លោក សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ចុះពិនិត្យស្ថានភាពជំងឺគ្រុនឈាមនិងជំរុញយុទ្ធនាការទប់ស្កាត់ការចម្លងជំងឺគ្រុនឈាមនៅខេត្តកំពង់ស្ពឺ ហើយលោករដ្ឋមន្ត្រី បានណែនាំជំរុញឲ្យមន្ត្រីសុខាភិបាលសហការជាមួយអាជ្ញាធរគ្រប់ថ្នាក់ខិតខំបន្តសកម្មភាពអប់រំ ផ្សព្វផ្សាយ បង្ការ ទប់ស្កាត់ជំងឺគ្រុនឈាមឲ្យបានខ្លាំងក្លាថែមទៀត ។
បើតាមមន្ទីរសុខាភិបាលខេត្តកំពង់ស្ពឺ បានឲ្យដឹងថា ព្រឹកថ្ងៃទី១៨ ខែកក្កដា ឆ្នាំ២០១៩ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញចុះពិនិត្យស្ថានភាពគ្រុនឈាមនៅមន្ទីរពេទ្យបង្អែកខេត្តកំពង់ស្ពឺ បន្ទាប់មកឯកឧត្តមបានអញ្ជើញបន្តដំណើរពិនិត្យសកម្មភាពអប់រំសុខភាពស្តីពីជម្ងឺគ្រុនឈាម សកម្មភាពដាក់អាប៊ែត និងជួបសំណេះសំណាលជាមួយបងប្អូនប្រជាពលរដ្ឋស្ថិតក្នុងភូមិត្រពាំងកក់ ឃុំក្រាំងចេក ស្រុកឧដុង្គ ខេត្តកំពង់ស្ពឺ។ ក្នុងឱកាសនោះផងដែរ លោកបានផ្តល់ជូននៅសារសំខាន់ៗស្តីពីការបង្ការការចម្លងជម្ងឺគ្រុនឈាម៖ ត្រូវឆាប់យកកូនទៅព្យាបាលនៅមណ្ឌលសុខភាពឬមន្ន្ទីរពេទ្យរដ្ឋដែលនៅជិតផ្ទះ លុបបំបាត់ជម្រកមូស និងបានណែនាំជម្រុញឲ្យមន្ត្រីសុខាភិបាលសហការជាមួយអាជ្ញាធរគ្រប់ថ្នាក់ខិតខំបន្តសកម្មភាពអប់រំ ផ្សព្វផ្សាយ បង្ការ ទប់ស្កាត់ជំងឺគ្រុនឈាមឲ្យបានខ្លាំងក្លាថែមទៀត ។ ជារួម នៅក្នុងសប្តាហ៌នេះ ស្ថានភាពជំងឺគ្រុនឈាមកំពុងមានការថយចុះនៅទូទាំងខេត្ត។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានថ្លែងក្នុងឱកាសបើកកិច្ចប្រជុំជាមួយដៃគូពាក់ព័ន្ធស្តីពីវិធានការប្រយុទ្ធនឹងជំងឺគ្រុនឈាមឆ្នាំ២០១៩ នៅព្រឹកថ្ងៃទី១៨ ខែកក្កដា ឆ្នាំ២០១៩ នេះ ថា៖ ការពារកុំឲ្យមូសខ្លាខាំ និងការលុបបំបាត់ជម្រកមូស គឺជាវិធានការដ៏សំខាន់បំផុតសម្រាប់ប្រយុទ្ធនឹងជំងឺគ្រុនឈាមក្នុងឆ្នាំ២០១៩ ដូច្នេះ សូមអំពាវនាវដល់ប្រជាពលរដ្ឋ អាជ្ញាធរគ្រប់លំដាប់ថ្នាក់ ស្ថាប័នពាក់ព័ន្ធ និងដៃគូសុខាភិបាលទាំងអស់ សហការរួមគ្នាធ្វើសកម្មភាពចាំបាច់នេះ ដើម្បីទប់ស្កាត់ការចម្លងជំងឺគ្រុនឈាមនៅក្នុងមូលដ្ឋានរបស់ខ្លួន។
លោកស្រីវេជ្ជបណ្ឌិត ឱ វណ្ណឌីន បានថ្លែងបញ្ជាក់ផងដែរថា ក្រសួងសុខាភិបាល បានយកចិត្តទុកដាក់ខ្ពស់ ជាពិសេស ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានចង្អុលបង្ហាញដល់គ្រប់ខេត្ត-រាជធានី អនុវត្តកិច្ចអន្តរាគមន៍ជាបន្ទាន់ ចាប់តាំងពីដើមខែឧសភា ហើយកំពុងបន្ដការងារជាបន្តបន្ទាប់រហូតមកដល់ពេលនេះយ៉ាងហ្មត់ចត់ ព្រមទាំងយកចិត្តទុកដាក់ពីកម្មវិធីជាតិប្រយុទ្ធប្រឆាំងនឹងជំងឺគ្រុនឈាម អនុគណៈកម្មការគ្លីនិក មន្ទីរសុខាភិបាលខេត្ត-រាជធានី រួមទាំងកិច្ចគាំទ្រពី គណៈអភិបាលខេត្ត និងដៃគូរពាក់ព័ន្ធ ជាពិសេសអាជ្ញាធរមូលដ្ឋាន ក្នុងការដាក់ថ្នាំសម្លាប់ដង្កូវទឹកនិងថ្នាំការពារកុំឲ្យកើតដង្កូវទឹកក្នុងអាង ឫពាងទឹក នៅក្នុងតំបន់ដែលប្រឈមខ្ពស់នឹងជំងឺគ្រុនឈាម។
លោកស្រីរដ្ឋលេខាធិការក្រសួងសុខាភិបាលបានបញ្ជាក់ថា ក្នុងរយៈពេលពីខែមករាដល់ខែកក្កដា (គិតត្រឹម២៤សប្តាហ៍) ក្នុងឆ្នាំ២០១៩ មានអ្នកជំងឺគ្រុនឈាមសរុបចំនួន ២១.១៣០ ករណី និងស្លាប់ចំនួន២៥នាក់ (អត្រាស្លាប់គឺ ០,១២%)។ តួលេខនេះ មានការកើនឡើងប្រហែលជា៥ដងច្រើនជាងឆ្នាំ២០១៨ ដែលមានអ្នកជំងឺគ្រុនឈាមតែ ៣.៩២៦ ករណី និងស្លាប់០៧នាក់។ ស្ថានភាពជំងឺនេះ បានកើនឡើងក្នុងរាជធានី-ខេត្ត នៅឆ្នាំ២០១៩នេះ បើប្រៀបធៀបទៅនឹងឆ្នាំ២០១៨ ប៉ុន្តែមិនមែនបានន័យថា ជំងឺគ្រុនឈាមមាននៅគ្រប់កន្លែងទូទាំងប្រទេសនោះទេ គឺកើតមានរាយប៉ាយដុំៗតាមមួយភូមិ ឬពីរភូមិនៃភូមិសាស្ត្រឃុំ/សង្កាត់នីមួយៗ។ ជំងឺគ្រុនឈាមកើតលើគ្រប់ភេទ ស្រី ប្រុស ទាំងក្មេងទាំងចាស់ ហើយក្នុងក្រុមអាយុពី៥-១៤ឆ្នាំ ឈឺច្រើនជាងគេ និងអត្រាស្លាប់ខ្ពស់លើក្រុមអាយុក្មេងតិចជាង ៥ឆ្នាំ (មាន៩នាក់ស្លាប់)។
លោកជំទាវវេជ្ជបណ្ឌិត ឱ វណ្ណឌីន បានថ្លែងបន្ដថា ដើម្បីទប់ស្កាត់ និងគ្រប់គ្រងហានិភ័យបណ្តាលមកពីការរាតត្បាតជំងឺគ្រុនឈាមជាបន្តទៀតឲ្យបានទាន់ពេលវេលា ក្រសួងស្ថាប័នផ្សេងៗចូលរួមក្នុងកិច្ចប្រជុំនេះ បន្តចូលរួមសហការឲ្យបានកាន់តែទូលំទូលាយជាមួយក្រសួងសុខាភិបាល តាមរយៈមន្ទីរសុខាភិ បាលទូទាំង២៥ រាជធានី-ខេត្ត បង្កើនសកម្មភាពផ្សព្វផ្សាយ អប់រំសុខភាព តាមរយៈប្រព័ន្ឋផ្សព្វផ្សាយ (ទូរទស្សន៍-វិទ្យុ-សារព័ត៌មាន-អប់រំតាមសហគមន៍ សាលារៀន ទីវត្តអារ៉ាម និងអប់រំចល័ត)ស្តីពីវិធានការបង្ការជំងឺគ្រុនឈាម ពិសេស អាជ្ញាធរដែនដី និងក្រសួងពាក់ព័ន្ធ សូមជួយចាត់វិធានការសំអាតការដ្ឋានសំណង់ និងសំបកកង់ឡានឬម៉ូតូ ដែលទុកចោលពាសវាលពាសកាល ដើម្បីកុំឲ្យមានកន្លែងទឹកដក់ដែលជាជម្រកមូសខ្លា ។
ជាថ្មីម្តងទៀត លោកជំទាវវេជ្ជបណ្ឌិត ឱ វណ្ណឌីន បានជំរុញដល់មន្ទីរសុខាភិបាលរាជធានី-ខេត្តទាំងអស់ពិនិត្យឡើងវិញ នូវអត្រាគ្របដណ្តប់ដាក់អាបែត (Abate) ការពារកុំឲ្យកើតដង្កូវទឹក និង ប៊ីធីអាយ (BTI) សម្រាប់សម្លាប់ដង្កូវទឹក ហើយត្រូវធានាថាអត្រាគ្របដណ្តប់អាបែត ឬ ប៊ីធីអាយ នៅតាមភូមិនីមួយៗ បានលើសពី៩៥% បើភូមិណាមិនសំរេចបាន ៩៥% ត្រូវដាក់ឡើងវិញទាំងស្រុង។ លោកស្រីបានផ្តាំផ្ញើ អំពាវនាវដល់បងប្អូនប្រជាពលរដ្ឋទាំងអស់ សូមឲ្យចូលរួមយ៉ាងសកម្ម អនុវត្តវិធានការការពារជំងឺគ្រុនឈាម ដោយអនុវត្តន៍វិធានការទប់ស្កាត់ការចម្លងជំងឺគ្រុនឈាម តាមសេចក្តីជូនព័ត៌មានរបស់ក្រសួងសុខាភិបាល ស្ដីពីស្ថានភាពជំងឺគ្រុនឈាម ដែលបានចេញផ្សាយជាសាធារណៈកន្លងមកថ្មីៗនេះ៕ ដោយ៖កូឡាប