ខេត្តស្វាយរៀង៖ នាយឧត្តមសេនីយ៍ម៉ឹង សំផន រដ្ឋលេខាធិការក្រសួងការពារជាតិ និងជាប្រធានក្រុមការងារចុះជួយស្រុកចន្ទ្រា និងក្រុងបាវិតនាព្រឹកថ្ងៃទី១៥ ខែកក្កដា ឆ្នាំ២០១៩នេះ បានថ្លែងទៅកាន់លោក គ្រូ អ្នកគ្រូនិង សិស្សានុសិស្សជាង២ពាន់នាក់ បានលើកឡើងថា ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោហ៊ុន សែនជានាយករដ្ឋមន្ត្រី ប្រទេសកម្ពុជាទាំងមូល មានសុខសន្តិភាព និងការអភិវឌ្ឍ លើគ្រប់វិស័យទាំងវិស័យពុទ្ធចក្រ និងអាណាចក្រ ជាពិសេសគ្មានជំនាន់ណាមួយ ដែលមានសុខសន្តិភាព និងអភិវឌ្ឍយូរអង្វែង ដូចសម័យតេជោនេះទេ ដូច្នេះយើងត្រូវរួមគ្នាថែរក្សាសុខសន្តិភាព ឲ្យស្ថិតស្ថេរជានិរន្តរ៍។
ការថ្លែងលើកឡើងបែបនេះ នៅក្នុងពិធីសម្ពោធដាក់ឲ្យប្រើប្រាស់ អគារសិក្សាមួយខ្នងនៅវិទ្យាល័យជីភូ ដែលអំណោយសប្បុរសជន ស្ថិតក្នុងសង្កាត់ច្រកម្ទេស ក្រុងបាវិត ខេត្តស្វាយរៀង។
លោកនាយឧត្តមសេនីយ៍ បានថ្លែងពាំនាំនូវការសាកសួរសុខពីសំណាក់សម្តេចតេហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់លោកគ្រូ អ្នកគ្រូ សិស្សានុសិស្សទាំងអស់នៅវិទ្យាល័យជីភូនេះផងដែរ។
លោកនាយឧត្តមសេនីយ៍ម៉ឹង សំផន ក៏បានផ្តាំផ្ញើដល់សិស្សានុសិស្សត្រូវឲ្យខិតខំរៀនសូត្រក្រៀបយកចំណេះវិជ្ជាដើម្បីក្លាយខ្លួនជាទំពាំងស្នងឫស្សី នៃប្រទេសជាតិ ហើយសូមចៀសឲ្យឆ្ងាយពីគ្រឿងញៀន ត្រូវនិយាយថាទេ ចំពោះគ្រឿងញៀនមួយវិញទៀត ត្រូវគោរពច្បាប់ចរាចរណ៍ឲ្យបានខ្ជាប់ខ្ជួន បើកបរត្រូវពាក់មួកសុវត្ថិភាព។ សូមបញ្ជាក់ថា នៅក្នុងពិធីនេះ ក៏មានចែកអំណោយដល់លោកគ្រូ អ្នកសិស្សានុសិស្សនិងក្រុមជាងសំណង់ផងដែរ៕ ដោយ៖ វ៉ៃកូ
