ខេត្តកោះកុង៖ ប្រព័ន្ធលូ រំដោះទឹកក្នុងក្រុងខេមរភូមិន្ទកំពុងមានបញ្ហា កកស្ទះ បង្កការលិចលង់ លំនៅដ្ឋាន របស់ប្រជាពលរដ្ឋចំនួន២ភូមិ។
ជំនន់ជន់លិចនេះ លោក ឈេង សុវណ្ណដា អភិបាល នៃគណៈអភិបាលក្រុងខេមរភូមិន្ទ លោក លោកស្រី អភិបាលរងក្រុង លោកអធិការនគរបាលក្រុង លោកមេបញ្ជាការកងរាជអាវុធហត្ថក្រុង លោកចៅសង្កាត់ ចៅសង្កាត់រង ក្រុមប្រឹក្សាសង្កាត់ស្មាច់មានជ័យ និងមេភូមិ បានចុះពិនិត្យស្ថានភាពជំនន់ទឹកភ្លៀង នៅភូមិ២ ភូមិ៣ សង្កាត់ស្មាច់មានជ័យ និងបានកាយសំរាម ដែលកកស្ទះតាមមាត់លូ ប្រឡាយ ដើម្បីរំដោះទឹកភ្លៀង បង្កាមិនឲ្យលេចលង់លំនៅដ្ឋានរបស់ ប្រជាពលរដ្ឋ ទៅថ្ងៃមុខជាបន្តទៀត។
ការលិចលង់លំនៅដ្ឋាន ទីតាំងទាំង២ភូមិ នេះមិនមែនទើបតែកើតមានឡើងនោះទេ រាល់រដូវវស្សា មានភ្លៀងលក្ខណ:ទ្រង់ទ្រាយធំម្តងៗ ទាំង ២ភូមិនេះ តែងតែទទួលការលិចលង់។ នេះបើតាមការបញ្ជាក់ពីបងប្អូនប្រជាពលរដ្ឋរស់នៅក្បែរតំបន់ទំនាបមួយនេះ។
លោក ឈេង សុវណ្ណដា អភិបាលក្រុងខេមរភូមិ នៅព្រឹកថ្ងៃទី១៨ កក្កដា ឆ្នាំ២០១៩ បានឲ្យដឹងថា ទំនាប់នៃការលិចលង់ខាងលើនេះ ក្នុងទីតាំងភូមិចំនួន ២ បណ្តាលមកពីកត្តាសំខាន់ៗមួយចំនួន ដែលធ្វើឲ្យមានការប៉ះពាល់ដល់ការរស់នៅរបស់បងប្អូនប្រជាពលរដ្ឋជារៀងរាល់ឆ្នាំ។
លោកបន្តថា កត្តាដែលស្មុគស្មាញជាងគេនោះគឺ រឿងពាក់ព័ន្ធ និងប្រវត្តិសាស្ត្រ ភូមិ និងសង្កាត់ខ្លះ ស្ថិតក្នុងតំបន់ទំនាប ដែលពីដើមឡើយមកជា ប្រឡាយ ជាអូរ និងបឹង។ ហើយអ្វីដែលជាការកត់សម្គាល់ នោះគឺ ការសាងសង់លំនៅដ្ឋាន របស់ពលរដ្ឋភាគច្រើនសង់លើចំណីផ្លូវសាធារណ: របស់រដ្ឋ និងការចោលសំរាមខ្វះសណ្តាប់ធ្នាប់នៅតាមមាត់លូ រំដោះទឹក។
លោកអភិបាលបន្តថា បច្ចុប្បន្នអាជ្ញាធរក្រុង និងមន្រ្តីជំនាញកំពុងមានការស្មគស្មាញក្នុងសិក្សាដាក់ប្រព័ន្ធលូ រំដោះទឹកភ្លៀងឲ្យបានច្រើនបន្ថែមទៀត ដោយសារបញ្ហាពាក់ព័ន្ធរឿងសំណង់ រំលោភចំណីផ្លូវ របស់រដ្ឋ ក្នុងក្រុងខេមរភូមិន្ទ៕ដោយ៖ដែនសីមា