មណ្ឌលគិរី ៖ ឧកញ៉ា ស៊ឹង សំអុល មេបំផ្លាញព្រៃឈេី ដែលឈរឱបដៃ ធ្វើព្រងើយហាក់ដូចជាមិនមានអ្វីកើតឡើង ពេលអាជ្ញាធររួមជាមួយនឹងសមត្ថកិច្ចចម្រុះប៉េអឹមដែលដឹកនាំដោយលោកនាយឧត្តមសេនីយ៍សៅសុខា មេបញ្ជាការការកងរាជអាវុធហត្ថលើផ្ទៃប្រទេស ចុះបង្ក្រាប បទល្មើសព្រៃឈើនៅភូមិភាគឦសាន ។ លោកវីលាមបាននិយាយថា ប្រសិនជាពលរដ្ឋធម្មតាវិញមិនមានសំណាងអញ្ចឹងទេ ច្បាស់ណាស់ថាសមត្ថកិច្ចនឹង ដាក់ខ្នោះបាត់ហេីយ ។
នៅលើផេកហ្វេសប៊ុកផ្លូវការនៅថ្ងៃទី 11 ខែកក្កដាឆ្នាំ 2015 នេះលោកវីល្លាម សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ មកពីគណបក្សខ្មែរក្រោម បានថ្លែងថា “នេះរូប ឧកញ៉ា ស៊ឹង សំអុល មេបំផ្លាញព្រៃឈេីដែលឈរអោបដៃ ពេលអាជ្ញាធរចុះបង្ក្រាបប្រសិនជាពលរដ្ឋធម្មតាវិញមិនមានសំណាងអញ្ចឹងទេកុំថាដល់ប្រព្រឹត្តធ្ងន់ធ្ងរតែលួចអីតិចតួច ដាក់ខ្នោះបាត់ហេីយ ! បេីរឿងដីធ្លីអីនោះវិញ ចងស្លាបសេកសំពងសាហាវជាងប៉ុលពតទៀត ។ កុំខឹងខ្ញុំណា ខ្ញុំនិយាយជួសប្រជាពលរដ្ឋទេ “។
សូមបញ្ជាក់ថា នៅថ្ងៃទី១០កក្កដា រថយន្តដឹកឈើល្មើសច្បាប់ចំនួន ៤គ្រឿង ដែលរកឃើញនៅក្នុងព្រៃជ្រៅ ស្ថិតក្នុងកស្រុកកោះញែក ខេត្តមណ្ឌលគិរី ពិបាកក្នុងការនាំចេញមកក្រៅវិញនោះ ត្រូវបានកម្លាំងគណៈកម្មការជាតិ ដើម្បីទប់ស្កាត់ និងបង្ក្រាបបទល្មើស ធនធានធម្មជាតិធ្វើការកម្ទេចចោលនៅនឹងកន្លែងតែម្តង។
លោកឧត្តមសេនីយ៍ត្រី អេង ហ៊ី អ្នកនាំពាក្យគណៈកម្មការជាតិ ដើម្បីទប់ស្កាត់ និងបង្ក្រាបបទល្មើស ធនធានធម្មជាតិ បានថ្លែងថា រថយន្តដឹកឈើនៅក្នុងព្រៃចំនួន ៤គ្រឿង ដែលរកឃើញនៅក្នុងព្រៃ ត្រូវធ្វើការបំផ្លាញចោលតែម្តង ដោយប្រើម្សៅ TNT។ សម្រាប់រថយន្តល្មើសជាង ៤០គ្រឿងទៀត ដែលត្រូវបានបង្ក្រាប និងរឹបអូសផងដែរនោះ រង់ចាំការកាត់ចោល និងបំផ្លាញចោលនៅពេលក្រោយ។
ដោយឡែកសំណុំរឿងនៃការចាប់ខ្លួនលោកឧកញ៉ា ស៊ឹង សំអុល និងបក្ខពួក៣នាក់ផ្សេងទៀត ដែលរងការចាប់ខ្លួនផងដែរនោះ ត្រូវបានលោកឧត្តមសេនីយ៍អ្នកនាំពាក្យអះអាងថា អាចផ្ទេរមកកាន់សាលាដំបូងរាជធានីភ្នំពេញ ដើម្បីចាត់ការបន្ត។
លោកឧត្តមសេនីយ៍ត្រី អេង ហ៊ី បានបន្ថែមថា កាលពីយប់មិញ ឧកញ៉ា សឹង សំអុល ត្រូវបានឃុំខ្លួនបណ្តោះអាសន្ននៅក្នុងទីបញ្ជាការកងរាជអាវុធហត្ថខេត្តមណ្ឌលគិរី ដើម្បីរង់ចាំការសាកសួរបន្ត។
ឧកញ៉ា ស៊ឹង សំអុល ជាប្រធានក្រុមហ៊ុន មេការក្រុមហ៊ុន២នាក់ និងអ្នកបើករថយន្តម្នាក់ ត្រូវចាប់ខ្លួន នៅក្នុងប្រតិបត្តិការបង្ក្រាបបទល្មើសព្រៃឈើ ក្នុងស្រុកកោះញែក ខេត្តមណ្ឌលគិរី ដោយដកហូតបានរថយន្តដឹកឈើជាង៤០គ្រឿង។
សូមបញ្ជាក់ថា ប្រតិបត្តិការបង្ក្រាបឧក្រិដ្ឋកម្មព្រៃឈើ បានធ្វើឡើងបន្ទាប់ពីគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដែលមាននាយឧត្តមសេនីយ៍ សៅ សុខា ជាប្រធាន បានសម្រេចដាក់ចេញនូវវិធានការតឹងរ៉ឹង និងសម្រេចឲ្យមានការបំផ្លាញចោលមធ្យោបាយដឹកជញ្ជូនបទល្មើសព្រៃឈើ នៅនឹងកន្លែងតែម្តង។
សូមបញ្ជាក់ថា នៅរសៀលថ្ងៃទី៩ ខែកក្កដា ឆ្នាំ២០១៩នេះ កម្លាំងគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្រោមការដឹកនាំបញ្ជាផ្ទាល់ពីនាយឧត្តមសេនីយ៍ សៅ សុខា ជាប្រធានគណៈកម្មាធិការជាតិ បានបង្ក្រាបក្នុងរូបភាពទ្រង់ទ្រាយធំ ដោយចាប់ខ្លួនមនុស្ស៤នាក់ ក្នុងនោះមានឧកញ៉ា ស៊ឹង សំអុល ប្រធានក្រុមហ៊ុន មេការ២នាក់ និងអ្នកបើករថយន្តម្នាក់ ព្រមទាំងដកហូតរថយន្ដជាង៤០គ្រឿងផងដែរ៕ ដោយ៖កូឡាប