ប្រទេសជាង ២០នៅក្រុមប្រឹក្សាសិទ្ធិមនុស្សអង្គការសហប្រជាជាតិ បានចុះហត្ថលេខា លើលិខិតរួមមួយ ដោយធ្វើការរិះគន់ទៅសកម្មភាព រដ្ឋាភិបាលចិនប្រព្រឹត្តលើជនជាតិដើមភាគតិចវីហ្គ័រ (Uighur) នៅតំបន់ Xinjiang។
អ្នកជំនាញ និងក្រុមសិទ្ធិមនុស្សអង្គការសហប្រជាជាតិ បាននិយាយថា ចិនកំពុងគ្រប់គ្រងជនជាតិវីហ្គ័រ និងជនជាតិមូស្លីមផ្សេងៗទៀត ប្រហែល ១លាននាក់នៅជំរុំឃុំខ្លួន។
ប៉ុន្តែចិនបានអះអាងថា ជនជាតិវីហ្គ័រ កំពុងត្រូវបានអប់រំនៅមជ្ឈមណ្ឌលហ្វឹកហាត់ ដែលត្រូវបានបង្កើតឡើង ដើម្បីប្រឆាំងនឹងក្រុមជ្រុលនិយម។
នៅក្នុងលិខិតរួម ដែលចុះហត្ថលេខាដោយឯកអគ្គរាជទូតអង់គ្លេស ជប៉ុន និងកាណាដាជាដើម បានដកស្រង់របាយការណ៍ ស្តីការការឃុំខ្លួនទ្រង់ទ្រាយធំ ព្រមទាំងមានការឈ្លប និងការរឹតដ្បិតផងដែរ ដែលធ្វើឡើងចំពោះជនជាតិវីហ្គ័រ និងជនជាតិដើមភាគតិចផ្សេងទៀត នៅតំបន់ Xinjiang។
ប្រទេសចិនក៏ត្រូវបានគេជំរិញឲ្យអនុញ្ញាតឲ្យអ្នកស៊ើបអង្កេតអន្តរជាតិឯករាជ្យ និងរបស់អង្គការសហប្រជាជាតិ ចូលទៅដល់តំបន់ Xinjiang ផងដែរ។
បើតាមភស្ថុតាងដែលប្រមូលបានដោយ BBC បានបង្ហាញថា នៅក្នុងទីប្រជុំជនតូចមួយនៅតំបន់ Xinjiang មានកុមារច្រើនជាង ៤០០នាក់ បានបាត់បង់ឪពុកម្តាយរបស់ពួកគេដោយសារតែ ការឃុំឃាំង។
ទោះយ៉ាងណា ឯកអគ្គរដ្ឋទូតចិនប្រចាំអង់គ្លេស បានធ្វើការបដិសេធថា កុមារទាំងនោះ ត្រូវបានគេចាប់បំបែកជាប្រព័ន្ធចេញពីឪពុកម្តាយពួកគេ៕ អត្ថបទប្រែសម្រួលដោយ៖ សុភ័ក្រ/ប្រភព៖ BBC
