ខេត្តស្វាយរៀង៖ លោក តែម ម៉ឺន សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារចុះជួយឃុំមេសថ្ងក ស្រុកចន្ទ្រា និងលោក យិត ស៊ុនណារ៉ា អនុប្រធានគណៈកម្មាធិការកណ្តាល ចុះជួយស្រុកចន្ទ្រា និងក្រុងបាវិត និងជាប្រធានកិត្តិយស ចុះជួយឃុំមេសថ្ងក បានប្រគេនជូនវត្តចំនួន៣ ព្រមទាំងក្រុមការងារជាច្រើនរូបទៀត បាននាំទៀនវស្សា និងទេយ្យទាន គ្រឿងឧភោគបរិភោគប្រគេន ជូនដល់វត្តចំនួន៣ ក្នុងស្រុកចន្ទ្រា កាលពីព្រឹកថ្ងៃទី១២ ខែកក្កដា ឆ្នាំ២០១៩ នៅក្នុងវត្តចំបក់ធំ ស្ថិតក្នុងឃុំមេសថ្ងក ស្រុកចន្ទ្រា ខេត្តស្វាយរៀង។
ក្នុងឱកាសនោះដែរ លោក យិត ស៊ុនណារ៉ា បានមានប្រសាសន៍លើកឡើងថា៖ វិស័យព្រះពុទ្ធសាសនា បច្ចុប្បន្ននេះ មានការរីកចម្រើន គួឱ្យកត់សម្គាល់ ដើម្បីរួមចំណែក ក្នុងវិស័យពុទ្ធសាសនា ជាមួយរាជរដ្ឋាភិបាល រូបលោកព្រមទាំងក្រុមការងារ ជារៀងរាល់ឆ្នាំ តែងតែនាំទេយ្យវត្ថុ និងទៀនវស្សា ប្រគេនជូនព្រះសង្ឃ ដែលកំពុងគង់ចាំព្រះវង្សាក្នុងវត្តចំនួន៣ដែលមាន វត្តចំបក់ធំ វត្តសារាយ វត្តមេសថ្ងក នៅក្នុងឃុំមេសថ្ង ស្រុកចន្ទ្រា ដែលស្រប ទៅតាមជំនឿប្រពៃណី របស់ប្រជាជនខ្មែរ ដែលជាអ្នកកាន់ព្រះពុទ្ធសាសនា តាំងពីដើមរៀងមក។
លោកបានបន្តទៀតថា៖ សន្តិភាពដែលទទួលបានមកនេះ គឺមានតែគណបក្សប្រជាជនកម្ពុជា ដែលមានសម្តេចតេជោ ហ៊ុន សែន បានអភិវឌ្ឍន៍ប្រទេសជាតិពីបាតដៃទទេ ដោយចាប់ផ្តើមកសាង និងជំរុញការអភិវឌ្ឍឱ្យមានការរីកចម្រើន ដោយមិនដែលភូតភរកុហក ដូចអ្នកនយោបាយប្រថុយប្រថានមួយចំនួននោះឡើយ ។
លោក យិត ស៊ុនណារ៉ា បានជំរុញឲ្យអាជ្ញាធរក្នុងមូលដ្ឋាន ត្រូវធ្វើយ៉ាងណាការពារសុខសុវត្ថិភាព ជូនប្រពលរដ្ឋត្រូវការពារឲ្យបានល្អប្រសើរ ហើយប្រជាពលរដ្ឋត្រូវចេះការពារខ្លួន កុំឲ្យមូសខ្លាញីខាំតាមរយៈ ការដេកក្នុងមុង (ទាំងថ្ងៃយប់) ស្លៀកពាក់ខោអាវវែង មិនត្រូវអង្គុយ ឬសម្រាកនៅកន្លែងដែលមិនមានពន្លឺគ្រប់គ្រាន់នោះទេ ហើយបើសង្ស័យថាកូនចៅមានកើតជំងឺគ្រុនឈាម ត្រូវរួសរាន់ស្វែងរក សេវាថែទាំសុខភាព ដែលនៅជិតអ្នកបំផុត ដូចជា មណ្ឌលសុខភាព និងមន្ទីរពេទ្យ ក្នុងករណីក្រុមគ្រួសារណាម្នាក់ របស់អ្នកមានសញ្ញា ឬសញ្ញណជំងឺ ដូចជាក្ដៅខ្លួន (ក្ដៅខ្លួនខ្លាំងភ្លាមៗ ៣៩ អង្សាសេឡើង) និងសញ្ញាបន្ទាប់បន្សុំផ្សេងទៀត ដូចជា មុខក្រហម ឈឺក្បាល ឈឺក្រោមក្រឡង់ភ្នែក ឈឺសាច់ដុំ ឬសន្លាក់ ឈឺខ្លួន ស្នាមកន្ទួលក្រហមជាដើម ។
ទៀនវស្សានិងទេយ្យវត្ថុ ប្រគេនដល់ព្រះសង្ឃ គង់ចាំព្រះវស្សា៣វត្ត ក្នុងស្រុកចន្ទ្រា ទទួលបានក្នុងមួយវត្តអង្ករ២០០គីឡូក្រាម និងគ្រឿងឧបភោគបរិភោគមួយចំនួន និងថវិកា២សែនរៀល តាជីយាយជី ប្រជាពលរដ្ឋ ទទួលបានថវិកាមួយចំនួនផងដែរ៕ ដោយ៖ វ៉ៃកូ
