ភ្នំពេញ ៖ ទីស្ដីការគណៈរដ្ឋមន្ត្រី បានចេញលិខិតមោឃភាពប័ណ្ណសម្គាល់សិទ្ធិកាន់កាប់អចលនវត្ថុ ចំនួន៥ប័ណ្ណ លិខិតចំនួនផ្សេងទៀត របស់ក្រុមហ៊ុនអាយអិនជី ហូលឌីង (ING Holding) របស់លោក ឧកញ៉ា អ៊ឹ ប៊ុនហូវ នៅបឹងជើងឯក។ ការមោឃភាពនេះ ដោយសារក្រុមហ៊ុន មិនអនុវត្តន៍ការសម្រេច របស់រាជរដ្ឋាភិបាល ពាក់ព័ន្ធនឹងការស្ថាបនា ហេដ្ឋារចនាសម្ព័ន្ធ នៅក្នុងផ្ទៃបឹងជើងឯក ស្ថិតក្នុងខណ្ឌមានជ័យ និង ខណ្ឌដង្កោ រាជធានីភ្នំពេញ និងជាពិសេសយោងតាមចំណារដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ចុះថ្ងៃទី១៦ ខែឧសភា ឆ្នាំ២០១៩ និងយោងលិខិតលេខ៣០៨ ខន/០១៩ សជណ ចុះថ្ងៃទី១៧ ខែឧសភា ឆ្នាំ២០១៩ របស់ខុទ្ទកាល័យសម្តេចអគ្គមហាសេនាបតីតេជោ ហ៊ុន សែន ។
ករណីដីនៅបឹងជើងឯកនេះ ទីស្តីការគណៈរដ្ឋមន្ត្រី បានជម្រាប់ជូនលោកឧបនាយករដ្ឋមន្ត្រី ថា រាជរដ្ឋាភិបាល សម្រេចដូចខាងក្រោម ៖ ១៖ និរាករណ៍លិខិតលេខ១៩៨ សជណ.ផក ចុះថ្ងៃទី១៤ ខែកុម្ភៈ ឆ្នាំ២០១៨ លិខិតលេខ ៨០១ សជណ.ផក ចុះថ្ងៃទី១៧ ខែកក្កដា ឆ្នាំ២០១៨ និងលិខិតលេខ ១១៤៧ សជណ.ឧស ចុះថ្ងៃទី១៨ ខែតុលា ឆ្នាំ២០១៨ របស់ទីស្តីការគណៈរដ្ឋមន្ត្រី។ ២៖ មោឃភាពប័ណ្ណសម្គាល់សិទ្ធិកាន់កាប់អចលនវត្ថុរបស់ក្រុមហ៊ុន អាយអិនជី ហូលឌីង ចំនួន៥ ប័ណ្ណ គឺ ប័ណ្ណលេខភព ៦៨៥៧៨ ភព ៦៨៥៧៩ ភព ៦៨៥៨០ ភព ៦៨៥៨២ និងលេខភព ៦៨៥៨៣ ចុះថ្ងៃទី២១ ខែមីនា ឆ្នាំ២០១៩ ។
កាលពីពេលកន្លងទៅ ក្រុមហ៊ុន ING Holding បានធ្វើកិច្ចសន្យា មួយជាមួយរាជរដ្ឋាភិបាល ដើម្បីកសាងផ្លូវថ្មីឈ្មោះថា មហាវិថីសម្តេចតេជោ ហៅផ្លូវ៦០ម៉ែត្រ ដែលមានទទឹង៦០ម៉ែត្រ និងបណ្តោយប្រវែងជាង ៩គីឡូ ម៉ែត្រ ភ្ជាប់ពីផ្លូវលេខ២៧១ ក្បាលថ្នល់ ឆ្ពោះទៅកាន់ផ្លូវជាតិលេខ ២ ក្នុងសង្កាត់ព្រែកហូរ ក្រុងតាខ្មៅ ខេត្តកណ្តាល។ ក្នុងនោះ ក្រុមហ៊ុនត្រូវដោះស្រាយរាល់ការប៉ះពាល់នានា ដែលពាក់ព័ន្ធនឹងដីជាកម្មសិទ្ធិរស់នៅរបស់ប្រជាជន។ ប៉ុន្តែ ក្រុមហ៊ុន ING Holding មិនបានធ្វើតាមដូចបានសន្យាជាមួយនឹងរាជរដ្ឋាភិបាលឡើយ៕ ដោយ៖បញ្ញាស័ក្តិ
