កំពង់ធំ៖ អនុប្រធានសភាពាណិជ្ជកម្ម ខេត្ដកំពង់ធំ លោក លឹម ភ័ណ្ឌ បើកអាជីវកម្មសិប្បកម្មផលិតទឹកក្រូច ក្លែងក្លាយលក់ទីផ្សារ ត្រូវបានអនុប្រធានមន្ទីរឧស្សាហកម្មនិងសិប្បកម្មខេត្តកំពង់ធំ បកអាក្រាតបញ្ជាក់ប្រាប់មហាជនថា សិប្បកម្មខាងលើនេះ ពិតជាមិនអនុលោមទៅតាមច្បាប់កំណត់នោះទេ ។
លោកនួន ស៊ីណាល់ ជាអនុប្រធានមន្ទីរឧស្សាហកម្ម និងសិប្បកម្មខេត្តកំពង់ធំ នៅថ្ងៃទី១១កក្កដានេះ បានបំភ្លឺដល់សាធារណជន ឲ្យបានជ្រាបអំពីសហគ្រាសលឹមភ័ណ្ឌផលិតទឹកសុទ្ធ ដឹកទឹកក្រូច ដែលមានអាសយដ្ឋានក្រុមទី 33 ភូមិប្រិយប្រលិច សង្កាត់អាចារ្យលក្ខ ក្រុងស្ទឹងសែន ខេត្តកំពង់ធំ ពិតជាមិនអនុលោមទៅតាមច្បាប់កំណត់ ដូចជា មិនបានសុំច្បាប់ចុះបញ្ជីផលិតផលនៅលើសម្បកវេចខ្ចប់ (មិនមាន ច.ប.ផ) មិនមានវិញ្ញាបនបត្របញ្ជាក់គុណភាព នៅលើសម្បកវេចខ្ចប់ដាក់អាសយដ្ឋានមិនប្រាកដ នៅលើផលិតផលមួយចំនួនធំហួសកាលបរិច្ឆេទ ទំនិញនាំចូលគ្មានប្រភពច្បាស់លាស់ និងរក្សាទុកទំនិញខូចគុណភាពនិងហួសកាលបរិច្ឆេទ។
ភ្ជាប់មកជាមួយខ្លឹមសារខាងលើនេះ លោកអនុប្រធានបានបញ្ជាក់ថា កន្លងទៅកាលពីថ្ងៃទី 10 ខែកក្កដា ឆ្នាំ 2019 វេលាម៉ោង 20 និង 17 នាទី លោកបានបង្ហោះសារចូលទៅក្នុងគ្រុបតេឡេក្រាមឈ្មោះ សេរីភាពសារព័ត៌មាន សហគ្រាសខាងលើ មានឯកសារគ្រប់គ្រាន់ តែតាមការពិតការសរសេររបស់ខ្ញុំបាទនេះ ពុំបានពិនិត្យលើឯកសាររបស់សហគ្រាសខាងលើ និងផ្ទៀងផ្ទាត់ ឬនឹងរបាយការណ៍របស់ កម្លាំងសមត្ថកិច្ច គណៈកម្មាធិការប្រយុទ្ធប្រឆាំងផលិតផលក្លែងក្លាយឡើយ។ លោកនូន ស៊ីណាល់ បានបញ្ជាក់បន្ថែមថា “ខ្ញុំបាទសូមធ្វើតាមសុំទោសជាសាធារណៈ នូវកំហុសឆ្គង ដែលខ្ញុំបានសរសេរអត្ថបទមិនប្រាកដ ធ្វើឲ្យមានការភ័ន្តច្រឡំលើមតិមហាជន”។
សូមបញ្ជាក់ថា លោក អ៊ិត សុធា ព្រះរាជអាជ្ញាខេត្តកំពង់ធំ ដឹកនាំ កម្លាំងបង្ក្រាបទីតាំង សិប្បកម្មផលិតទឹកក្រូច ក្លែងក្លាយ យីហោ លឹម ភ័ណ នៅសង្កាត់អាចារ្យលក្ខ ខេត្តកំពង់ធំ នៅថ្ងៃទី១០ ខែកក្កដា ឆ្នាំ២០១៩ បានរកឃើញទឹកក្រូច ជាច្រើនប្រភេទ ដែលផលិត ដាក់មេស្ករលាយទឹក សម្រាប់លក់ចែកចាយលើទីផ្សារ បន្លំជាមួយទឹកក្រូច របស់គេដែលត្រឹមត្រូវ។
បណ្តាញសង្គមហ្វេសប៊ុក បានលើកឡើងថា កាលទៅស្រុកអូនឯង បងឃើញគេលក់ច្រើនណាស់ ហើយបងអូនឯងក៏ទិញផឹកដែរ ។ នេះជាបញ្ហាផ្នត់គំនិត និងភាពអាត្មានិយម មានរឿងច្រើនដែលដោះស្រាយមិនចេញ ងាប់តែគ្នាអ្នកនៅតាមជនបទមិនដឹងគំនិតរកស៊ីថោកទាប បែបនេះពួកអាគំនិតថោកនេះ អ្នកជនបទឲ្យតែរបស់ថោកៗ គ្នាចេះតែទិញផឹកហើយ។ បើចេះតែសម្លាប់ខ្មែរគ្នាឯងដោយមិនចេះគិតបែបនេះ តើថ្ងៃមុខនឹងទៅជាយ៉ាងណាទៅលោកអើយ?
សិប្បកម្មផលិតទឹកក្រូច យីហោ លឹម ភ័ណ្ឌ ត្រូវបានគេរាយការណ៍មកថា បានបើកដំណើរការរាប់ឆ្នាំមកហើយ ដែលមាន ម្ចាស់ឈ្មោះ លឹម ភ័ណ្ឌ មានតួនាទីជាអនុប្រធានសភាពាណិជ្ជកម្មខេត្តកំពង់ធំ ។ លោក លឹម ភ័ណ្ឌ សម្ងំផលិតទឹកក្រូចអត់គុណភាព រាប់ និងក្លែងក្លាយរាប់ឆ្នាំ មកហើយរហូតក្លាយជាសេដ្ឋី កំពុងរត់ គេចខ្លួន បន្ទាប់ពីសមត្ថកិច្ចបង្ក្រាបទីតាំងរបស់ខ្លួន។
លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ បានដឹកនាំកម្លាំងបង្ក្រាបទីតាំង សិប្បកម្មផលិតទឹកក្រូចយីហោ លឹម ភ័ណ្ឌ ដោយរកឃើញទឹកក្រូច ជាច្រើនប្រភេទ ដែលផលិត ដាក់មេ លាយទឹក សម្រាប់លក់ចែកចាយនៅលើទីផ្សារក្នុងខេត្តកំពង់ធំ និងតាមបណ្តាខេត្តមួយចំនួនទៀត។ មហាជនជនកំពុងរង់ចាំមើលថា តើអាជ្ញាធរអាចចាត់វិធានការច្បាប់លើលោកលឹម ភ័ណ្ឌ នេះបានឬទេ?។ លោក លឹម ភ័ណ្ឌ អាចប្រឈមមុខនិងផ្លូវច្បាប់ និងប្រឈមមុខដកតំណែង និងបិទអាជីវកម្មទាំងស្រុងតែម្ដង៕ ដោយ៖កូឡាប
