ខេត្តព្រះសីហនុ៖ សមត្ថកិច្ចនគរបាលស្រុកព្រៃនប់ បានឲ្យដឹងថា កម្លាំងសមត្ថកិច្ចបានបន្តចុះណែនាំដល់ម្ចាស់រថយន្តដឹកខុសលក្ខណៈបច្ចេកកទេស ឬដឹកទំនិញសំពីងសំពោង ដែលធ្វើចរាចរណ៍តាមផ្លូវជាតិឆ្លងកាត់ស្រុកព្រៃនប់ជារៀងរាល់ថ្ងៃ និងអំពាវនាវដល់ម្ចាស់រថយន្តដឹកទំនិញទាំងនោះ ឲ្យចូលរួមសហការណ៍ជាមួយសមត្ថកិច្ច។
អធិការនគរបាលស្រុកព្រៃនប់ លោក ហួ យ៉ៃ បានឲ្យដឹងថា នៅថ្ងៃទី១១ ខែកក្កដា ឆ្នាំ២០១៩នេះ នគរបាលចរាចរណ៍បានឃាត់រថយន្តដឹកទំនិញចំនួន៣គ្រឿងទៀត ដែលដឹកទំនិញខុខលក្ខណៈបច្ចេកទេស ហើយ ត្រូវបានសមត្ថកិច្ចជំនាញអធិការដ្ឋាននគរបាលស្រុក ឃាត់យកមកអប់រំនិងពិន័យទៅតាមផ្លូវច្បាប់។
លោក ហួ យ៉ៃ អធិការនគរបាលស្រុកព្រៃនប់ បន្តថា ចំពោះរថយន្តដឹកសំពីងសំពោងដែលធ្វើចរាចរណ៍ឆ្លងកាត់ស្រុកព្រៃនប់ សមត្ថកិច្ចលោកនៅតែបន្តឃាត់ចាប់ យកមកកាន់អធិការដ្ឋានស្រុកជាបន្តបន្ទាប់ ដើម្បីអប់រំ និងផាកពិន័យទៅតាមផ្លូវច្បាប់ និងឲ្យស្របតាមបទបញ្ជា របស់លោក ជួន ណារិន្ទស្នងការនគរបាលខេត្តព្រះសីហនុ ប្រយោជន៍ដើម្បីពង្រឹងច្បាប់ចរចរណ៍ផ្លូវគោកផង និងដើម្បីកាត់បន្ថយគ្រោះថ្នាក់ចរាចរណ៍នៅតាមដងផ្លូវឲ្យថយចុះចំនួនផងដែរ៕ ដោយ៖ ដែន សីមា