ភ្នំពេញ ៖ សមត្ថកិច្ចចម្រុះបានចុះចាប់ខ្លួនអ្នកជំនួញដីឡូតិ៍ដ៏ល្បីម្នាក់ ជាម្ចាស់ ក្រុមហ៊ុន អចលនាទ្រព្យ Enarita លោក ឌីម សួនណាត ពីបទឆបោកនិងចេញសែកស្អុយរាប់រយលានដុល្លារ។ ជនរងគ្រោះជាច្រើននាក់ បានឱ្យដឹងថា លោក ឌីម សួនណាត ដែលជាអគ្គនាយកក្រុមហ៊ុនអចលនាទ្រព្យ Enarita បានភូតភរនិងឆរបោកជាច្រើនលើក ហើយបានចេញសែកសងស្អុយ ប៉ុន្តែគ្មានលុយ ដល់ជនរងគ្រោះជាច្រើននាក់ ដែលមានទឹកប្រាក់សរុបយ៉ាងច្រើនសន្ធឹកប្រមាណ២០០ជិត៣០០លានដុល្លារ។ ប្រភពដដែលបានបញ្ជាក់ថា ការចាប់ខ្លួននេះធ្វើឡើងបន្ទាប់ជនរងគ្រោះណាត់ហូបបាយជួបគ្នាដោះស្រាយនៅភោជនីយដ្ឋានមួយកន្លែង ហើយក៏ជូនដំណឹងដល់សមត្ថកិច្ចចម្រុះចុះមកឃាត់ខ្លួនភ្លាមៗ កាលពីថ្ងៃទី១៦ ខែកក្កដា ឆ្នាំ២០១៩។
ក្រោយឃាត់ខ្លួនរួច សមត្ថកិច្ចបញ្ចូនខ្លួនទៅព្រហ្មទណ្ឌក្រសួងមហាផ្ទៃត្រៀមឡើងតុលាការ ខណៈមានពាក្យបណ្តឹងរបស់ជនរងគ្រោះមិនតិចជាង៧នាក់ឡើយ។
សូមរំលឹកថា លោក ឌីម សួនណាត ជាអគ្គនាយកក្រុមហ៊ុនអចលនាទ្រព្យ Enatita ដែលទើបល្បីឈ្មោះក្នុងឆ្នាំនេះផ្ទុះខ្លាំងលើការរកស៊ីពុះដីឡូតិ៍ក្នុងខេត្តធំៗជាច្រើន។
តាមសំដីផ្ទាល់របស់ជនរងគ្រោះជាច្រើននាក់បានប្រាប់ថា គាត់បានវិនិយោគ ជាមួយ លោក ឌីម សួនណាត ដែលជាអគ្គនាយកក្រុមហ៊ុន ENARITA development Co.,LTD ដែលក្នុងកុងត្រានោះមានធានាសែក និងស្នាមផ្តិតមេដៃរបស់ លោកឌីម សួនណាត់ ផ្ទាល់ដែលជាហេតុធ្វើអោយគាត់ទុកចិត្តរហូតមកដល់ថ្ងៃទី១៣ ខែឧសភា ឆ្នាំ២០១៩ ក៏មានការដកប្រាក់តាមសែកមិនបាន ហើយលោកឌីម សួនណាត បានលួងលោមដល់ជនរងគ្រោះថា ធនាគារជាតិធ្វើការបង្កក់លុយគាត់ ហើយធ្វើការស៉ើបអង្កេតដោយសារចរន្តលុយច្រើនពេក ហើយបង្គាប់ជនរងគ្រោះអោយទៅដកនៅក្រុមហ៊ុនលោកផ្ទាល់វិញ។
ហើយលោកបានពន្យារពេលរហូតដល់ថ្ងៃទី៥ ខែកក្កដា ឆ្នាំ២០១៩ ហើយនៅតែមិនឃើញក៏មានពាក្យបណ្តឹងរបស់ជនរងគ្រោះចូលទៅក្រសួងមហាផ្ទៃ ប្តឹងពីបទល្មើសជាក់ស្តែងទៅលោក ឌីម សួនណាត ហើយធ្វើការស៉ើបអង្កេតជាក់ស្តែង។
របាយការណ៍ បង្ហាញថា លោកឌីម សួនណាត មិនត្រូវធនាគារណាបង្កក់លុយលោកឡើយគឺ លោកមានចេតនា បិទគណនេយ្យធនាគារខ្លួនឯង និងធ្វើការពន្យាពេលរាល់កិច្ចសន្យារបស់ជនរងគ្រោះ។
ដល់ថ្ងៃទី១២ ខែកក្កដា ឆ្នាំដដែល ដីការកោះហៅបានចេញ ។ ថ្ងៃទី១៦ ពេលរសៀល ក៏បានធ្វើការឃាត់ខ្លួន លោកឌីម សួតណាត។
ដំណឹងដ៏រសើបនេះ ខណៈម្ចាស់ហ្វេសប៊ុកឈ្មោះ Kavin ដែលត្រូវគេស្គាល់ថាជាតារាសម្ដែងមួយរូបនៅក្នុងវិស័យ សិល្បៈមុននេះ បានប្រកាសទម្លាយជាសាធារណៈនៅលើបណ្ដាញសង្គមហ្វេសប៊ុករបស់ខ្លួន ដោយធ្វើការទាមទាររកដំណោះស្រាយ និងបកអាក្រាតលើក្រុមហ៊ុនអ៊ីណារីតា (Enarita) ។
បើយោងតាមរយៈខ្លឹមសារនៃការបង្ហោះពីសំណាក់ម្ចាស់ហ្វេសប៊ុកឈ្មោះ Kavin ដែលជាតារាសម្ដែងបានសរសេរ រៀបរាប់ថា សូមជួយស៊ែរ (Share) រកមុខបុគ្គល ឌឹ ម សួនណាត ឲ្យចូលខ្លួនមកដោះស្រាយផងបងប្អូន ។
ក្រុមហ៊ុនអ៊ីណារីតា (Enarita) គឺជាក្រុមហ៊ុនដែលប្រកាសថា ខ្លួនជាក្រុមហ៊ុនអចលនទ្រព្យមួយដែលខ្ញុំមិនដែលបានឮបានស្គាល់ តែខ្ញុំស្គាល់តាមរយៈមិត្តភក្ដិរបស់ខ្ញុំដែលបានយកប្រាក់ទៅដាក់ដើម្បីបានការប្រាក់ត្រឡប់ មកវិញ ។ តែដំបូងខ្ញុំមិនជឿទេគិតថាបោក ព្រោះបានការប្រាក់ច្រើនជាងតាមបណ្ដាធនាគារផ្សេងៗ គឺសម្រាប់ក្រុមហ៊ុននិយាយថា ទទួលបាន២០ភាគរយក្នុងមួយខែ ហើយពេលនោះមិត្តភក្ដិខ្ញុំបានយកប្រាក់ដាក់ មុនខ្ញុំ ហើយគាត់ពិតជាទទួលបានការប្រាក់ពិតមែន ហើយខ្ញុំក៏សម្រេចចិត្តយកប្រាក់ខ្លួនឯងផ្ទាល់មកដាក់ ជាមួយ (Enarita) និងសង្ឃឹមថា បានការ ប្រាក់ដូចគេ ។ ប៉ុន្តែការប្រាក់ខាងក្រុមហ៊ុនថា កន្លះខែទូទាត់ឲ្យម្ដង មិនដល់កន្លះខែមិនទាន់ស្រួលបួលផង ស្រាប់តែមានភាពរកាំរកូសយកលេសនេះ យកលេសនោះ រហូតពន្យារហើយពន្យារទៀត។
ឈ្មោះ បុគ្គល ឌឹ ម សួនណាត ដែលជាម្ចាស់ក្រុមហ៊ុនផ្ទាល់ (Enarita) បែរជាមិនអើពើមិនខ្វល់ទៅវិញ បែរជាធ្វើធម្មតាមិនរវល់គេចវេះនឹងពួកខ្ញុំមិនដោះស្រាយឲ្យពួកខ្ញុំ ហើយពួកខ្ញុំកំពុងប្រឈមមុខនឹងការបាត់ប្រាក់ទាំង ប្រាក់ដើម ដែលខំរកយ៉ាងលំបាក មិនបានដេកទាំងថ្ងៃទាំងយប់ផង ដូច្នេះសូមបុគ្គលឈ្មោះ ឌឹ ម សួនណាត ចេញមុខដោះស្រាយជាបន្ទាន់ ។
ថ្វីត្បិតតែមានការបង្ហោះដោយអះអាងពីសំណាក់ម្ចាស់ Account Facebook ឈ្មោះ Kavin ដែលជាតារាសម្ដែងរូបនេះ ក៏ពិតមែន ប៉ុន្តែប្រហែលជា ១ ម៉ោង ក្រោយមកត្រូវបានគេកត់សម្គាល់ឃើញតារ ប្រុសម្នាក់ នោះបាន ធ្វើការលុបវិញផងដែរ ចំពោះសំណេរសរសេររៀបរាប់ដោយចោទប្រកាន់ក្រុមហ៊ុន Enarita ជុំវិញរឿងរ៉ាវឆបោក លុយ ។
ដោយឡែកទន្ទឹមគ្នានោះ ក៏ស្រាប់តែមានផេកហ្វេ សប៊ុកមួយទៀត ដែលមានឈ្មោះថា VOEA TV Online ក៏បានសរសេរ ដូច្នេះ ថា ប្រធានក្រុមហ៊ុន អ៊ីណារីតា ជាមេបោកប្រាស់លុយគេ ប្រហែល២០០ ទៅ ៣០០ លាន ដុល្លារ ដោយឲ្យ សែកគេពុំមានទឹកប្រាក់គ្រប់ៗគ្នា ឥឡូវនេះបានចាប់ខ្លួនកាលពីយប់មិញហើយ ( យប់ ១៦.០៧.២០១៩) សូមអ្នកគាំទ្រ មេក្រុមហ៊ុននេះអញ្ជើញទៅសួរសុខទុក្ខផង ក្រែងបានជាប់គុកទាំងអស់គ្នា ។
ទាក់ទងនឹងដំណឹងនៃការចោទប្រកាន់ដ៏រសើបខាងលើនេះ អ្នកកាសែតនៅរសៀលថ្ងៃទី ១៧ ខែកក្កដា ឆ្នាំ ២០១៩ មិនអាចទាក់ទង លោក ឌឹ ម សួនណាត និងម្ចាស់ក្រុមហ៊ុន Enarita បំភ្លឺបានទេ ៕ ដោយ៖បញ្ញាស័ក្តិ