ភ្នំពេញ៖ មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានឲ្យដឹងថា លទ្ធផលកិច្ចប្រតិបត្តិការបង្រ្កាបគ្រឿងញៀន គឺសមត្ថកិច្ចនគរបាលជាតិទូទាំងប្រទេស ៖ ឆមាសទី១ ដើមឆ្នាំ២០១៩ បង្រ្កាបបានលទ្ធផល បង្ក្រាបសរុបរួម ៣៦៧៦ ករណី ឃាត់ខ្លួន ៧៦៦៤នាក់(ស្រី៥៤៥) ក្នុងនោះជនបរទេស ១៦៧នាក់(ស្រី៣៥) រឹបអូសគ្រឿងញៀន ទម្ងន់សរុប ៣១២, ៣៧ គីឡូក្រាម និង កាប់បំផ្លាញដំណាំ កញ្ឆា ចំនួន ១៨ លើក ស្មើ ៤១.៤៣៥ ដើម ។
នៅថ្ងៃទី ១៥ ខែកក្កដា ឆ្នាំ២០១៩ នេះ មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានប្រជុំបូកសរុបលទ្ធផលកិច្ចប្រតិបត្ដិការប្រឆាំងបទល្មើសគ្រឿងញៀន ឆមាសទី១ ឆ្នាំ២០១៩ និងទិសដៅការងារ ឆមាសទី២ ឆ្នាំ២០១៩ ក្រោមអបធីភាព លោក នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលផែនប្រឆាំងគ្រឿងញៀន។
ក្នុងកិច្ចប្រជុំនេះ បានវាយតម្លៃសភាពការណ៍គ្រឿងញៀន និងបូកសរុបលទ្ធផលកិច្ចប្រតិបត្តិការ ឆមាសទី១ ឆ្នាំ២០១៩ និងដាក់ចេញទិសដៅការងារបន្ត ឆមាសទី២ ឆ្នាំ២០១៩ គឺសភាពការណ៍គ្រឿងញៀនសកលលោក៖ ក្នុងឆមាសទី១ ដើមឆ្នាំ២០១៩ ផ្អែកតាមកិច្ចប្រជុំរបស់បណ្តាប្រទេស ក្នុងអនុតំបន់ តំបន់ និងអន្តរជាតិ បណ្តាប្រទេសនានានៅតែបន្តទទួលរងឥទ្ធិពលនៃការផលិត ការចរាចរគ្រឿងញៀន ពីតំបន់មួយទៅតំបន់មួយ មានដូចជា៖ តំបន់អាមេរិកខាងត្បូង តំបន់អាហ្វ្រិក តំបន់អឌ្ឍចន្ទមាស និងត្រីកោណមាស ពុំទាន់មានសញ្ញាថមថយនៅឡើយ។ ជាមួយនឹងស្ថានភាពនេះ ពិភពលោក ក៏នៅតែប្រឈមជាមួយ នឹងកំណើននៃអ្នកប្រើប្រាស់គ្រឿងញៀនប្រភេទថ្មី (NPS) ដែលមានឥទ្ធិពល លើប្រព័ន្ធ សរសៃប្រសាទ។
កិច្ចប្រជុំនេះ ក៏បានលើកឡើងពីសភាពការណ៍គ្រឿងញៀនខុសច្បាប់ពាក់ព័ន្ធកម្ពុជា គឺកម្ពុជានៅតែរងគ្រោះ ដោយសារការដឹកជញ្ជូនគ្រឿងញៀនឆ្លងកាត់ ពួកឧក្រិដ្ឋជនគ្រឿងញៀន ជនបរទេស បានឃុបឃិតគ្នា ជាមួយពួកឧក្រិដ្ឋជនក្នុងស្រុក រួមនឹងពួកឧក្រិដ្ឋជននៅគោលដៅ ចុងក្រោយ បានលបលួចធ្វើសកម្មភាព ដឹកជញ្ជូន-ជួញដូរគ្រឿងញៀនដោយខុសច្បាប់ឆ្លងកាត់កម្ពុជា ការចរាចរគ្រឿងញៀនឆ្លងកាត់កម្ពុជា តាមបណ្តាច្រកសំខាន់ដូចខាងក្រោម ៖ ផ្លូវគោក៖ មកពីតំបន់ត្រីកោណមាស ឆ្លងកាត់ប្រទេស ឡាវ ចូលមកកម្ពុជា តាមច្រក ព្រំដែនភាគ ឦសានប្រទេស រួមមាន គ្រឿងញៀនប្រភេទមេតំហ្វេតាមីន ហេរ៉ូអ៊ីន និងកេតាមីន រួចបន្តនាំចេញទៅប្រទេស វៀតណាម ថៃ និងបណ្តាប្រទេសមួយចំនួន នៅក្នុងតំបន់។ ផ្លូវអាកាស៖ មកពីតំបន់អាមេរិកខាងត្បូង និង តំបន់អាហ្វ្រិក ចូលតាមច្រកព្រលាន យន្តហោះអន្តរជាតិ (ភាគច្រើនគ្រឿងញៀនប្រភេទកូកាអ៊ីន) រួចបន្តនាំចេញទៅ ប្រទេសថៃ ។ កញ្ចប់បញ្ញើប្រៃសណីយ៍៖ មកពីតំបន់អឺរ៉ុប ចូលមកកម្ពុជា (ភាគច្រើនគ្រឿងញៀន ប្រភេទ អ៊ិចស្តាស៊ី “MDMA”) រួចបន្តនាំចេញទៅប្រទេសថៃ និងវៀតណាម។ ផ្លូវទឹក៖ នាំចូលតាមច្រកកំពង់ផែ ហើយបន្តទៅបណ្តាប្រទេសនៅក្នុងតំបន់ ។
បើតាមរបាយការណ៍នៃអង្គប្រជុំ បានបង្ហាញពីលទ្ធផលកិច្ចប្រតិបត្តិការបង្រ្កាបគ្រឿងញៀន គឺសមត្ថកិច្ចនគរបាលជាតិទូទាំងប្រទេស៖ ឆមាសទី១ ដើមឆ្នាំ២០១៩ បង្រ្កាបបានលទ្ធផល បង្ក្រាបសរុបរួម ៣៦៧៦ ករណី ឃាត់ខ្លួន ៧៦៦៤នាក់(ស្រី៥៤៥) ក្នុងនោះជនបរទេស ១៦៧នាក់(ស្រី៣៥) រួមមានករណី ជួញដូរ រក្សាទុក ២១២២ ករណី ឃាត់ខ្លួន ៣៨១៤នាក់(ស្រី៣២៧) កែច្នៃ ១ ករណី (ចាប់តាមដីកា ស្រី១នាក់) ដាំដុះ ១៨ ករណី ឃាត់ខ្លួន ៤ នាក់ ប្រើប្រាស់ ១៥៣៥ ករណី ឃាត់ខ្លួន ៣៨៤៦ នាក់(ស្រី២១៨)។ ចាប់តាមដីកា ១៣២ដីកា ឃាត់ខ្លួន ១៣០នាក់ (ស្រី៦នាក់) រឹបអូសគ្រឿងញៀន ទម្ងន់សរុបៈ ៣១២, ៣៧ គីឡូក្រាម និង កាប់បំផ្លាញដំណាំ កញ្ឆា ចំនួន ១៨ លើក ស្មើ ៤១.៤៣៥ ដើម ។
កម្លាំងជំនាញ មន្ទីរប្រឆាំងគ្រឿងញៀន នៅឆមាសទី១ ដើមឆ្នាំ២០១៩ បង្រ្កាបបទល្មើសគ្រឿងញៀនទទួលបាន លទ្ធផលដូចខាងក្រោម៖
បង្ក្រាបសរុបរួម ៦៨៦ ករណី ឃាត់ខ្លួន ១២៤៣ នាក់(ស្រី១៣៣) ក្នុងនោះជនបរទេស ៥៧ នាក់(ស្រី ២១) ប្រភេទបទល្មើសរួមមាន ៖
ជួញដូរ រក្សាទុក ៣៨៨ ករណី ឃាត់ខ្លួន ៥៧០ នាក់(ស្រី ៧៧) កែច្នៃ ១ ករណី (ចាប់តាមដីកា ស្រី១នាក់) ប្រើប្រាស់ ២៩៧ ករណី ឃាត់ខ្លួន ៦៧៣ នាក់(ស្រី ៥៦)។ ចាប់តាមដីកា ៣ ដីកា ឃាត់ខ្លួន ៣ នាក់ (ស្រី១នាក់) រឹបអូសគ្រឿងញៀន ទម្ងន់សរុបៈ ២០២ ,៦៣ គីឡូក្រាម ៕ដោយ៖កូឡាប