ក្រុមហ៊ុនបច្ចេកវិទ្យាយក្សចិន Huawei ដែលកំពុងស្ថិតក្នុងបញ្ជីខ្មៅរបស់អាមេរិច គ្រោងធ្វើការកាត់បន្ថយការងារយ៉ាងច្រើន នៅរោងចក្ររបស់ខ្លួននៅអាមេរិច។ នេះបើតាមការចេញផ្សាយរបស់ទស្សនាវដ្តី Wall Street នៅថ្ងៃអាទិត្យម្សិលមិញនេះ។
ការកាត់បន្ថតការងារដ៏ច្រើនត្រូវគេរំពឹងថា នឹងកើតមាននៅវិទ្យាស្ថានស្រាវជ្រាវ Futurewei Technologies ដែលមានមូលដ្ឋាននៅអាមេរិច។
បច្ចុប្បន្នវិទ្យាស្ថាននេះមានបុគ្គលិកចំនួន ៨៥០នាក់នៅគ្រប់កន្លែងពិសោធន៍នៅអាមេរិច ប៉ុន្តែការងារជាច្រើនរយកន្លែង អាចនឹងត្រូវកាត់បន្ថយ។
សូមបញ្ជាក់ថា បច្ចុប្បន្នក្រុមហ៊ុន Huawei កំពុងរងទណ្ឌកម្មរបស់អាមេរិច ហើយក្រុមហ៊ុនអាមេរិចទាំងអស់ មិនត្រូវបានអនុញ្ញាតឲ្យធ្វើជំនួញ ជាមួយនឹងក្រុមហ៊ុនចិនខាងលើឡើយ។
រដ្ឋបាលរបស់លោក ដូណាល់ ត្រាំ ក៏បានព្យាយាមបញ្ចុះបញ្ចូលសម្ព័ន្ធមិត្តរបស់ខ្លួន មិនឲ្យទទួលយកបច្ចេកវិទ្យារបស់ Huawei ឡើយដោយអាមេរិចលើកឡើងថា រដ្ឋាភិបាលចិនអាចនឹងប្រើប្រាស់ឧបករណ៍ទាំងនោះ ដើម្បីធ្វើចារកម្ម។
កាលពីសប្តាហ៍មុន ប្រទេសមូណាកូ បានក្លាយទៅជាប្រទេសទី ១ ក្នុងអឺរ៉ុប ដែលបានបង្ហាញបច្ចេកវិទ្យា G5 របស់ក្រុមហ៊ុន Huawei៕ អត្ថបទប្រែសម្រួលដោយ ៖ សុភ័ក្រ / ប្រភព៖ Channelnewsasia