រញ្ជួយដីនៅបាតសមុទ្រដែលមានរង្វាស់ ៦,១រ៉ិចទ័រ បានវាយប្រហារភាគខាងត្បូងកោះបាលី នៅថ្ងៃអង្គារនេះ បណ្តាលឲ្យប្រជាជន និងអ្នកទេសចរនៅតំបន់នោះ មានការភិតភ័យយ៉ាងខ្លាំង និងបានរត់ចេញពីកន្លែងស្នាក់នៅរបស់ពួកគេ។ នេះបើតាមការបញ្ជាក់របស់ភ្នាក់ងារគ្រប់គ្រងគ្រោះរញ្ជួយដីអឺរ៉ុប EMSC។
រហូតមិនដល់ពេលនេះ មិនមានទាន់របាយការណ៍ភ្លាមៗ ពីការខូចខាត និងការស្លាប់នោះទេ ហើយក៏មិនមានសញ្ញាប្រាប់ការរលកស៊ូណាមិដែរ។
ប្រជាជនម្នាក់ដែលរស់នៅតំបន់រងការវាយប្រហារបានថ្លែងថា មនុស្សម្នានៅក្រុង Denpasar បានរត់ចេញពីអគារស្នាក់នៅរបស់ពួកគេ ទាំងស្លៀកពាក់ខោអាវគេង ក្រោយមានអារម្មណ៍ថារញ្ជួយដី។
ការរញ្ជួយដីនៅកោះបាលីនោះ ក៏អាចមានអារម្មណ៍ថារញ្ជួយដល់ក្បែរកោះជិតខាងផងដែរដូចជាកោះ Lombok និងកោះ Java។ នេះបើតាមការបញ្ជាក់របស់ភ្នាក់ងារភូមិសាស្រ្ត និងឧតុនិយមប្រទេសឥណ្ឌូណេស៊ី។
សូមបញ្ជាក់ថា ប្រទេសឥណ្ឌូណេស៊ីជារឿយៗ រងគ្រោះដោយសារតែការរញ្ជួយដី ហើយពេលខ្លះរងការវាយប្រហារ ដោយរលកស៊ូណាមិ ដោយសារតែប្រទេសនេះ ស្ថិតនៅតំបន់ Pacific Ring of Fire ដែលតំបន់នេះតែងកើតមានការរញ្ជួយដី និងការផ្ទុះភ្នំភ្លើងជាញឹកញាប់៕ អត្ថបទប្រែសម្រួលដោយ៖ សុភ័ក្រ / ប្រភព៖ channelnewsasia