ក្រុមអ្នកតវ៉ាដ៏សំខាន់ដែលនៅពីក្រោយការតវ៉ាដ៏ធំមិនធ្លាប់មាន ប្រឆាំងនឹងច្បាប់ធ្វើបត្យាប័ន នៅថ្ងៃអង្គារម្សិលមិញនេះ បានប្តេជ្ញាថា នឹងធ្វើការតវ៉ាជាថ្មីទៀត ខណៈដែលពួកគេបានមិនទទួលយកការប្រកាសរបស់មេដឹកនាំហុងកុង គឺអ្នកស្រី Carrie Lam ដែលបានថ្លែងថា ច្បាប់ធ្វើបត្យាប័នបានស្លាប់បាត់ទៅហើយ។
“ប្រសិនជាការទាមទារចំនួន ៥ចំណុចរបស់ពួកយើងមិនមានការឆ្លើយតបពីអ្នកស្រី Carrie Lam និងរដ្ឋាភិបាលរបស់អ្នកស្រី វេទិកាសិទ្ធិមនុស្សស៊ីវិល នឹងបន្តធ្វើការបាតុកម្ម និងការប្រមូលផ្តុំគ្នាទៀត”។ នេះបើតាមការបញ្ជាក់របស់អ្នកនាំពាក្យរបស់វេទិកាខាងលើ ប្រាប់អ្នកសារព័ត៌មាន។
សូមរំលឹកថា មេដឹកនាំហុងកុង ដែលគាំទ្រដោយរបបក្រុងប៉េកាំង បានប្រកាសនៅថ្ងៃអង្គារថា ច្បាប់ធ្វើបត្យាប័នដ៏ចម្រូងចម្រាស់ បានស្លាប់បាត់ទៅហើយ។ ប្រសិនច្បាប់នោះដំណើរការ វានឹងធ្វើឲ្យមានការអនុញ្ញាតបញ្ជូនជនសង្ស័យពីទីក្រុងហុងកុង ទៅកាត់ទោសនៅប្រទេសចិន។
អ្នករិះគន់ បានថ្លែងថា ច្បាប់នោះអាចនឹងធ្វើឲ្យប៉ះពាល់ដល់ប្រព័ន្ធតុលាការឯករាជ្យរបស់ហុងកុង ហើយវានឹងអាចត្រូវគេប្រើប្រាស់ ដើម្បីចាត់ការអ្នកដែលរិះគន់រដ្ឋាភិបាលចិន នៅប៉េកាំង។
ទីក្រុងហុងកុងត្រូវបានអង់គ្លេស ប្រគល់ទៅឲ្យចិនវិញនៅក្នុងឆ្នាំ ១៩៩៧ ដោយស្ថិតក្រោមរូបមន្តប្រទេសមួយ ប្រព័ន្ធគ្រប់គ្រងពីរ ដែលផ្តល់សេរីភាពដល់ទីក្រុងហុងកុង រួមមានសិទ្ធិសេរីភាពក្នុងការតវ៉ា និងប្រព័ន្ធតុលាការឯករាជ្យ៕ អត្ថបទប្រែសម្រួលដោយ៖ សុភ័ក្រ។ ប្រភព៖ Channelnewsasia