ប្រធានសេនាធិការអាមេរិច គឺលោកឧត្តមសេនីយ៍ Mark Milley បានធ្វើការព្រមានថា ចិនបានរៀនយុទ្ធសាស្រ្តសង្រ្គាមយ៉ាងច្រើនពីអាមេរិច ដែលធ្វើឲ្យចិននឹងក្លាយជាគូប្រជែងយោធាដ៏ធំបំផុតសម្រាប់អាមេរិច ហើយអាចជាគូប្រជែងរហូតដល់មួយសតវត្សរ៍។
លោកបានថ្លែងនៅក្នុងសវនការគណៈកម្មាធិការសេវាកម្មយោធាព្រឹទ្ធសភាអាមេរិចដូច្នេះថា ចិនបានរៀនយ៉ាងច្រើនពីការធ្វើសង្រ្គាមរបស់អាមេរិចនៅមជ្ឈឹមបូព៌ា ហើយចិនបានប្រើប្រាស់មេរៀនទាំងនោះ ដើម្បីអភិវឌ្ឍន៍វិស័យយោធារបស់ខ្លួន។
លោកបញ្ជាក់ថា “ចិនរៀនពីយើង។ ពួកគេបានសង្កេតមើលយើងយ៉ាងខ្ជាប់ខ្ជួន នៅក្នុងសង្រ្គាមឈូងសមុទ្រទី ១ និងទី ២ (First Gulf War)។ ពួកគេមើលសកម្មភាពរបស់យើង និងបានធ្វើតាម ហើយពួកគេបានសម្របគោលនយោបាយ និងការៀបចំ”។
ឧត្តមសេនីយ៍ដដែលថ្លែងបន្តប្រាប់គណៈកម្មាធិការទៀតថា “វិស័យយោធាចិនរីកចម្រើនលឿនខ្លាំង ទាំងនៅលើអាកាស សមុទ្រ លើកគោក និងតាមប្រព័ន្ធអ៊ីនធឺណិត”។
“ពួកគេចំណាយច្រើនក្នុងការស្រាវជ្រាវ និងអភិវឌ្ឍន៍ និងការផ្គត់ផ្គង់។ សហរដ្ឋអាមេរិចយើងត្រូវធ្វើឲ្យប្រាកដថា ពួកយើងមិនបាត់បង់ផលប្រយោជន៍ ចំពោះប្រទេសដែលយើងមានទំនាក់ទំនាក់ទំនង ជាពិសេសទំនាក់ទំនងជាមួយចិន”។
ទោះយ៉ាងណា លោក Mark Milley បានថ្លែងដោយប្រុងប្រយ័ត្នថា ចិនមិនមែនជាសត្រូវឡើយ ប៉ុន្តែជាគូប្រជែង។
លោកថា ពាក្យថា សត្រូវមានន័យថា អ្នកធ្វើសង្រ្គាម។ ពួកយើងមិនមែនធ្វើសង្រ្គាមទេ ពួកយើងមិនចង់នៅសង្រ្គាមទេ។ ពួកយើងចង់បានសន្តិភាពជាមួយចិន៕ អត្ថបទប្រែសម្រួលដោយ៖ សុភ័ក្រ ។ ប្រភព៖ CNN
