ខេត្តព្រះសីហនុ៖ សមត្ថកិច្ចនគរបាលខេត្តព្រះសីហនុ បានឲ្យដឹងថា យប់រំលងអាធ្រាត្រឈានចូល ថ្ងៃទី១១ ខែកក្កដា ឆ្នាំ២០១៩ មានអគ្គិភ័យមួយបានឆឆេះចេញពីបន្ទប់ជាន់ទី១២ នៃអគារកម្ពស់ជាង១០ជាន់មួយកន្លែង ដែលសាងសង់ជិតរួចរាល់ របស់ក្រុមហ៊ុនជនជាតិចិន មានទីតាំងនៅតាមផ្លូវមុខសណ្ឋាគារខ្សាច់ស នាឆ្នេរអូរឈើទាល ក្រុងព្រះសីហនុ។
សមត្ថកិច្ចបន្តថា ខណៈពេលភ្លើងកំពុងឆាបឆេះនោះ សមត្ថកិច្ចផ្នែកពន្លត់អគ្គិភ័យទាំងនគរបាល និងកងរាជអាវុធហត្ថខេត្តព្រះសីហនុ ក៏បានចេញអន្តរាគមន៍ជួយពន្លត់ភ្លាមៗដែរ។
អគ្គីភ័យនេះ សមត្ថកិច្ចបញ្ជាក់ថា មិនមានមនុស្សរងគ្រោះថ្នាក់អ្វីទេ ហើយថាដើមហេតុ បង្កើតឲ្យមានអគ្គិភ័យនេះកើតឡើង សមត្ថកិច្ចបានសន្និដ្ឋានបឋមថា ទំនងជាអាចបណ្តាលមកពីឆ្លងចរន្តអគ្គិសនី។
មន្ត្រីនគរបាលពន្លត់អគ្គិភ័យខាងលើនេះ បញ្ជាក់បន្ថែមថា ចំពោះសកម្មភាពកម្លាំងសមត្ថកិច្ចជំនាញចូលមកជួយអន្តរាគមន៍ពន្លត់ភ្លើងឆេះអគារមានកំពស់ខ្ពស់ខាងលើបានទាន់ពេលវេលានេះ ដោយតែនៅក្នុងអគារនេះ មានរៀបចំប្រព័ន្ធទុយោទឹក សម្រាប់ពន្លត់អគ្គិភ័យនៅគ្រប់ជាន់ទាំងអស់ នៃអគារ ដែលបង្កលក្ខណៈងាយស្រួលដល់កម្លាំងសមត្ថកិច្ចចុះប្រតិបត្តិការជួយពន្លត់អគ្គិភ័យនេះបានជោគជ័យ។ បន្ថែមលើនេះ ក្រុមសមត្ថកិច្ចជំនាញ បានប្រើបំពង់អុកសុីហ្សែន ដើម្បីឡើងទៅបាញ់ទឹកពន្លត់ភ្លើងឆេះនេះ ដល់ជាន់ដែលត្រូវឆេះ រហូតរលត់ជាស្ថាពរ និងមិនបណ្តាលឲ្យមានមនុស្សរងរបួស គ្រោះថ្នាក់នោះទេ៕ ដោយ៖ ដែន សីមា