រដ្ឋមន្ត្រីក្រសួងកសិកម្ម បានសម្រេចដក ប្រធានការិយាល័យសុខភាពសត្វ នៅខេត្តត្បូងឃ្មុំ បន្ទាប់ពីកើតមានជំងឺប៉េស្តជ្រូកអាហ្វ្រិក នៅក្នុងស្រុកអូររាំងឪ ខេត្តត្បូងឃ្មុំ និងដោយសារតែភាពមិនប្រក្រតីមួយចំនួន។ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែង ថា ការសម្រេចដកប្រធានការិយាល័យសុខភាពសត្វនៅខេត្តត្បូងឃ្មុំ ធ្វើឡើងតាំងពីដើមសប្តាហ៍មក។
លោករដ្ឋមន្ត្រីបានបញ្ជាក់ថា ទាក់ទងបញ្ហានេះ គឺតាមអ្វីដែលមន្ត្រីរបស់យើងចុះធ្វើការ គាត់ មិនសូវសហការពេញលេញ ហើយគាត់រាងសោះអង្គើញរឿងការងារ សហការជាមួយក្រុមការងារ ដែលចុះពីកណ្តាល ទៅ ហើយយើងតាមដាន មើលសកម្មភាពកន្លងទៅនេះ។ ឃើញមានជួបបញ្ហាអ៊ីចឹង ហើយក៏យើងបានធ្វើការណែនាំមួយជំហានដែរ ប៉ុន្តែហាក់បីដូចជាមិនសូវបានកែលម្អបានល្អប្រសើរ បានឈានទៅដល់ការដក ព្រោះយើងបានទុកពេលឲ្យគាត់មួយខែជាងលើបញ្ហាហ្នឹង។
ការផ្ទុះជំងឺប៉េស្តជ្រូកអាហ្វ្រិក នៅក្នុងស្រុកអូររាំងឪ ខេត្តត្បូងឃ្មុំ បណ្តាលឱ្យសត្វជ្រូកដែលប្រជាកសិករចិញ្ចឹមចំនួន ៣៣៧ក្បាល បានងាប់ ក្នុងចំណោមជ្រូកជាង ៩០០០ក្បាល ដែលចិញ្ចឹមក្នុងស្រុក គិតមកត្រឹមថ្ងៃទី១០ ខែកក្កដា ឆ្នាំ២០១៩៕ ដោយ៖បញ្ញាស័ក្តិ