ក្រុមប្រឹក្សាសិទ្ធិមនុស្សអង្គការសហប្រជាជាតិ បានបោះឆ្នោតឲ្យមានការស៊ើបអង្កេតលើករណីឧក្រិដ្ឋកម្ម ដែលកើតឡើងក្នុងអំឡុងពេលយុទ្ធនាការប្រឆាំងគ្រឿងញៀននៅហ្វីលីពីន ដែលយុទ្ធនាការនោះ បានបណ្តាលឲ្យមនុស្សរាប់ពាន់នាក់ស្លាប់បាត់បង់ជីវិត។
ការស៊ើបអង្កេតនោះនឹងធ្វើការផ្តោតទៅលើការសម្លាប់ក្រៅប្រព័ន្ធច្បាប់ ការចាប់ខ្លួនខុសច្បាប់ និងករណីបាត់ខ្លួនមនុស្សជាច្រើន។
ប្រទេសហ្វីលីពីនបានជំទាស់យ៉ាងខ្លាំងទៅនឹងសេចក្តីសម្រេចរបស់អង្គការសហប្រជាជាតិ និងបានចាត់ទុកវាថាជារឿងចម្លែក។
កាលពីឆ្នាំ ២០១៦ ក្រោយពេលប្រធានាធិបតីហ្វីលីពីន ឡើងកាន់តំណែង គាត់បានផ្តើមធ្វើយុទ្ធនាការមួយហៅថា សង្រ្គាមប្រឆាំងគ្រឿងញៀន ដើម្បីដោះស្រាយបញ្ហាគ្រឿងញៀនក្នុងប្រទេស។
ចាប់តាំងពីមានយុទ្ធនាការនោះមក ជនសង្ស័យគ្រឿងញៀនយ៉ាងតិច ៦.៦០០នាក់ត្រូវបានសម្លាប់ បើយោងតាមប៉ូលិស ប៉ុន្តែសកម្មជនសិទ្ធិមនុស្សបានបញ្ជាក់ថា មនុស្សច្រើនជាង ២៧.០០០នាក់ត្រូវបានសម្លាប់ក្នុងយុទ្ធនាការនោះ។
ជុំវិញការបោះឆ្នោតនេះដែរ ក្នុងចំណោមប្រទេសជាសមាជិក ៤៧ នៃក្រុមប្រឹក្សាអង្គការសហប្រជាជាតិ មានរដ្ឋចំនួន ១៨បោះឆ្នោតគាំទ្រឲ្យមានការស៊ើបអង្កេត ប៉ុន្តែមានរដ្ឋ ១៤បោះឆ្នោតប្រឆាំង ខណៈ ប្រទេស ១៥ទៀតបោះឆ្នោតអនុប្បវាទ។
ឯកអគ្គរដ្ឋទូតហ្វីលីពីនប្រចាំអង្គការសហប្រជាជាតិបានជំទាស់ទៅនឹងសេចក្តីសម្រេចនោះ ក្រោយពេលមានការបោះឆ្នោត។
លោកបញ្ជាក់ថា “ពួកយើងមិនទទួលយកសេចក្តីសម្រេចតែម្ខាង និងបក្ខពួកនយោបាយឡើយ។ សេចក្តីសម្រេចនោះមិនតំណាងឲ្យជ័យជំនះសិទ្ធិមនុស្សឡើយ ប៉ុន្តែវាជាករណីចម្លែកទៅវិញ។ វានឹងអាចមានផលលំបាក”៕ អត្ថបទប្រែសម្រួលដោយ៖ សុភ័ក្រ / ប្រភព៖ BBC