុង ហើយវានឹងអាចត្រូវគេប្រើប្រាស់ ដើម្បីចាត់ការអ្នកដែលរិះគន់រដ្ឋាភិបាលចិន នៅប៉េកាំង។
ទីក្រុងហុងកុង ត្រូវបានអង់គ្លេស ប្រគល់ទៅឲ្យចិនវិញនៅក្នុងឆ្នាំ ១៩៩៧ ដោយស្ថិតក្រោមរូបមន្តប្រទេសមួយ ប្រព័ន្ធគ្រប់គ្រងពីរ ដែលផ្តល់សេរីភាពដល់ទីក្រុងហុងកុង រួមមាន សិទ្ធិសេរីភាពក្នុងការតវ៉ា និងប្រព័ន្ធតុលាការឯករាជ្យ៕ អត្ថបទប្រែសម្រួលដោយ៖ សុភ័ក្រ . ប្រភព៖ BBC
