ខេត្តស្វាយរៀង ៖ លោកនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិនិងជាប្រធានក្រុមការងារគណបក្សប្រជាជនកម្ពុជា ចុះជួយក្រុងបាវិតនិងស្រុកចន្ទ្រានាព្រឹកថ្ងៃទី១៦ ខែកក្កដា ឆ្នាំ២០១៩នេះ បានមានប្រសាសន៍ថា គ្មានសម័យណាដែលមានសន្តិភាពនិងការអភិវឌ្ឍដូចសម័យតេជោសែនទេ ដែលជាសម័យរុងរឿង ប្រជាពលរដ្ឋមានសិទ្ធិគ្រប់បែបយ៉ាងក្នុងការប្រកបរបរស៊ីធ្វើឲ្យជីវភាពបានធូរធារ ស្ទើរតែគ្រប់ក្រុមគ្រួសារ កំណើនសេដ្ឋកិច្ចកើនដល់៧ភាគរយ ប្រាក់ចំណូលជាមធ្យមសម្រាប់ពលរដ្ឋម្នាក់កើនដល់ជាង២ពាន់ដុល្លារអាមេរិក មានសម្តេចតេជោហ៊ុន សែនគឺការពារមិនឲ្យមានសង្គ្រាមជាដាច់ខាត។
លោកបានមានប្រសាសន៍ដូច្នេះ ក្នុងឱកាសដែលលោកបានដឹកនាំក្រុមការងារចុះជួយក្រុងបាវិត និងស្រុកចន្ទ្រា នាំយកនូវទៀនព្រះវស្សា និងទេយ្យវត្ថុ ដល់ព្រះសង្ឃដែលគង់ចាំព្រះ វស្សាវត្តចំនួន៣នៅក្នុងឃុំសំរោង ស្រុកចន្ទ្រា ខេត្តស្វាយរៀង។
លោកនាយឧត្តមសេនីយម៉ឹង សំផន បានមានប្រសាសន៍បន្តថា បុណ្យចូលព្រះវស្សា គឺចាប់ផ្តើមពីថ្ងៃ១រោច ខែអាសាឍ ដល់ថ្ងៃ១៥កើត ខែអស្សុជ មានរយ: ពេល៣ខែ ដែលពុទ្ធបរិស័ទ បងប្អូនខ្មែរយើងគោរពប្រតិបត្តិជារៀងរហូតមក ។ បច្ចុប្បន្ននេះវិស័យព្រះពុទ្ធសាសនា មានការរីកចម្រើនគួរឲ្យកត់សម្គាល់ ក្រោមការដឹកនាំរបស់សម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា បានអភិវឌ្ឍន៍ប្រទេសជាតិពីបាទដៃទទេ ដោយចាប់ផ្តើមកសាងនិងជំរុញការអភិវឌ្ឍន៍ឲ្យមានការរីកចម្រើនដូចសព្វថ្ងៃនេះ។
សូមបញ្ជាក់ផងដែរថា ទៀនព្រះវស្សា និងទេយ្យវត្ថុ ដែលប្រគេន ដល់ព្រះសង្ឃដែលគង់ចាំព្រះ វស្សានៅវត្តចំនួន៣នៅក្នុងឃុំសំរោង ស្រុកចន្ទ្រា មានវត្តស្វាយថ្លឹង វត្ត អង្គរំដេញ និងវត្តបទុមរង្សីហៅវត្តចេក រួមមានគ្រឿងឧបភោគ បរិភោគ ទៀនវស្សាមួយគូរនិងបច្ច័យរបស់លោកម៉ឹង សំផន និងលោកស្រី១លានរៀល ក្នុងមួយវត្តនិងបច្ច័យបន្ថែមពីក្រុមការងារចំនួន១៥ម៉ឹនរៀល ក្នុងវត្តព្រមទាំង ប្រគេនបច្ច័យដល់ព្រះសង្ឃក្នុងមួយអង្គ១០ម៉ឹនរៀល ហើយខណៈពេលជួបជាមួយបងប្អូនប្រជាពលរដ្ឋនៅឃុំសំរោង នាឱកាសនោះលោកម៉ឹង សំផន និងលោកស្រី ក៏បានរៀបចំពិធីពិសារនំបញ្ចុកសាមគ្គីយ៉ាងសប្បាយរីករាយផងដែរ៕ ដោយ៖ វ៉ៃកូ
