តាកែវ៖ លោក អ៊ឹម កុច រដ្ឋលេខាធិការក្រសួងអប់រំយុវជននិងកីឡា បានមានប្រសាសន៍ ដោយជំរុញឲ្យលោកគ្រូអ្នកគ្រូបង្ហាត់បង្ហាញឲ្យកូនសិស្សចេះអនុវត្តន៍ច្រើនលើការងារនៅជុំវិញមជ្ឈដ្ឋានរបស់ខ្លួន ពីព្រោះភាពជោគជ័យរបស់មនុស្សគឺ ពឹងផ្អែកលើការសិក្សា និងការអនុវត្តន៍ផ្ទាល់ ដែលមិនអាចខ្វះមួយណាបានឡើយ ដូច្នេះសិស្សានុសិស្សទាំងអស់ទទ្ទឹមនឹងខ្លួនមានចំណេះវិជ្ជា ក៏ត្រូវតែមានការអនុវត្តជាក់ស្តែងលើការងារជាច្រើនផងដែរ ទើបអាចឈានទៅរកភាពជោគជ័យបាន ។
ថ្លែងបែបនេះក្នុងពេលដែលលោករដ្ឋលេខាធិការក្រសួងអប់រំយុវជននិងកីឡា រួមជាមួយលោក មូល វិចិត្រ អភិបាលរងខេត្តតាកែវ និងលោកស្រី ឃើរី អាក់ហ្គី នាយិកាអង្គការស៊ីអារអែស ប្រចាំអនុតំបន់មេគង្គ ចូលរួមក្នុងចែកសម្លៀកបំពាក់ដល់សិស្សានុសិស្សនៃសាលាបឋមសិក្សាអង្គរុន ឋិតនៅឃុំគូស ស្រុកត្រាំកក់ ខេត្តតាកែវ នាព្រឹកថ្ងៃទី ១៥ ខែកក្កដា ឆ្នាំ២០១៩នេះ ។
លោកអ៊ឹម កុច បានសម្តែងនូវការកោតសរសើរ ចំពោះ អង្គការស៊ីអារអែស CRS ដែលបានយកចិត្តទុកដាក់ និងចូលរួមជាមួយវិស័យអប់រំ សំដៅលើកកម្ពស់ការអប់រំ ជំរុញការចូលរៀនប្រកបដោយ សមធម៌ និងបរិយាបន្ន។ ចំពោះគម្រោងចែកសម្លៀកបំពាក់ និងស្បែកជើងដល់សិស្សានុសិស្សនៅក្នុងថ្ងៃនេះ ពិតជាការរួមចំណែកជំរុញដល់ការចូលរៀន ឱ្យបានទៀងទាត់ កាត់បន្ថយអត្រា បោះបង់ចោលការសិក្សា ។
លោក មូល វិចិត្រ អភិបាលរងខេត្តតាកែវ បានលើកឡើងថា ក្នុងកាចែកសម្លៀកបំពាក់ដល់សិស្សក្នុងថ្ងៃនេះជាគម្រោងដំណាក់កាលទី៤ ចាប់ដែលផ្តើមនៅ ឆ្នាំ២០១៩នេះ ដោយបានពង្រីកទៅលើការអនុវត្ត អប់រំកុមារតូចចំនួន៧សាលា នៅស្រុកសំរោង និងចំនួន៥សាលានៅក្នុងស្រុកត្រាំកក់ ដែលអង្គការ ស៊ីអារអែស បានផ្តល់នូវសម្លៀកបំពាក់ សម្ភារៈ និងឧបករណ៍ជំនួយដល់កុមារពិការ លទ្ធផលនេះការខិតខំប្រឹងប្រែងយកចិត្តទុកដាក់ និងមានស្មារតីទទួលខុសត្រូវខ្ពស់ របស់អ្នកពាក់ព័ន្ធគ្រប់លំដាប់ថ្នាក់ក្នុងការចូលរួមអនុវត្តន៍គម្រោងរបស់អង្គការស៊ីអារអែស ដើម្បីរួមចំណែកលើកកម្ពស់វិស័យអប់រំក្នុងខេត្តរបស់យើងឱ្យកាន់តែមានការរីកចម្រើន ។
បើតាមរបាយការណ៍បស់អង្គការ CRS ដែលអានដោយលោកស្រី ឃើរី អាក់ហ្គី នាយិកាអង្គការស៊ីអារអែស ប្រចាំអនុតំបន់មេគង្គ បានឲ្យដឹងថា គម្រោងផ្តល់សម្លៀកបំពាក់ និង ស្បែកជើងឱ្យសិស្សនេះ គឺបានចាប់ផ្តើមតាំង ២០១២ មកម្លេះ ហើយនិងត្រូវបញ្ចប់នៅក្នុងឆ្នាំ២០១៩នេះ ដោយបានផ្តល់ឱ្យសាលាគោលដៅចំនួន ៥២ នៅក្នុងស្រុកគោលដៅចំនួន ១០ ក្នុងខេត្តតាកែវ និងខេត្តកំពត។ ចំពោះគម្រោងនេះដែរ គឺអង្គការមានគោលបំណង រួមចំណែកជំរុញដល់ការចូលរៀនរបស់សិស្ស ឱ្យបានទៀងទាត់ កាត់បន្ថយអត្រា បោះបង់ការសិក្សាចោល ។ សូមបញ្ជាក់ថា ចាប់ពីឆ្នាំ២០១២-២០១៩ អង្គការស៊ីអារអែស បានផ្តល់សម្លៀកបំពាក់សិស្ស សរុបចំនួន ២៦៥៣១ នាក់ ស្រី ១២៣៤៧ នាក់ ជាក់ស្តែង សម្រាប់ឆ្នាំសិក្សា ២០១៨-២០១៩ នេះ អង្គការស៊ីអារអែស ក៏បានផ្តល់សម្លៀកបំពាក់ដល់សិស្ស សរុបចំនួន ៤៩០២នាក់ ស្រីចំនួន ២៣៩២ នាក់៕ ដោយ៖ តាកែវ
