ប្រទេសចិន នៅថ្ងៃសុក្រម្សិលមិញនេះ បានថ្លែងថាខ្លួននឹងធ្វើការដាក់ទណ្ឌកម្មទៅលើក្រុមហ៊ុនអាមេរិចដែលជាប់ពាក់ព័ន្ធនឹងការលក់អាវុធ តម្លៃ ២,២ពាន់លានដុល្លាទៅអោយតៃវ៉ាន់។
“ការលក់អាវុធរបស់អាមេរិចទៅអោយតៃវ៉ាន់គឺរំលោភយ៉ាងធ្ងន់ធ្ងន់លើបទដ្ឋាននៃច្បាប់អន្តរជាតិ និងទំនាក់ទំនងអន្តរជាតិ”។ នេះបើតាមការថ្លែងរបស់អ្នកនាំពាក្យក្រសួងការបរទេសចិនឈ្មោះ Geng Shuang នៅក្នុងសេចក្តីប្រកាសអនឡាញ។
លោកបន្តទៀតថា “ដើម្បីការពារផលិប្រយោជន៍ជាតិ ចិននឹងធ្វើការដាក់ទណ្ឌកម្មលើក្រុមហ៊ុនអាមេរិចដែលបានចូលរួមក្នុងការលក់អាវុធទៅឲ្យតៃវ៉ាន់”។
គម្រោងលក់អាវុធទៅឲ្យតៃវ៉ាន់ កើតឡើងខណៈពេល ដែលទំនាក់ទំនងរវាងអាមេរិច និងចិនកំពុងល្អកកករដោយសារបញ្ហាសង្គ្រាមពាណិជ្ជកម្ម។
សូមបញ្ជាក់ថា ចិនតែងតែចាប់ទុកកោះតៃវ៉ាន់គឺជាផ្នែកមួយនៃទឹកដីរបស់ខ្លួន ហើយរំពឹងថានឹងធ្វើការរួបរួមគ្នាវិញនៅថ្ងៃណាមួយ។ ចិនតែងព្រមានតៃវ៉ាន់ថា បើហ៊ានប្រកាសឯករាជ្យ ចិននឹងប្រើប្រាស់កម្លាំងទ័ពដើម្បីវាយយកតៃវ៉ាន់មកគ្រប់គ្រងវិញ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia