សហគមន៍ក្នុងដែនជម្រកសត្វព្រៃកែវសីមា បានរៀបចំផែនការសកម្មភាពប្រចាំឆ្នាំ២០២០ លើបញ្ហាប្រឈម និងរៀបចំផែនការសកម្មភាព ការបង្កើនប្រសិទ្ធិភាពបន្ថែមទៀតក្នុងការការពារ និងអភិរក្សអាងស្តុកកាបូនក្នុងដែនជម្រកសត្វព្រៃកែវសីមា។
នៅខេត្តមណ្ឌលគិរី នាថ្ងៃទី១១ ខែកក្កដា ឆ្នាំ២០១៩ លោកជួប ប៉ារីស៍ អគ្គលេខាធិការរងនៃ ក.ជ.អ.ច. បានចូលរួមជាគណៈអធិបតីក្នុងកិច្ចប្រជុំពិភាក្សាស្តីពីផែនការសកម្មភាពប្រចាំឆ្នាំ ២០២០ របស់ដែនជម្រកសត្វព្រៃកែវសីមា ដែលមានចូលរួមមកពីក្រុមល្បាត សហគមន៍តំបន់ការពារ អាជ្ញាធរដែនដី មន្ត្រីឧទ្យានុរក្ស មន្ទីរបរិស្ថានខេត្តមណ្ឌលគិរី និងមន្ទីរបរិស្ថានខេត្តក្រចេះ អង្គការដៃគូ និងអង្គការសមាគមអភិរក្សសត្វព្រៃ (wcs) ប្រមាណជា ៧០នាក់។
កិច្ចប្រជុំនេះបានផ្តោតលើលទ្ធផលសម្រេចបានប្រចាំឆ្នាំ បញ្ហាប្រឈម និងរៀបចំផែនការសកម្មភាពប្រចាំឆ្នាំ២០២០ដោយប្រមូលធាតុចូលពីភាគីពាក់ព័ន្ធក្នុងការបង្កើនប្រសិទ្ធិភាពបន្ថែមទៀតក្នុងការការពារ និងអភិរក្សអាងស្តុកកាបូនក្នុងដែនជម្រកសត្វព្រៃកែវសីមា។ លោកអគ្គលេខាធិការរង បានចាត់ទុកថាតំបន់ការពារធម្មជាតិនេះជាតំបន់អាងស្តុកកាបូនដ៏ធំមួយ ក្នុងចំណោមតំបន់ REDD+ ២ផ្សេងទៀត រួមមានភ្នំក្រវ៉ាញ និងព្រៃឡង់ ដែលយើងបាននឹងកំពុងទទួលផលពីការលក់ឥណទានកាបូនព្រៃឈើ ដូច្នេះយើងត្រូវការពារព្រៃឈើ និងត្រូវបង្កើនជីវភាពសហគមន៍។ យុទ្ធសាស្ត្រមួយដែលយើងត្រូវយកចិត្តទុកដាក់គឺបង្កើនការអប់រំដល់កូនចៅជំនាន់ក្រោយរបស់សហគមន៍ ដើម្បីឱ្យគាត់មានការផ្លាស់ប្តូរជីវភាព និងមុខរបរ បង្កើនការអភិរក្ស និងស្រឡាញ់ព្រៃឈើដែលមានប្រយោជន៍ពេញមួយជីវិតយើង និងវាស្រូបយកឧស្ម័ន្នផ្ទះកញ្ចក់ ហើយជួយកាត់បន្ថយការប្រែប្រួលអាកាសធាតុ។ លោកបានលើកទឹកចិត្ត ឱ្យមានការចូលរួមពេញលេញពីគ្រប់ភាគីពាក់ព័ន្ធទាំងអស់ចាប់ពីសហគមន៍ ក្រុមល្បាត មន្ត្រីឧទ្យានុរក្ស អាជ្ញាធរដែនដី និងអង្គការដៃគូ ទើបអាចការពារព្រៃឈើ ននិងអាងស្តុកកាបូនយើងបាន៕ ដោយ៖កូឡាប