ខេត្តស្វាយរៀង៖ ស្ត្រីទីទ័លក្រម្នាក់ ក្រោយពេលសម្រាលកូនទី២ បានរយៈពេល៣ខែ ក៏កើតជំងឺងងឹតភ្នែកទាំងសងខាង អ្វីដែលគួរសង្វែកជាងនេះទៅទៀតនោះ គឺប្តីរបស់គាត់បានចុះចោលផ្ទះ ទុកឲ្យរូបគាត់រស់នៅជាកូនប្រទាំង២នាក់ ក្នុងខ្ទមបាក់បែក ជញ្ជាំងប្រក់មេឃ រងទុក្ខវេទនា។
លោកស្រី ពេជ្រ ស្រីមុំ ជំទប់ទី១ ឃុំធ្មា បានឱ្យដឹងថា ស្ត្រីខាងលើមានឈ្មោះ ចិន ហឿន អាយុ ២៦ឆ្នាំ រស់នៅភូមិព្រៃចំការ ឃុំធ្មា ស្រុករំដួល ខេត្តស្វាយរៀង។ ហើយគាត់បាននៅជាមួយប្តីជាច្រើនឆ្នាំមកហើយ និងបានចំណងដៃកូនប្រុស២នាក់ ដែលកូនទី១ អាយុ៤ឆ្នាំ និងកូនទី២ មានអាយុ៣ឆ្នាំ។
អ្នកស្រី ចិន ហឿន បានឲ្យ ដឹងថា ក្រោយពីរូបគាត់បានសម្រាលកូនទី២ ក្នុងអំឡុងឆ្នាំ២០១៦ បានតែ៣ខែ ស្រាប់តែភ្នែករបស់គាត់ស្រវាំងព្រិល មើលអ្វីមិនសូវច្បាស់នោះទេ រហូតមកដល់បច្ចុប្បន្ននេះ រូបគាត់គឺងងឹតភ្នែកមើលលែងឃើញតែម្តង។ អ្នកស្រីបន្តទៀតថា កាលគាត់មិនទាន់ងងឹតភ្នែក គឺគាត់បានបម្រើការងារជាកម្មការិនីរោងចក្រ ប៉ុន្តែឥឡូវពុំអាចធ្វើអ្វីបាននោះទេ ហើយបញ្ហាដែលសំខាន់ជាងនេះទៅទៀតនោះ គឺត្រូវមើលថែកូនទាំង២នាក់ ដែលនៅតូចៗ ធ្វើឲ្យគាត់ជួបការលំបាកយ៉ាងខ្លាំង ថែមទាំងពុំអាចធ្វើការរកស៊ីអ្វីបានទៀត។ អ្នកស្រីបញ្ជាក់ថា ប្តីរបស់គាត់ គឺជាមនុស្សគ្មានទទួលខុសត្រូវ ដោយរូបគាត់បានរៀបការមួយគ្នារហូតបានកូន ២នាក់ហើយ ដល់ពេលធ្លាក់ខ្លួនឈឺដល់ថ្នាក់ពិការភ្នែក មើលអ្វីលែងឃើញ បែរជាចុះចោលផ្ទះសម្បែង ប្រពន្ធកូន ទុកប្រពន្ធកូន រស់នៅវេទនាជាមួយឪពុកម្តាយបង្កើត ដែលមានជីវភាពទីទ័លក្រ។ មានពេលខ្លះ សុខចិត្តដេកយំបង្ហូរទឹកភ្នែក ដោយសារខ្លួនពិការ រកមើលអ្វីមិនឃើញ សូម្បីតែបោកសម្លៀកបំពាក់ឲ្យកូន ក៏ធ្វើមិនបាន។
ស្ត្រីខាងលើបានអំពាវនាវដល់សប្បុរសជនជិតឆ្ងាយ មេត្តាជួយឧបត្ថម្ភដល់ក្រុមគ្រួសាររបស់គាត់ផង ដែលកំពុងតែជួបនូវទុក្ខវេទនា រស់នៅដោយសារឪពុកម្តាយបង្កើត ផ្តល់បាយទឹកឲ្យហូប ហើយកន្លងមក បើទោះបីជាធ្លាប់មានអាជ្ញាធរមូលដ្ឋាន កាកបាទក្រហមស្រុក ក្រុមយុវជនគណបក្សប្រជាជនកម្ពុជាស្រុក បានជួយឧបត្ថម្ភ ក៏នៅមិនអាចបំពេញនូវតម្រូវការ ជីវភាពប្រចាំថ្ងៃរបស់គាត់បានទេ៕ ដោយ៖វ៉ៃកូ