មនុស្សយ៉ាងហោចណាស់ចំនួន ២៩នាក់បានស្លាប់ ក្រោយពេលរថយន្តក្រុងដែលពួកគេធ្វើដំណើរ បានបើកធ្លាក់ផ្លូវ រួចបោះពួយចូលក្នុងប្រឡាយទឹក នៅក្នុងរដ្ឋ Uttar Pradesh ប្រទេសឥណ្ឌា។
ហេតុការណ៍ដ៏រន្ធត់នោះ បានកើតឡើងកាលពីថ្ងៃចន្ទម្សិលមិញនេះ នៅក្នុងទីក្រុង Agra។ រថយន្តក្រុងនោះ ដឹកអ្នកដំណើរចំនួន ៥០នាក់ និងបានធ្វើដំណើរពីទីក្រុង Lucknow ទៅកាន់រដ្ឋធានី Delhi។
បើតាមសេចក្តីរាយការណ៍ បានឲ្យដឹងថា អ្នកបើកបរបានដេកលក់មួយភាំង ទើបធ្វើឲ្យគាត់មិនអាចគ្រប់គ្រងរថយន្តបាន ក៏បណ្តាលឲ្យវារត់ធ្លាក់ចេញពីផ្លូវហាយវេ Yamuna និងបានបោះពួយចូលក្នុងប្រឡាយនៅខាងក្រោម។
គ្រោះថ្នាក់ចរាចរកើតមានយ៉ាងញឹកញាប់នៅក្នុងប្រទេសឥណ្ឌា។ នៅក្នុងប្រទេសឥណ្ឌាទាំងមូល មានថ្នាក់ចរាចរកើតឡើង ក្នុងរាល់ពេល ៤នាទីម្តង។ គ្រោះថ្នាក់តែងកើតឡើងដោយសារតែបញ្ហារថយន្ត ការបើកបរមិនត្រឹមត្រូវ និងបញ្ហាផ្លូវជាដើម។
មនុស្សចំនួន ៩០០នាក់ហើយ បានស្លាប់នៅលើផ្លូវហាយវេ Yamuna ដែលមានប្រវែង ១៦៥គីឡូម៉ែត្រ ចាប់តាំងពីវាបានដំណើរការឡើងមកកាលពីឆ្នាំ ២០១២៕ អត្ថបទប្រែសម្រួលដោយ៖ សុភ័ក្រ។ ប្រភព៖ BBC
