ឧត្តរមានជ័យ៖ នៅព្រឹកថ្ងៃទី១០ ខែកក្កដា ឆ្នាំ២០១៩ ស្នងការដ្ឋាននគរបាលខេត្តឧត្តរមានជ័យ បានបើកកិច្ចប្រជុំផ្សព្វផ្សាយសេចក្តីណែនាំលេខ០១៩សណន ចុះថ្ងៃទី៥ ខែកក្កដា ឆ្នាំ២០១៩របស់ក្រសួងមហាផ្ទៃ ស្តីពីការគ្រប់គ្រងប្រើប្រាស់ក្របខ័ណ្ឌមន្ត្រីនគរបាលជាតិ ការគ្រប់គ្រងប្រើប្រាស់អាវុធជាតិផ្ទុះ និង មធ្យោបាយជូនដល់កងកម្លាំងនគរបាលទាំងអស់ឲ្យបានជ្រួតជ្រាបនិងត្រូវអនុវត្តអោយបានខ្ជាប់ខ្ចួន និងផែនការសកម្មភាពលេខ ០៣៤ ផក ចុះថ្ងៃទី០៥ ខែកក្កដា ឆ្នាំ២០១៩ របស់អគ្គស្នងការដ្ឋាននគរបាលជាតិ ស្តីពីវិធានការកាត់បន្ថយអត្រាគ្រោះថ្នាក់ដោយសំណល់ជាតិផ្ទុះពីសង្គ្រោមរបស់កងកម្លាំងនគរបាលជាតិ ។
ពិធីប្រជុំផ្សព្វផ្សាយនេះប្រព្រឹត្តទៅក្រោមអធិបតីភាព លោកឧត្តមសេនីយ៍ទោ ម៉ែន លី ស្នងការនគរបាលខេត្តឧត្តរមានជ័យ ដោយការមានការចូលរួមពីលោកស្នងការរង ,លោកនាយ- នាយរងការិយាល័យជំនាញ លោកអធិការក្រុង-ស្រុកទាំង០៥ មេបញ្ជាការវរសេនាតូចទាំង២ លោកនាយប៉ុស្តិ៍នគរបាលរដ្ឋបាលទាំង២៤ ។
ដើម្បីរក្សាបាននូវសេចក្តីថ្លៃថ្នូរ កិត្តិយស គុណធម៌ សីលធម៌ វិជ្ជាជីវៈ និងឆន្ទៈមោះមុតបម្រើការងារសំដៅលើកកម្ពស់ក្នុងការអនុវត្តតួនាទី ភារកិច្ចឲ្យបានកាន់តែមានប្រសិទ្ធភាព ក្នុងការថែរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម បម្រើផលប្រយោជន៍ប្រទេសជាតិ និងប្រជាពលរដ្ឋ ក្រសួងមហាផ្ទៃ បានដាក់ចេញនូវគោលការណ៍ ការគ្រប់គ្រងប្រើប្រាស់ក្របខ័ណ្ឌមន្ត្រីនគរបាលជាតិ ការគ្រប់គ្រងប្រើប្រាស់អាវុធជាតិផ្ទុះនិងមធ្យោបាយ ចំនួន១០ចំណុចជូនដល់ អគ្គស្នងការដ្ឋាននគរបាលជាតិ អគ្គនាយកដ្ឋាននានា និងស្នងការដ្ឋាននគរបាលរាជធានី-ខេត្ត ត្រូវធ្វើការផ្សព្វផ្សាយជូនដល់មន្ត្រីនគរបាលក្រោមឱវាទបានជ្រួតជ្រាប យកទៅអនុវត្តឲ្យបានម៉ឺងម៉ាត់ និងខ្ជាប់ខ្ជួន ។ បន្ទាប់ពីទទួលបានសេចក្តីណែនាំលេខ០១៩ របស់ក្រសួងមហាផ្ទៃ ដើម្បីចូលរួមស្តាប់ការផ្សព្វផ្សាយសេចក្តីណែនាំនេះ ។
ក្រោយពីធ្វើការផ្សព្វផ្សាយ លោកឧត្តមសេនីយ៍ទោ ម៉ែន លី ក៏បានធ្វើការផ្តាំផ្ញើដល់កងកម្លាំងទាំងអស់ត្រូវខិតខំអនុវត្តតាមសេចក្តីណែនាំលេខ០១៩នេះ ឲ្យបានម៉ឺងម៉ាត់ ខ្ជាប់ខ្ជួន និងមិនត្រូវភ្លេចតួនាទីរបស់ខ្លួន ដែលជាអ្នកបម្រើប្រជាពលរដ្ឋ ។
លោកឧត្តមសេនីយ៍ស្នងការ បានបញ្ជាក់ថា បន្ទាប់ពីធ្វើការផ្សព្វផ្សាយសេចក្តីណែនាំលេខ០១៩នេះ ជូនដល់កងកម្លាំងនគរបាលខេត្តបានជ្រួតជ្រាប ត្រូវបន្តចុះធ្វើការផ្សព្វផ្សាយសេចក្តីណែនាំលេខ០១៩ នេះជូនដល់កងកម្លាំងនគរបាលតាមបណ្តាស្រុក-ក្រុង៥ និងវរសេនាតូចទាំង២ បានជ្រួតជ្រាបបន្ថែមទៀត ដើម្បីយកទៅអនុវត្តឲ្យបានម៉ឺងម៉ាត់ និងខ្ជាប់ខ្ជួន ៕ ដោយ៖បញ្ញាស័ក្តិ