សហរដ្ឋអាមេរិចបានធ្វើការដាក់ទណ្ឌកម្មលើមន្ត្រីយោធាមីយ៉ានម៉ាចំនួន ៤រូប ដោយសារតែបញ្ហារំលោភសិទ្ធិមនុស្សលើជនជាតិដើមភាគតិចរ៉ូហ៊ីងយ៉ា នៅក្នុងរដ្ឋរ៉ាឃីន ភាគខាងជើងប្រទេស។
នៅក្នុងសេចក្តីប្រកាស លោក Mike Pompeo រដ្ឋមន្ត្រីការបរទេសអាមេរិចបានថ្លែងថា មន្ត្រីមីយ៉ានម៉ាទាំងនោះជាអ្នកទទួលខុសត្រូវលើការរំលោភសិទ្ធិមនុស្សដ៏ធ្ងន់ធ្ងរ រួមមាន ការសម្លាប់ក្រៅប្រព័ន្ធច្បាប់ ក្នុងកំឡុងយុទ្ធនាការហឹង្សាដែលចាប់ផ្តើមកាលពីខែសីហា ឆ្នាំ ២០១៧។
ក្រោមទណ្ឌកម្មទាំងនេះ មន្ត្រីយោធាជាន់ខ្ពស់ទាំងនោះ រួមមាន អគ្គមេបញ្ជាការកងកម្លាំងមីយ៉ានម៉ា Min Aung Hlaing អគ្គមេបញ្ជាការរង Soe Win ឧត្តមសេនីយត្រី Than Oo និងឧត្តមសេនីយត្រី Aung Aung ព្រមទាំងក្រុមគ្រួសាររបស់ពួកគេ នឹងមិនអនុញ្ញាតិឲ្យជាន់ទឹកដីអាមេរិចនោះទេ។
មន្ត្រីជាន់ខ្ពស់ក្រសួងការបរទេសអាមេរិច បានថ្លែងប្រាប់អ្នកសារពត៌មាននៅថ្ងៃអង្គារថា ពួកគេជឿជាក់ថា ការដាក់ទណ្ឌកម្មនោះគឺជាការផ្ញើសារទៅកាន់មន្ត្រីមីយ៉ានម៉ាផ្សេងទៀតថា ការប្រព្រឹត្ត និងរំលោភសិទ្ធិមនុស្សរបស់ពួកគេ នឹងរងផលពិបាកដោយសារច្បាប់អាមេរិច។
នៅក្នុងសេចក្តីប្រកាស រដ្ឋមន្ត្រីការបរទេសអាមេរិច នៅតែសម្តែងក្តីកង្វល់ថា រដ្ឋាភិបាលមីយ៉ានម៉ាមិនបានចាត់វិធានការអ្វីឡើយទៅលើអ្នកទាំងនោះដែលបានរំលោភសិទ្ធិមនុស្ស ហើយនៅតែបន្តមានសេចក្តីរាយការណ៍ទៀតថា មន្ត្រីយោធាមីយ៉ានម៉ាបន្តរំលោភសិទ្ធិមនុស្ស ទូទាំងប្រទេស។
សូមបញ្ជាក់ផងដែរថា អង្គការសហប្រជាជាតិក៏បានស្នើឲ្យមានការស៊ើបអង្កេតលើមេដឹកនាំយោធាទាំងនោះ ដើម្បីយកមកកាត់ទោសពីបទឧក្រិដ្ឋកម្មសង្គ្រាម និងបទប្រល័យពូជសាសន៏៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN