ប្រធានាធិបតីអាមេរិច ដូណាល់ ត្រាំបានព្រមានកាត់ផ្តាច់ជំនួយដល់ប្រទេសប៉ាគីស្ថាន ដោយលោកលើកឡើងថា ប្រទេសនេះបានកុហក និងបោកប្រាស់ ហើយបានផ្តល់ជំរកដល់ពួកភេវរករ។ នេះបើតាមការចេញផ្សាយរបស់សារព៌តមានសិង្ហបុរី Channel News Asia នៅថ្ងៃអង្គារ ទី ២នេះ។
ការគំរាមផ្តាចជំនួយដល់ប្រទេសប៉ាគីស្ថាននេះ គឺជាការថ្លែងលើកដំបូងនៅក្នុងបណ្តាញទំនាក់ទំនង សង្គម Twitter ក្នុងឆ្នាំថ្មី ២០១៨នេះ។
ទោះយ៉ាងណា ប្រទេសប៉ាគីស្ថានបានឆ្លើយតបយ៉ាងលឿនមកវិញថា ខ្លួនបានធ្វើកិច្ចការយ៉ាងច្រើនដើម្បីអាមេរិច ជួយអាមេរិចកំទិចពួកអាល់កៃដា តែបែរជាទទួលបាន ការប្រមាថ និងការមិនទុកចិត្តត្រឡប់មកវិញ។
ទំនាក់ទំនងរវាងអាមេរិច និងប៉ាគីស្ថានបានធ្លាក់ចុះ បន្ទាប់ពីលោក ដូណាល់ ត្រាំឡើងកាន់តំណែង ហើយកាលពីខែ សីហាឆ្នាំមុន លោក ត្រាំ បានថ្លែងថា ប្រទេសប៉ាគីស្ថានជារឿយៗផ្តល់ទីជំរកយ៉ាងមានសុវត្ថិភាពដល់ក្រុមភេវករ។
លោក ត្រាំបានថ្លែងនៅថ្ងៃចូលឆ្នាំថ្មីថា “អាមេរិចល្ងង់ណាស់ដែលផ្តល់ជំនួយដល់ប៉ាគីស្ថានច្រើនជាង ៣៣ប៊ីលានដុល្លា (៣៣ពាន់លាន) ក្នុងរយៈពេលជាង ១៥ឆ្នាំ ហើយពួកគេមិនបានផ្តល់ឲ្យយើងនូវអ្វីសោះ ក្រៅតែពីការកុហក និងបោកប្រាស់ និងគិតថាមេដឹកនាំរបស់ពួកយើងជាមនុស្សល្ងង់”។
លោកថ្លែងបន្តទៀតថា “ពួកគេបានផ្តល់ទីជំរកដ៏មានសុវត្ថិភាពដល់ក្រុមភេវករ ដែលពួកយើងតាមចាប់នៅក្នុងប្រទេសអាហ្គានីស្ថាន ដោយប្រទេសនេះជួយបានតិចតួចប៉ុណ្ណោះ”៕ សុភ័ក្ត្រ
