ក្មេងប្រុសជនជាតិវេណេហ្ស៊ុយអេឡាម្នាក់ បានពិការភ្នែកទាំងសងខាង កាលពី ២សប្តាហ៍មុន ក្នុងអំឡុងពេលដែលមានការបាតុកម្មនៅទីក្រុងSan Cristobal ប្រទេសវេណេហ្ស៊ុយអេឡា បន្ទាប់ពីប៉ូលិសបានធ្វើការបាញ់គ្រាប់កាំភ្លើងជ័រ ដាក់លើក្រុមបាតុករដោយមិនមានការព្រមានជាមុន។
ក្រុមវេជ្ជបណ្ឌិតដែលព្យាយាមជួយសង្រ្គោះភ្នែករបស់ក្មេងជំទង់នោះ បាននិយាយថា គ្រាប់កាំភ្លើងចំនួន ៥២គ្រាប់បានត្រូវផ្ទៃមុខរបស់គាត់ ហើយ១៦គ្រាប់បានត្រូវភ្នែកគាត់។
ក្មេងជំទង់នោះមានឈ្មោះថា Rufo Chacon។ គាត់បាននិយាយថា គាត់ចាប់ផ្តើមភ្លេចពណ៌ហើយ។
បើតាមរបាយការណ៍ប៉ូលិសដែលបានមកពីការស៊ើបអង្កេតបាននិយាយថា ក្រុមសន្តិសុខរដ្ឋបានបង្រ្កាបលើក្រុមអ្នកតវ៉ាយ៉ាងច្រើនដោយគ្មានការព្រមានទុកជាមុន។
ក្មេងប្រុសរងគ្រោះខាងលើមិនបោះបង់ចោលក្តីសង្ឃឹមឡើយ ដោយគាត់និយាយថា ”ខ្ញុំចង់បានភ្នែកខ្ញុំត្រឡប់មកវិញ។ ខ្ញុំមានអារម្មណ៍គ្រប់បែបយ៉ាង ហើយខ្ញុំចង់យំ ប៉ុន្តែខ្ញុំមិនអាចយំទៀតទេ។ ខ្ញុំយំឆ្អែតហើយនៅមន្ទីរពេទ្យ”។
សូមបញ្ជាក់ថា ក្រោយពេលធ្វើការបង្រ្កាបលើក្រុមអ្នកតវ៉ា អាជ្ញាធរវេណេហ្ស៊ុយអេឡា បានប្រកាសថា មន្រ្តីចំនួន ២នាក់ត្រូវបានចោទប្រកាន់ពីបទប៉ុនប៉ងមនុស្សឃាត និងការប្រើប្រាស់អាវុធមិនសមរម្យ និងធ្វើសកម្មភាពឃោរឃៅ។ បច្ចុប្បន្ន ពួកគេទាំងពីរនាក់ កំពុងរង់ចាំការកាត់ក្តី៕ អត្ថបទប្រែសម្រួលដោយ៖ សុភ័ក្រ / ប្រភព៖ CNN
