ខេត្តស្វាយរៀង៖ ពិតគួរឲ្យអាណិតលោកយាយចាស់ជរាម្នាក់ រស់នៅជាមួយចៅពីរនាក់តូចៗ ត្រូវបានអគ្គិភ័យលេបត្របាក់ផ្ទះខ្ទមកម្សត់គ្មានសល់ ខណៈដែលគាត់មិននៅផ្ទះ កាលពីវេលាម៉ោង៥និង១០នាទី ថ្ងៃទី១៣ ខែកក្កដា ឆ្នាំ២០១៩ នៅភូមិត្រពាំងពោន ឃុំធ្មា ស្រុករំដួល ខេត្តស្វាយរៀង។
បើតាមលោកស្រី ពេជ្រ ស្រីមុំ ជំទប់ទី១ ឃុំធ្មា បានប្រាប់ឲ្យដឹងថា មានករណីភ្លើងឆេះផ្ទះ លោកយាយ សំ សាំ អាយុ៧៩ឆ្នាំ រស់នៅជាមួយចៅតូចពីរនាក់រស់នៅភូមិ ឃុំខាងលើ ហើយផ្ទះរបស់គាត់ មានទំហំ ៤ម៉ែត្រគុណនឹង៥ម៉ែត្រ ជញ្ជាំងស្លឹក ដំបូលប្រក់ស័ង្កសី ត្រូវភ្លើងឆេះខូចខាតទាំងស្រុង សម្ភារៈខូចខាតរួមមាន កន្ទេល មុង ភួយ ខ្នើយ អង្ករចំនួន១ធុងប៉េត្រូ គ្រែធំមួយ ធុងប៉េត្រូចំនួន៣ និងសម្ភារមួយចំនួនទៀត បានឆេះអស់ទាំងស្រុងដោយមូលហេតុ ដុតធូបនិង ដុតចង្កៀងទុកចោល។
ទោះបីយ៉ាងណា តាមរយៈលោកស្រីពេជ្រ ស្រីមុំ ដែលមានវ័យ៣២ឆ្នាំ ជាក្រុមប្រឹក្សាឃុំធ្មា មានតំណែងជាជំទប់ទី១ ហើយត្រូវបានពលរដ្ឋក្នុងឃុំ គោរពស្រឡាញ់គាត់ស្ទើរតែគ្រប់គ្នា លោកស្រីបានចុះទៅផ្ទាល់ដល់កន្លែងកើតហេតុតែម្តង បានសម្តែងការសោកស្តាយជាពន់ពេក ដែលលោកយាយមានជីវភាពក្រីក្រខ្លាំង រស់នៅជាមួយចៅពីរនាក់ទៀត សូមអំពាវនាវដល់សប្បុរសជន ក្នុងនិងក្រៅប្រទេស សូមមេត្តាជួយដល់លោកយាយផង នាគ្រាដែលគាត់ជួបទុក្ខធំ បាត់បង់ផ្ទះដែលកំពុងរស់នៅសព្វថ្ងៃ៕ ដោយ៖ វ៉ៃកូ
