ភ្នំពេញ ៖ នគរបាលជាតិនៃព្រះរាជាណាចក្រកម្ពុជា និងប្រធានសន្តិសុខប្រចាំតំបន់ របស់ស្ថានទូតអាមេរិកនៅកម្ពុជា នៅថ្ងៃទី៩កក្កដានេះ បានចុះហត្ថលេខាលើអនុស្សរណៈនៃការយោគយល់គ្នា ក្នុងបរិវេណអគ្គស្នងការដ្ឋាននគរបាលជាតិ ។
អនុស្សរណៈដើម្បីការពង្រឹងកិច្ចការពារសន្តិសុខស្ថានទូតអាមេរិកក្នុងរាជធានីភ្នំពេញ ត្រូវបានចុះហត្ថលេខាដោយលោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ជាមួយនឹងប្រធានសន្តិសុខប្រចាំតំបន់ របស់ស្ថានទូតអាមេរិក លោក Timithy Pittman ដោយមានការអញ្ជើញចូលរួមពីមន្ត្រីជាន់ខ្ពស់ នៃអគ្គស្នងការដ្ឋាននគរបាលជាតិ និងមន្ត្រីនានារបស់ស្ថានបេសកកម្មការទូតសហរដ្ឋអាមេរិកប្រចាំកម្ពុជា ។
លោកនាយឧត្តមសេនីយ៍ សន្តិបណ្ឌិត នេត សាវឿន បានមានប្រសាសន៍ អំពីកិច្ចសហប្រតិបត្តិការល្អរវាងនគរបាលជាតិកម្ពុជា និងស្ថានបេសកកម្មការទូតសហរដ្ឋអាមេរិកប្រចាំកម្ពុជា ទាំងមុននិងក្រោយការចុះអនុស្សរណៈកន្លងមក ។
លោក នាយឧត្តមសេនីយ៍ អគ្គស្នងការនគរបាលជាតិ បានថ្លែងជម្រុញរកកិច្ចសហប្រតិបត្តិការល្អរវាងគ្នានេះ ជាបន្តថែមទៀត ជាពិសេសការផ្តល់ព័ត៌មានរវាងគ្នាតាមរយៈ Hotline ពាក់ព័ន្ធរាល់ចំណុចសង្ស័យនានា ឬព័ត៌មានផ្សេងៗដែលបម្រើផលប្រយោជន៍នៃកិច្ចការពារសន្តិសុខ ៕ ដោយ៖បញ្ញាស័ក្តិ
