ពិភពលោកឆ្នាំ ២០១៨ នឹងត្រូវបន្តមរតកបន្សល់ទុកពីឆ្នាំមុន ហើយមរតកទាំងនោះគឺជាសំណុំបញ្ហានាំឲ្យស្ថានការណ៍ពិភពលោកនាឆ្នាំថ្មីនេះ ពុំដូចឆ្នាំមុន។ ម្យ៉ាងវិញទៀត នៅឆ្នាំ ២០១៨ ក៏ពុំងាយចៀសផុតពីរឿងរ៉ាវគិតស្មានថា តូចនាឆ្នាំមុន អាចនឹងផ្ទុះឡើងក្លាយជារឿងធំ។ មនុស្សលោក នឹងប្រឈមមុខជាមួយបញ្ហាថ្មីផ្សេងទៀត។ ការព្យាករណ៍អំពីអនាគត គឺជារឿងពិបាកខុសច្រើនជាងត្រូវ ប៉ុន្តែវាជាបញ្ហាចាំបាច់បម្រើឲ្យការត្រៀមប្រឈមមុខតទល់ គ្រប់បរិបទដែលអាចកើតមាន។
បញ្ហាសេរី ៖ ការប្រឈមមុខដ៏ធំធេងចំពោះលោកពូទីន
អស្ថិរភាពបន្សល់ទុកឆ្នាំ ២០១៧ នឹងបន្តរីកធំជាងឆ្នាំ ២០១៨។ នៅមជ្ឈិមបូព៌ា អាហ្វ្រិកខាងជើង និងឈូងសមុទ្រ រុស្ស៊ី អ៊ីរ៉ាក់ អ៊ីរ៉ង់ បានប្រកាសពីការវាយពួក IS ឲ្យរលំរលាយ។ យ៉ាងនេះក្តីសមរភូមិនឹងអំពើហិង្សា នៅកន្លែងទាំងនោះមានចប់ឯណា?។ គ្រាប់នឹងបន្តទម្លាក់ ស្នូរកាំភ្លើងនៅបន្តផ្ទុះ ការស្លាប់នឹងការបំផ្លាញបន្តកើតមាន ខណៈពេលដំណោះស្រាយសន្តិភាពស្ថិតនៅឯ “ជើងមេឃ”។
ស៊ីរី គឺជាកន្លែងសម្រាប់ពិនិត្យមើលសមត្ថភាពរបស់រុស្ស៊ីលើឆាកអន្តរជាតិ។ ពិតណាស់! ពុំមែននៅអឺរ៉ុប ឬនៅកន្លែងណាទៀតឡើយ ស៊ីរី ឆ្នាំ ២១០៨ គឺជាការប្រឈមមុខធំធេងបំផុតចំពោះរុស្ស៊ី និងនយោបាយពិភពលោក។ ប្រសិនបើពុំមានដំណោះស្រាយនយោបាយសន្តិភាពសម្រាប់ស៊ីរីទេ រុស្ស៊ីនៅតែពុំអាចត្រូវបានទទួលស្គាល់ពីមុខនាទី ក្នុងបន្ទាត់នយោបាយពិភពលោក។
IS ត្រូវបានវាយផ្តួលឲ្យរលំរលាយ ពុំមែនមានន័យថា វាត្រូវបានកម្ទេចទាំងស្រុងនោះទេ។ សកម្មភាពភេរវកម្មរបស់ទាហានបាក់ទ័ព IS គឺជាការប្រឈមមុខលើផ្នែកសន្តិសុខធំបំផុត សម្រាប់ឆ្នាំ ២០១៨នេះ ហើយពុំត្រឹមស្ថិតនៅក្នុងតំបន់ឡើយ គឺស្ថិតនៅទូទាំងពិភពលោកតែម្តង។
នៅតំបន់មជ្ឈិមបូព៌ាអាហ្វ្រិកខាងជើង និងតំបន់ឈូងសមុទ្រ នៅមានសង្គ្រាមនៃប្រទេសយ៊ែមែន ដែលស្ថិតនៅពីក្រោយនោះ វាត្រូវបានបូកបន្ថែមនូវការគុំកួនគ្នា រវាងអារ៉ាប់ប៊ីសាអូឌីត ជាមួយអ៊ីរ៉ង់ ក៏ដូចជាជម្លោះរវាងអ៊ីស្រាអែល និងប៉ាឡេស្ទីន និងកម្រិតតានតឹងរបស់វាកំពុងកើនឡើងពីមួយថ្ងៃទៅមួយថ្ងៃ។
កត្តាទាំងនេះ បានធ្វើឲ្យតំបន់ទាំងមូល និងប្រទេសជាច្រើនក្នុងតំបន់នោះ កាន់តែអស្ថិរភាពបន្ថែមឡើង ក្នុងឆ្នាំ ២០១៨នេះ។
បញ្ហាកូរ៉េខាងជើង ៖ ក្តារអុក ដែលលោក Trump ពិបាកលេង
នៅផ្នែកម្ខាងទៀត នៃពិភពលោក រឿងរ៉ាវទាំងឡាយទាក់ទិនដល់កូរ៉េខាងជើង គ្រាបន្តជាមូលបទស្នូល។ ឆ្នាំ ២០១៨ នឹងអាចមានចម្លើយសម្រាប់បញ្ហានេះថា តើអាមេរិក ចិន និងរុស្ស៊ី អាចសាងបាននូវដំណោះស្រាយនយោបាយសម្រាប់បញ្ហានុយក្លេអ៊ែរ និងកាំជ្រួចរបស់ប្រទេសនេះដែរឬទេ?។
ពុំមែនរឿងនុយក្លេអ៊ែ ឬកាំជ្រួចរបស់អ៊ីរ៉ង់ទេ ដែលជាការប្រឈមធំបំផុតចំពោះតួនាទីនយោបាយពិភពលោករបស់អាមេរិក តែនោះគឺបញ្ហាកូរ៉េខាងជើង។
លើបញ្ហាកូរ៉េខាងជើងដដែលនេះ នៅឆ្នាំ ២០១៨ វានឹងស្តែងបង្ហាញឲ្យឃើញចំណងទាក់ទងជាមួយចិន និងរុស្ស៊ី ថា វានឹងបន្តអាក្រក់ឬប្រសើរឡើង តាមរយៈនោះក្នុងឆ្នាំ ២០១៨នេះ ប្រសិនបើមហាអំណាចទាំង៣ ពុំអាចរារាំងបាននូវកម្មវិធីកម្មជ្រួច និងនុយក្លេអ៊ែររបស់កូរ៉េខាងជើងទេនោះ ប្រហែលជាត្រូវទទួលស្គាល់វា ។
មហាអំណាចទាំង៣នេះ ក៏ជាអ្នកមានវត្តមានលេចធ្លោរ ក្នុងល្បែងនយោបាយ អំណាច និងការបែងចែកភូមិសាស្ត្រនយោបាយរបស់ពិភពលោកឆ្នាំ ២០១៨។
ខាងលើគឺជាការប្រឈមរបស់អាមេរិក និងរុស្ស៊ី ប្រទេសចិនក្រោយពេលដោះស្រាយរួចរាល់នូវបញ្ហាសណ្តាប់ធ្នាប់អំណាច ក្នុងប្រទេសក៏ត្រូវប្រឈមនឹងចំណែកមួយនៃបញ្ហារបស់អំណាច២ខាងលើ។ ក្រៅពីនោះ គឺនៅមានបញ្ហាសមុទ្រចិនខាងត្បូង។
ឆ្នាំ ២០១៨ អ៊ីយូ ហាក់ដូចជាស្ថិតនៅក្រៅបញ្ហា ដោយសារតែពួកគេកំពុងដោះស្រាយចំណោទផ្ទៃក្នុង ដើម្បីស្វែងរកសំឡេងរួមក្នុងការប្រឆាំងភេរវកម្ម ការបះបោរនៃក្រុមឆ្វេងនិយម បញ្ហាជនភៀសខ្លួន រឿងអង់គ្លេសចាកចេញពីអ៊ីយូ ការប្រេះឆាផ្ទៃក្នុង។
ទោះយ៉ាងណាពិភពលោកចុងឆ្នាំ ២០១៨ ក៏មានចំណុចល្អប្រសើរដែរ។ នោះគឺបញ្ហាសេដ្ឋកិច្ច និងពាណិជ្ជកម្មពិភពលោកបន្តមានកំណើត ទោះបីពុំទាន់ខ្ពស់ក្តី តែវាស្ថិរភាពគួរសម។ និន្នាការសេរីភាវូបនីយកម្មពាណិជ្ជកម្ម វានៅតែបន្តគ្របដណ្តប់ទោះបីមានការរារាំងពីសំណាក់លទ្ធិអាណាព្យាបាលនិយម។
ចំណុចល្អមួយទៀតចំពោះពិភពលោក គឺប្រទេសភាគច្រើនបន្តដំណើរលើផ្លូវតែមួយសំដៅដោះស្រាយការប្រឈមរបស់មនុស្សជាតិ ជាអាទិ៍ កិច្ចការពារ បរិយាកាសផែនដី លុបបំបាត់អាវុធនុយក្លេអ៊ែរ ឬការការពារច្បាប់អន្តរជាតិ។
ពិភពលោកឆ្នាំ ២០១៨ ពិតជាមានរឿងច្រើនសម្រាប់យើងទាំងអស់គ្នាខ្វាយខ្វល់ ប៉ុន្តែវាក៏មានចំណុចធ្វើឲ្យយើងសុទិដ្ឋិនិយមជឿជាក់លើទង្វើសកម្ម និងភាពល្អប្រសើរ៕ សូយន
