ខេត្តស្វាយរៀង៖ លោកវេជ្ជបណ្ឌិត កែ រដ្ឋា ប្រធានមន្ទីរសុខាភិបាលខេត្តស្វាយរៀង បានមានប្រសាសន៍ឲ្យដឹងថា អត្រាអ្នកឆ្លងជំងឺគ្រុនឈាម មានការថយចុះ ខណៈដែលមន្ទីរ បានបើកយុទ្ធនាការអប់រំផ្សព្វផ្សាយ ស្ដីអំ ពីជំងឺគ្រុនឈាម និងវិធីបង្ការនៅតែបន្តធ្វើយ៉ាងសកម្ម នៅតាមមូលដ្ឋានស្រុក ក្រុង នៃខេត្តស្វាយរៀង ជាពិសេសនៅតំបន់ដែលមានការឆ្លងនូវជំងឺគ្រុនឈាមនេះ។
ការថ្លែងលើកឡើងបែបនេះ នៅពេលដែលលោកដឹកនាំមន្ត្រីសុខាភិបាល បន្តយុទ្ធនាការអប់រំផ្សព្វ ផ្សាយស្តីអំពីជំងឺគ្រុនឈាម និងវិធីបង្ការដល់សិស្សានុសិស្សនៅក្នុងសាលាបឋមសិស្សាម៉ឹង សំផន ស្ថិតក្នុងភូមិថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀង នាព្រឹកថ្ងៃទី១៦ ខែកក្កដា ឆ្នាំ២០១៩ ដែលមានការចូលរួមពីលោក លោកគ្រូអ្នកគ្រូ សិស្សានុសិស្ស ប្រមាណជាង២០០នាក់ផងដែរ។
លោកកែ រដ្ឋា ប្រធានមន្ទីរសុខាភិបាលខេត្តបានបន្តទៀតថា យុទ្ធនាការនេះមន្ទីរសុខាភិបាល អនុវត្តន៍គ្រប់បណ្តាស្រុកក្រុង នៃខេត្តស្វាយរៀង ហើយបានផ្តោតលើចំណុចសំខាន់ៗដូចជា៖ ការផ្សព្វផ្សាយអំពីជំងឺគ្រុនឈាម វិធីបង្ការ ការពារ បំបាត់ជម្រកមូស។ ករណីសង្ស័យត្រូវបញ្ជូនអ្នកជំងឺ ទៅកាន់មូលដ្ឋានសុខាភិបាល ដែលនៅជិតបំផុត។ ការដាក់ថ្នាំអាបែតសម្លាប់ដង្កូវទឹក ក្នុងពាងទឹកអាងទឹក។ ការបាញ់ថ្នាំសម្លាប់មូសខ្លានៅសាលារៀន មណ្ឌលសុខភាព លំនៅដ្ឋានប្រជាជន (គ្មានទឹកដក់ គ្មានដង្កូវទឹក គ្មានមូសខ្លា គ្មានជំងឺគ្រុនឈាម គ្រួសារមានសុខភាពល្អ)។
លោកបានបន្តថា ការចុះយុទ្ធនាការនេះ មន្ទីរសុខាភិបាលនឹងផ្សព្វផ្សាយដល់ប្រជាពលរដ្ឋគ្រប់មូលដ្ឋាន ឲ្យមានការប្រុងប្រយ័ត្នខ្ពស់ ចំពោះសុខភាព និងត្រូវបង្កើនចំពោះបញ្ហាជំងឺ គ្រុនឈាម ដែលកំពុងមានអាត្រាខ្ពស់ដែលកើតមកលើមនុស្សគ្រប់វ័យ ហេតុនេះយើងទាំងអស់គ្នាចូលរួមធ្វើអនាម័យថែរក្សាបរិស្ថាន ដើម្បីកម្ចាត់ជម្រកមូសខ្លា ហើយត្រូវសម្រាន្តក្នុងមុង ស្លៀកពាក់ ខោអាវជើងវែងដៃវែងជានិច្ច។
លោកកែ រដ្ឋា បានបញ្ជាក់បន្ថែមថា បើសិនមានការសង្ស័យចំពោះកូនចៅ ត្រូវបញ្ជូនមកមណ្ឌលសុខភាព ឬមន្ទីរពេទ្យជាបន្ទាន់ ដើម្បីឲ្យក្រុមគ្រូពេទ្យធ្វើការវិនិច្ឆ័យ ធ្វើការរករោគសញ្ញាជាបន្ទាន់ ដើម្បីធ្វើការព្យាបាល។
បើតាមលោក កែ រដ្ឋាបានឲ្យដឹងទៀតថា នៅឆ្នាំ២០១៩អត្រា អ្នកឆ្លងជំងឺគ្រុនឈាមមានចំនួន៣៤១នាក់ ដែលបានផ្តល់ការព្យាបាលយ៉ាងយកចិត្តទុកដាក់ពីក្រុមគ្រូពេទ្យហើយ ពុំបណ្តាលឲ្យមានអ្នកស្លាប់ដោយសារជំងឺនេះទេ ហើយយុទ្ធនាការនេះ បានធ្វើជាបន្តបន្ទាប់ ដោយបានអនុវត្តន៍ខ្លាំងក្លានៅខែកក្កដានេះតែម្តង។
សូមបញ្ជាក់ថា នៅក្នុងយុទ្ធនាការនេះ មន្ត្រីសុខាភិបាល បានបាញ់ថ្នាំបំបាត់ជម្រកមូសខ្លា នៅតាមបរិវេណសាលារៀន និងតាមលំនៅដ្ឋានរបស់ពលរដ្ឋ នៅស្រុកស្វាយទាបផងដែរ៕ ដោយ៖ វ៉ៃកូ
