ភ្នំពេញ៖ រៀបចំឡើងដោយស្ថាប័នអប់រំ IDP កម្ពុជា កម្មវិធីពិព័រណ៍អាហារូបករណ៍ និងការសិក្សានៅអូស្ត្រាលី បាននាំមកនូវស្ថាប័នអប់រំប្រមាណ៤៤ មកពីប្រទេសអូស្ត្រាលីមកកាន់ប្រទេសកម្ពុជា។ កម្មវិធីបានប្រព្រឹត្តឡើងនៅថ្ងៃទី ១១ ខែកក្កដា ឆ្នាំ ២០១៩ នៅសណ្ឋាគារសូហ្វីតែលភ្នំពេញ ដើម្បីផ្តល់ការប្រឹក្សាផ្ទាល់ និងបង្ហាញនូវជម្រើសសិក្សានានា នៅប្រទេសអូស្ត្រាលីទៅកាន់ សិស្ស និស្សិតកម្ពុជា ក៏ដូចជាមាតាបិតារបស់ពួកគេផងដែរ។
IDP Education គឺជាស្ថាប័នធំជាងគេបង្អស់លើពិភពលោក ដែលបានដើរតួនាទី ក្នុងការបញ្ជូនសិស្ស និស្សិត ទៅសិក្សានៅប្រទេសអូស្ត្រាលី អង់គ្លេស ណូវែលហ្សេឡង់ កាណាដា និងអាមេរិក ជាមួយនឹងការិយាល័យជាង ១០០ នៅច្រើនជាង ៣២ប្រទេសជុំវិញពិភពលោក។
“ជាច្រើនទសវត្សរ៍មកហើយ ដែលប្រទេសអូស្រ្តាលីជាទិសដៅសិក្សាមួយ ដែលមានប្រជាប្រិយភាពសម្រាប់សិស្ស និស្សិត និងអាណាព្យាបាលកម្ពុជា ដើម្បីឲ្យពួកគេជ្រើសរើសទៅបំពេញក្តីស្រមៃការសិក្សា និង ត្រួសត្រាយផ្លូវឆ្ពោះទៅរក អាជីពដែលពួកគេប្រាថ្នា នៅពេលពួកគេត្រឡប់មកប្រទេសកម្ពុជាវិញ។ ប្រទេសអូស្រ្តាលីផ្តល់ឲ្យសិស្ស និស្សិតនូវការអប់រំប្រកបដោយស្តង់ដារពិភពលោកគ្រប់កម្រិត និងត្រូវបានគេទទួលស្គាល់ជាអន្តរជាតិ។” ប្រសាសន៍លោក ម៉ៅ ស្រេង នាយកស្ថាប័នអប់រំ IDP ប្រចាំប្រទេសកម្ពុជា។
“សិស្ស និស្សិតខ្មែរមានបំណងចង់ទៅសិក្សានៅប្រទេសអូស្រ្តាលីពីព្រោះ ពួកគេបានដឹង និងជឿជាក់ទៅលើគុណភាព ដែលពួកយើងបានផ្តល់ឲ្យ ដែលមានស្តង់ដារលំដាប់ពិភពលោក មិនត្រឹមតែប៉ុណ្ណោះ គុណភាពសិក្សានេះ ត្រូវបានផ្តល់ឲ្យជាមួយនឹងទីក្រុងដែលមានភាពសម្បូរបែប ទីតាំងដែលមានទេសភាពគួរឲ្យទស្សនា និងវប្បធម៌ចម្រុះជាច្រើនសណ្ឋាន។ ” ប្រសាសន៍របស់លោកស្រី Angela Corcoran អគ្គរាជទូតអូស្រ្តាលីប្រចាំប្រទេសកម្ពុជា ក្នុងការកម្មវិធីបើកសម្ពោធកម្មវិធីពិព័រណ៍ពីអាហារូបករណ៍ និងការសិក្សានៅប្រទេសអូស្រ្តាលី។
កម្មវិធីពិព័រណ៍អាហារូបករណ៍ និងការសិក្សានៅអូស្រ្តាលី គឺជាវេទិកាការសិក្សាដ៏ធំមួយប្រចាំឆ្នាំនៅប្រទេសកម្ពុជា ដែលមានការចូលរួមពីស្ថាប័នអប់រំអូស្ត្រាលីជាច្រើន និងមានសិស្សនិស្សិត និងអាណាព្យាបាលច្រើនជាង 800 នាក់ បានមកជួបពិភាក្សាផ្ទាល់ជាមួយស្ថាប័នអប់រំអូស្ត្រាលី ដើម្បីស្វែងយល់ព័ត៌មាន អំពីជម្រើសសិក្សាគ្រប់កម្រិតចាប់ពីថ្នាក់វិទ្យាល័យ ថា្នក់អប់រំវិជ្ជាជីវៈវគ្គខ្លី និងកម្មវិធីសិក្សាថ្នាក់សាកលវិទ្យាល័យ ក៏ដូចជាព័ត៌មានអំពីអាហារូបករណ៍ដែលពាក់ព័ន្ធ និងតម្រូវការទិដ្ឋាការផ្សេងៗ។ ការផ្តល់ប្រឹក្សាទៅសិក្សានៅបរទេសរបស់ស្ថាប័ន IDP គឺមិនតម្រូវឲ្យបង់ប្រាក់ទេ។
ការអប់រំរបស់ប្រទេសអូស្រ្តាលីមិនធ្លាប់មានសក្តានុពលនៅប្រទេសកម្ពុជាខ្លាំងយ៉ាងនេះ ពីមុនមកនោះទេ ប៉ុន្តែប្រទេសអូស្រ្តាលី នៅតែជាទិសដៅសម្រាប់បន្តការសិក្សាដ៏មាន ប្រជាប្រិយភាពរបស់សិស្ស និស្សិតខ្មែរ។ ប្រសាសន៍របស់លោកស្រីអគ្គរាជទូត។ ក្នុងកំឡុងឆ្នាំហិរញ្ញវត្ថុ ២០១៧-២០១៨ ទិដ្ឋាការសិស្ស និស្សិតចំនួន ៤២២.៩៥៩ បានផ្តល់ជូនឲ្យសិស្សិ និស្សិតកម្ពុជាដោយ ក្រសួងមហាផ្ទៃប្រចាំក្នុងស្ថានទូតអូស្រ្តាលី ច្រើនជាង ១១,៣ ភាគរយបើធៀបនឹងឆ្នាំមុន។
“ខ្ញុំពិតជាមានសេចក្តីសប្បាយរីករាយណាស់ដែលបានមកចូលរួមកម្មវិធីពិព័រណ៍អាហារូបករណ៍ និងការសិក្សានៅអូស្រ្តាលីក្នុងថ្ងៃនេះ! ខ្ញុំបានជួបជាមួយនឹងអ្នកតំណាងសាកលវិទ្យាល័យ និងស្ថាប័នអប់រំមកពីប្រទេសអូស្រ្តាលីជាច្រើន និងបានទទួលនូវការប្រឹក្សាយ៉ាងក្បោះក្បាយទៅលើចម្ងល់ របស់ខ្ញុំទៀតផង។” នេះបើយោងតាមសម្តីរបស់សិស្សម្នាក់ដែលមកពីសាលាមួយក្នុងទីក្រុងភ្នំពេញ។
ដោយឡែក មជ្ឈមណ្ឌលអូស្រា្តលីសម្រាប់ការបណ្តុះបណ្តាល (ACE) ក៏មានវត្តមានក្នុងកម្មវិធីនេះដែរ និងបានផ្តល់នូវព័ត៌មានទាក់ទង នឹងការសិក្សាភាសាអង់គ្លេស ដើម្បីត្រៀមខ្លួនបំពេញលក្ខខណ្ឌ របស់ស្ថាប័នអប់រំអូស្ត្រាលី។ មន្រ្តីមណ្ឌលប្រលឡង IELTS ប្រចាំប្រទេសកម្ពុជា ក៏បានចូលរួម ផ្តល់ប្រឹក្សាពីតេស្ត IELTS និងបានដាក់ឲ្យប្រើប្រាស់សាកល្បងប្រព័ន្ធតេស្តIELTS តាមកុំព្យូទ័រ ដល់សិស្ស និស្សិតដែលមានបំណងចង់សាកល្បងផងដែរ។
ជាមួយនឹងប្រព័ន្ធថ្មីនេះ សាធារណជនអាចធ្វើការជ្រើសរើសធ្វើតេស្ត IELTS តាមប្រព័ន្ធកុំព្យូទ័រ (Computer-delivered IELTS)។ តេស្ត IELTS តាមប្រព័ន្ធកុំព្យូទ័រនេះ ត្រូវបានគេរំពឹងទុកថានឹងក្លាយជាជម្រើសតេស្តងាយស្រួលដែល ធ្វើឲ្យតម្រូវការតេស្តIELTS កើនឡើងជុំវិញពិភពលោក ក៏ដូចជាធ្វើឲ្យបេក្ខជនប្រឡង មានសមត្ថភាពប្រើប្រាស់បចេ្ចកវិទ្យាដែលកំពុងរីកចម្រើន។ ក្នុងនាមជាមជ្ឈមណ្ឌលតេស្តអន្តរជាតិ IELTS តែមួយគត់នៅកម្ពុជា ស្ថាប័នអប់រំ IDP មានក្តីរំភើបរីករាយ ដែលអាចផ្តល់បទពិសោធន៍ថ្មីនេះ ដល់សាធារណជននៅក្នុងប្រទេសកម្ពុជាដែលមានបំណងប្រឡងតេស្ត IELTS សម្រាប់ការសិក្សា ការងារ និងចំណាកស្រុក។
នៅប្រទេសកម្ពុជា សិស្ស និស្សិត និងអាណាព្យាបាលអាចស្វែងរកការិយាល័យផ្តល់ព័ត៌មាន ទៅសិក្សានៅបរទេស របស់ស្ថាប័ន IDP នៅគ្រប់សាខានៃមជ្ឈមណ្ឌលអូស្រ្តាលីសម្រាប់ការបណ្តុះបណ្តាល ដែលហៅកាត់ថា ACE នៅទីក្រុងភ្នំពេញ និងខេត្តសៀមរាប ដើម្បីទទួលបានការប្រឹក្សាដោយឥតគិតថ្លៃ៕ ដោយ៖កូឡាប
លេខទូរស័ព្ទទំនាក់
ទំនង៖ 023 222 325
គេហទំព័រហ្វេសបុក៖ https://www.facebook.com/cambodia.idp/
វេបសាយ៖ https://www.idp.com/cambodia/