រាជធានីភ្នំពេញ៖ ប្រភពពីប្រជាពលរដ្ឋ បានឲ្យដឹងថា ជារៀងរាល់ថ្ងៃនេះ មានរថយន្តតូចធំដឹកឈើប្រណិតៗ ជាប្រភេទរួមមាន៖ ឈើធ្នង់ សុក្រម និងរាជកុលហៅម្រេញជាដើម ដោតដឹកចេញចូលដីឡូត៌មួយកន្លែងបាំងដោយរបងថ្ម និងសង្ក័សីខ្ពស់ៗ។
ប្រភពព័ត៌មានបន្តថា ទីតាំងឃ្លាំងស្តុកឈើខាងលើ ពីមុនជ្រកក្រោមស្លាកទិញអេតចាយ តែក្រោយប្ដូរឈ្មោះទៅជា «ដេប៉ូឃុំវ៉ីឡង់» ដែលសរសេរជាប់នឹងទ្វាចេញចូល ស្ថិតនៅភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
ប្រជាពលរដ្ឋអះអាងបន្តថា សកម្មភាពដឹកឈើប្រណិតមើម ចេញចូលក្នុងឃ្លាំងនេះ បានកើតឡើងជាយូរឆ្នាំមកហើយដោយក្រុមឈ្មួញភាគច្រើនដឹកចេញមកពីខេត្តពោធិ៍សាត់ និងខេត្តកំពង់ស្ពឺ ហើយដឹកឆ្លងកាត់មុខគោលដៅមន្ត្រីបរិស្ថាន រដ្ឋបាលព្រៃឈើ និងសមត្ថកិច្ចជាច្រើនកនស្ថាប័ន បានយ៉ាងរលូនទើបមកដល់គោលដៅខាងលើ។
ប្រភពបញ្ជាក់ទៀតថា ឃ្លាំងស្តុកឈើខាងលើនេះ អាជ្ញាធរសង្កាត់ និងមន្ត្រីជំនាញរដ្ឋបាលព្រៃឈើ ក៏បានដឹងដែរ តែអ្នកទាំងនោះគ្មានចំណាត់ការនៅឡើយ។
ទាក់ទងបញ្ហានេះ លោក គាំ សីហា នាយខណ្ឌរដ្ឋបាលព្រៃឈើភ្នំពេញ មិនទាន់អាចសុំការបញ្ជាក់បានទេតាមទូរស័ព្ទ។ ខណៈម្ចាស់ឃ្លាំងស្តុកឈើខាងលើឈ្មោះ គង់ ក៏មិនអាចទាក់ទងបានតាមទូរស័ព្ទ នៅថ្ងៃសៅរ៍ ទី១៣ ខែកក្កដា ឆ្នាំ២០១៩នេះ។
ចំណែក លោក សេង គុណ អភិបាលរងខណ្ឌកំបូល កាលពីដើមសប្ដាហ៍កន្លងទៅបានឲ្យប្រព័ន្ធផ្សព្វផ្សាយដឹងថា រូបលោក នឹងដឹកនាំមន្ត្រីចុះស្រាវជ្រាវរឿងនេះ នៅពេលស្បើយពីការងារបន្តិច។
យ៉ាងនេះក្ដី រហូតមកដល់ពេលនេះអាជ្ញាធរ និងជំនាញរដ្ឋបាលព្រៃឈើភ្នំពេញ នៅមិនទាន់មានចំណាត់ការនៅឡើយទេ ទៅលើឃ្លាំងស្តុកឈើដ៏ធំ នៅខណ្ឌកំបូល រាជធានីភ្នំពេញ គិតមកដល់ថ្ងៃទី១៣ ខែកក្កដា ឆ្នាំ២០១៩ នេះ៕ ដោយ៖ ដែន សីមា
