ខេត្តព្រះសីហនុ៖ នៅថ្ងៃទី១៥ ខែកក្កដា ឆ្នាំ២០១៩នេះ នាបរិវេណវត្តអូរត្រេះ ក្នុងសង្កាត់លេខ៤ ក្រុងព្រះសីហនុ ថ្នាក់ដឹកនាំមន្ទីរកសិកម្មរុក្ខាប្រមាញ់ និងនេសាទខេត្តព្រះសីហនុ បានរៀបចំដាំកូនឈើចម្រុះរួមមាន៖ កូនគគីរ គ្រញូង និងកូនឈើទាលជាដើម ចំនួន ២.២០០ដើម លើផ្ទៃដីចំនួន ២ហិកតារ ដើម្បីអបអរសាទរបុណ្យរុក្ខទិវាឆ្នាំ២០១៩។
ពិធីនេះប្រព្រឹត្តទៅក្រោមអធិបតីភាព លោក គួច ចំរើន អភិបាលខេត្តព្រះសីហនុ និងមានការចូលរួមពីមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ លោកគ្រូអ្នកគ្រូ និងសិស្សានុសិស្សយ៉ាងច្រើនកុះករ។
នាឱកាសនោះ លោក គួច ចំរើន អភិបាលខេត្តព្រះសីហនុ មានប្រសាសន៍ថា ពិធីបុណ្យរុក្ខទិវាជាតិ ៩កក្កដា គឺជាសកម្មភាពដាំដុះកូនឈើឡើងវិញ និងជាការបំផុស អ្នកពាក់ព័ន្ធឲ្យចូលរួមថែរក្សាការពារព្រៃឈើ សំដៅប្រែក្លាយឲ្យមូលដ្ឋាននីមួយៗ ឲ្យមានភាពស្រស់បំព្រង។
លោកអភិបាលបន្តថា ការអភិវឌ្ឍន៍ធនធានព្រៃឈើ គឺជាមូលដ្ឋានគ្រឹះ នៃការអភិវឌ្ឍន៍សង្គមសេដ្ឋកិច្ចជាតិ ដើម្បីរួមចំណែកលើកកម្ពស់ជីវភាពរស់នៅ របស់ប្រជាពលរដ្ឋ និងកិច្ចការពារបរិស្ថានទប់ស្កាត់ការកើនឡើងកំដៅ នៃភពផែនដី និងភាពរាំងស្ងួត ក៏ដូចជាគ្រោះទឹកជំនន់ជាដើម។
ទន្ទឹមគ្នានេះ លោក គួច ចំរើន អភិបាលខេត្ត ខេត្តព្រះសីហនុ ក៏បានជម្រុញដល់បងប្អូនប្រជាពលរដ្ឋ ក៏ដូចជាវិស័យឯកជន មន្ត្រីរាជការ កងកម្លាំងប្រដាប់អាវុធឲ្យចូលរួមទាំងអស់គ្នា ដើម្បីប្រែក្លាយទៅជាកម្លាំងចលនាមួយ ក្នុងការចូលរួមដាំដើមឈើគ្រប់រូបភាពឲ្យបានច្រើន និងបណ្ដុះនូវផ្នត់គំនិតស្រឡាញ់ព្រៃឈើ ថែរក្សា ការពារព្រៃឈើ ដើម្បីជាប្រយោជន៍របស់ជាតិ និងសម្រាប់ប្រជាពលរដ្ឋទាំងអស់គ្នា៕ ដោយ៖ ដែន សីមា
