ជនជាតិកូរ៉េខាងត្បូងម្នាក់ឈ្មោះ Choe In-guk ត្រូវបានគេរាយការណ៍ថា បានរើទៅរស់នៅក្នុងប្រទេសកូរ៉េខាងជើង ដែលនេះគឺជាករណីកម្រខ្លាំង ព្រោះកម្រមាននរណាម្នាក់ស្វែងរកការរស់នៅក្នុងប្រទេសផ្តាច់ការកូរ៉េខាងជើងណាស់។
លោក Choe In-guk គឺជាកូនប្រុសរបស់អតីតរដ្ឋមន្រ្តីការបរទេសកូរ៉េខាងត្បូង ដែលបានផ្តាច់ខ្លួន ទៅកូរ៉េខាងជើង ជាមួយប្រពន្ធរបស់គាត់ ក្នុងឆ្នាំ ១៩៨៦។
បើតាមប្រព័ន្ធផ្សព្វផ្សាយរបស់កូរ៉េខាងជើង បានឲ្យដឹងថា លោកនឹងរស់នៅក្នុងប្រទេសកូរ៉េខាងជើង និងធ្វើកិច្ចការលើបញ្ហារួបរួមគ្នា។
ការផ្តាច់ខ្លួនបែបនេះគឺជារឿងកម្រណាស់ ដោយសារតែមានប្រជាជនកូរ៉េខាងជើងជាច្រើន ចង់រត់ផ្តាច់ខ្លួន កមកាន់កូរ៉េខាងត្បូង។
ប្រទេសបងប្អូនទាំងពីរ នៅតែស្ថិតក្នុងកាលៈទេសៈសង្គ្រាមដដែល ហើយប្រសិនជាចង់ទៅលេងនៅកូរ៉េខាងជើង ប្រទេសកូរ៉េខាងត្បូង ត្រូវមានការអនុញ្ញាតជាមុន។
ក្រសួងបង្រួបបង្រួមជាតិកូរ៉េខាងត្បូង បានបញ្ជាក់ថា លោក Choe In-guk មិនបានស្នើសុំការអនុញ្ញាត សម្រាប់ការធ្វើដំណើរទៅកាន់កូរ៉េខាងជើងឡើយ។
ប្រសិនជាលោក Choe In-guk បានល្មើសទៅនឹងច្បាប់កូរ៉េខាងត្បូង ដោយមិនបានសុំការអនុញ្ញាតពីរដ្ឋាភិបាល ដើម្បីធ្វើដំណើរទៅកូរ៉េខាងជើង លោកអាចនឹងត្រូវចាប់ខ្លួន ប្រសិនជាគាត់ត្រឡប់មកកាន់កូរ៉េខាងត្បូងវិញ។ នេះបើតាមការបញ្ជាក់របស់អ្នកជំនាញនៅសារព័ត៌មាន NK News ដែលមានមូលដ្ឋាននៅទីក្រុងសេអ៊ូល។
តើលោក Choe In-guk ជានរណា?
Choe In-guk គឺជាពលរដ្ឋកូរ៉េខាងត្បូងដែលមានវ័យ ៧៣ឆ្នាំ ប៉ុន្តែគេបានដឹងតិចតួចណាស់អំពីជីវិតផ្ទាល់ខ្លួន និងទស្សនៈនយោបាយរបស់លោក។ គាត់មានប្រពន្ធ និងកូនស្រីម្នាក់ នៅក្នុងប្រទេសកូរ៉េខាងត្បូង។
ឪពុកម្តាប់របស់គាត់ គឺជាពលរដ្ឋកូរ៉េខាងត្បូងជាន់ខ្ពស់ ដែលបានផ្តាច់ខ្លួនទៅកាន់កូរ៉េខាងជើង ចាប់តាំងពីចប់សង្រ្គាមនៅកូរ៉េ៕ អត្ថបទប្រែសម្រួលដោយ៖ សុភ័ក្រ។ ប្រភព៖ BBC