ភ្នំពេញ ៖ អធិការដ្ឋាននគរបាលខណ្ឌសែនសុខ បានឲ្យដឹងថា នៅថ្ងៃទី១២ កក្កដា ២០១៩ វេលាម៉ោង២៣ និង៣០នាទី ប៉ុស្តិ៍រដ្ឋបាលឃ្មួញ បានធ្វើការឃាត់ខ្លួនជនសង្ស័យម្នាក់ ករណីហឹង្សាដោយចេតនា យកកូនកាំបិតចាក់បណ្តាលឲ្យរបួសគូរទំនាស់ ក្នុងពេលផឹកស៊ី នៅចំណុចផ្ទះលេខ១៤ ផ្លូវ១០៦ ភូមិត្រពាំងរាំងថ្មី សង្កាត់ឃ្មួញ ខណ្ឌសែនសុខ ។
ជនសង្ស័យ ឈ្មោះ សយ ឆាយ ភេទប្រុស អាយុ៣៨ឆ្នាំ ជនជាតិខ្មែរ មុខរបរលក់ដូរ ស្នាក់នៅផ្ទះលេខ១៤ ផ្លូវ១០៦ ភូមិត្រពាំងរាំងថ្មី សង្កាត់ឃ្មួញ ខណ្ឌសែនសុខ។ ចំណែកជនរងគ្រោះឈ្មោះ ស្រស់ ស៊ីណាត ភេទប្រុស អាយុ១៩ឆ្នាំ ជនជាតិខ្មែរ មុខរបរជាងថតរូប ស្នាក់នៅផ្ទះលេខ៤៩ ផ្លូវ១០៤ ភូមិត្រពាំងរាំងថ្មី សង្កាត់ឃ្មួញ ខណ្ឌសែនសុខ មានរបួសលើចង្កេះឆ្វេង ។ សម្ភារៈបន្សល់ទុក ដែលសមត្ថកិច្ចធ្វើការដកហូត គឺ កូនកាំបិតរុញដងជ័យ ១ដើម ។
នគរបាលខណ្ឌសែនសុខ បានរៀបរាប់ពីដំណើររឿងនេះថា មុនពេលកើតហេតុ ជនរងគ្រោះ និងជនសង្ស័យ កំពុងអង្គុយផឹកស្រាជាមួយគ្នា នៅចំណុចកើតហេតុ ក៏មានទំនាស់ពាក្យសម្តីគ្នា ជនសង្ស័យបានយកកូនកាំបិតចុងស្រួច ចាក់ជនរងគ្រោះ ត្រូវចំចង្កេះខាងឆ្វេងបណ្តាលឲ្យជនរងគ្រោះត្រូវរបួស រួចជនរងគ្រោះបានទៅពេទ្យ ។ បន្ទាប់មកសមត្ថកិច្ចយើងបានទទួលព័ត៌មាន និងបានចុះដល់ចំណុចកើតហេតុ នាំខ្លួនជនសង្ស័យ យកមធ្វើការសាកសួរនៅអធិការដ្ឋាននគរបាលខណ្ឌសែនសុខ ។
បច្ចុប្បន្នជនសង្ស័យកំពុងឃាត់ខ្លួន នៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី ៕ ដោយ៖កូឡាប