ភ្នំពេញ៖ លោកឃួង ស្រេង អំពាវនាវឲ្យប្រជាពលរដ្ឋក្នុងរាជធានីភ្នំពេញ ស្រឡាញ់ដើមឈើដូចការស្រឡាញ់កូនចៅនៅក្នុងក្រុមគ្រួសារ ដើម្បីជួយលើកកម្ពស់គុណភាព បរិស្ថាន និងសោភ័ណភាពនៅ ក្នុងទីក្រុង។
លោកឃួង ស្រេង អភិបាលរាជធានីភ្នំពេញ បានណែនាំឲ្យប្រជាពលរដ្ឋ ព្រះសង្ឃ លោកគ្រូអ្នកគ្រូ មន្រ្តីរាជការ និងស្ថាប័នពាក់ព័ន្ធទំាងអស់ ត្រូវរួមគ្នាថែរក្សាការពារដើមឈើនៅតាម ភូមិដ្ឋាន សាលារៀន វត្តអារ៉ាម តាមសួនច្បារ និងផ្លូវសាធារណៈឲ្យបានល្អ ព្រោះដើមឈើមាន គុណប្រយោជន៍យ៉ាងខ្លំាងសម្រាប់បរិស្ថាន និងមនុស្សជាតិ។
លោកបានថ្លែងក្នុងឱកាសអញ្ជើញចូលរួមក្នុងពិធីអបអរសាទរបុណ្យរុក្ខទិវា៩កក្កដា ដែលប្រារព្ធធ្វើឡើងនៅព្រឹកថ្ងៃទី១៩ ខែកក្កដានេះ នៅក្នុងបរិវេណវត្តនិគ្រោធវ័ន “ហៅវត្តគល់ទទឹង” ស្ថិតក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ហើយបានចាត់ទុកថា ដើមឈើគឺជាធនធានធម្មជាតិ ដ៏សំខាន់ដែលបានបង្កើតគម្របបៃតង ហើយជួយកម្ចាត់ជាតិពុលនានា នៅ ក្នុងរាជធានីភ្នំពេញ។ លោកអភិបាលរាជធានីភ្នំពេញ ក៏បានណែនាំឲ្យមេព្រៃក្នុងភូមិសាស្រ្តរាជធានីភ្នំពេញ អង្គភាពពាក់ព័ន្ធ និងអាជ្ញាធរដែនដីត្រូវរួមគ្នាថែរក្សាដើមឈើ ដែលបានដាំហើយនៅក្នុងរាជធានីភ្នំពេញឲ្យបានល្អ ហើយត្រូវធ្វើរបាយការណ៍ ពីស្ថានភាពដើមឈើទំាងនោះ ឲ្យបានជាប់ជាប្រចំា រៀងរាល់៦ខែម្តង ដើម្បីថែរក្សាការពារដើមឈើទំាងនោះ ឲ្យបានរីកលូតលាស់ល្អ សម្រាប់កូនចៅជំនាន់ក្រោយទៀត។
លោកអភិបាល បានបញ្ជាក់ថា ដើមឈើនេះវាជាអ្នកទ្រទ្រង់ឲ្យដល់កូនចៅជំនាន់ក្រោយរបស់យើង បានរស់នៅប្រកបដោយចីរភាព នេះជាសារសំខាន់នៃដើមឈើ។ ដូច្នេះប្រជាពលរដ្ឋទំាងអស់ ដែលធ្លាប់មានកូនចៅ ហើយស្រឡាញ់កូនចៅរបស់ខ្លួន សូមឲ្យស្រឡាញ់ដើមឈើប្រៀបបាននឹងកូនរបស់ខ្លួន។ ត្រូវថែទំាវាឲ្យបានល្អ ដាក់ជីពូនគល់និងស្រោចទឹកជាដើម ប្រៀបបានដូចទៅនឹងការបីបាច់ថែរក្សាកូនចៅ ក្នុងក្រុមគ្រួសារ។ យើងដឹងហើយថា បើកាលណាគ្មានដើមឈើទេ កូនចៅយើងជំនាន់ក្រោយក៏មិន អាចរស់នៅបានដែរ។
សូមបញ្ជាក់ថា រដ្ឋបាលរាជធានីភ្នំពេញបានរៀបចំព្រឹត្តិការណ៍អបអរសាទរបុណ្យរុក្ខទិវាជារៀងរាល់ឆ្នាំ ដូចបណ្តាខេត្តដ៏ទៃដែរ ដើម្បីលើកកម្ពស់ការយល់ដឹងដល់ប្រជាពលរដ្ឋ ឲ្យរួមគ្នាការពារធនធានព្រៃឈើ តាមប្រពៃណីជាតិ ដ៏គំរូរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
លោកចាន់ រិទ្ធី ប្រធានមន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញ បានឲ្យដឹងថាប្រវត្តិនៃការប្រារព្ធពិធី “រុក្ខទិវា និងការប្រារព្ធពិធីដាំដើមឈើអបអរសាទរពិធី “រុក្ខទិវា” ០៩ កក្កដា គឺរុក្ខទិវា គឺជាទិវាពលកម្មដាំដើមឈើជាប្រពៃណីជាតិ ដែលកិច្ចការនេះត្រូវបានជំរុញយ៉ាងសកម្មដោយមានការចូលរួមយ៉ាងផុលផុស ពីសំណាក់ប្រជាពលរដ្ឋគ្រប់ស្រទាប់ចាប់តាំងពីមុនទសវត្សរ៍៥០មកម្ល៉េះ
ហើយបានក្លាយទៅជាចលនាសង្គមគំរូ ក្រោមព្រះរាជកិច្ចដឹកនាំដ៏ខ្ពង់ខ្ពស់បំផុតរបស់ព្រះមហាវរក្សត្រព្រះបរមរតនកោដ្ឋ ព្រះបាទ នរោត្តម សីហនុ ជាទីគោរពសក្ការៈនៃយើង ដែលនៅទីបំផុតត្រូវបានទទួលស្គាល់ជាពិធីប្រពៃណីជាតិមួយហៅថា “បុណ្យរុក្ខទិវា តាមព្រះរាជក្រឹត្យលេខ៧៣៨ នសចុះថ្ងៃទី០៨ ខែសីហា ឆ្នាំ១៩៥២ និងត្រូវបានរៀបចំប្រារព្ធធ្វើឡើងជារៀងរាល់ឆ្នាំ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះមហាក្សត្រតរៀងមក។ ប៉ុន្តែដោយសារប្រទេសជាតិបានធ្លាក់ចូលក្នុងភ្លើងសង្គ្រាម នៅចន្លោះឆ្នាំ១៩៧៥-១៩៧៩ ពិធីបុណ្យប្រពៃណីជាតិដ៏ថ្លៃថ្លានេះ ត្រូវបានអាក់ខានមួយរយៈ រហូតដល់ឆ្នាំ១៩៨៩ ទើបពិធីបុណ្យរុក្ខទិវាត្រូវបានចាប់ផ្តើមរៀបចំប្រារព្ធឡើងវិញ ហើយត្រូវបានកំណត់ដោយសេចក្តីសម្រេចរបស់ក្រុមប្រឹក្សារដ្ឋមន្ត្រីលេខ០៨ សសរចុះថ្ងៃទី១២ ខែមករា ឆ្នាំ១៩៩០ និងបន្ទាប់មកត្រូវបានបញ្ញត្តិក្នុងច្បាប់ស្តីពីព្រៃឈើ ដែលប្រកាសឲ្យប្រើតាមព្រះរាជក្រមលេខ នស/រកម/០៨០២/០១៦ ចុះថ្ងៃទី៣១ ខែសីហា ឆ្នាំ២០០២ ដោយបានចែងថា ទិវាពលកម្មដាំដើមឈើជាប្រពៃណីជាតិ ហៅថា “រុក្ខទិវា” ត្រូវប្រារព្ធធ្វើឡើងនៅថ្ងៃទី០៩ ខែកក្កដា ជារៀងរាល់ឆ្នាំក្រោមព្រះរាជាធិបតីភាពដ៏ខ្ពង់ខ្ពស់របស់ព្រះមហាក្សត្រ នៃព្រះរាជាណាចក្រកម្ពុជា ឬព្រះរាជតំណាង។ សម្រាប់ឆ្នាំ២០១៩នេះ ពិធី” រុក្ខទិវាត្រូវបានប្រារព្ធធ្វើឡើងនៅថ្ងៃទី០៩ ខែកក្កដា នៅក្នុងស្ថានីយផ្សព្វផ្សាយ និងស្តារព្រៃឈើក្បាលដំរី ស្ថិតក្នុងភូមិស្រែត្រែង ឃុំក្បាលដំរី ស្រុកសំបូរ ខេត្តក្រចេះ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណា ព្រះបាទ សម្តេចព្រះ បរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។
យ៉ាងណាមិញ នៅរាជធានីភ្នំពេញ ថ្វីត្បិតតែពុំមានផ្ទៃដីទំនេរ ដែលមានទំហំធំសម្រាប់ដាំឈើជាចម្ការក៏ពិតមែន ក៏ការរៀបចំពិធីនេះ តែងត្រូវបានប្រារព្ធធ្វើឡើងជារៀងរាល់ឆ្នាំ ដូចបណ្តាខេត្តនានាទូទាំងប្រទេសដែរ។
ដើម្បីអបអរសាទរទិវាដាំដើមឈើជាប្រពៃណីជាតិឆ្នាំ២០១៩នេះ មានការដាំដើមឈើចម្រុះប្រភេទ(គ្រញូង នាងនួន ធ្នង់ គគីរ ឈើទាល រាំងភ្នំ គីនីន ត្របែកព្រៃ ក្ងោក និងខ្នុរ) សរុបចំនួន ១៣៤៤ដើម នៅតាមវត្តអារាម សាលារៀន និងដងផ្លូវ ក្នុងភូមិសាស្ត្ររាជធានីភ្នំពេញ រួមមាន៖ វត្តនន្ទមុន្នី ស្ថិតក្នុងភូមិដំណាក់១ សង្កាត់ស្ទឹងមានជ័យ២ ខណ្ឌមានជ័យ ចំនួន១៣៦ដើម។វត្តដំបូកខ្ពស់ ស្ថិតក្នុងភូមិក្បាលទំនប់ សង្កាត់បឹងទំពុន ខណ្ឌមានជ័យ ចំនួន៣៤៣ដើមវិទ្យាល័យព្រែកលៀប ស្ថិតក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វា ចំនួន៨០ដើម។ សាលាបឋមសិក្សាភ្នំពេញថ្មី ស្ថិតក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខចំនួន២១០ដើម ដងផ្លូវហាណូយចំនួន១៥០ដើម និងវត្តនិគ្រោធវ័ន “ហៅវត្តគល់ទទឹង” ជាទីតាំងប្រារព្ធពិធីចំនួន៤២៥ដើម។
ជាមួយគ្នានេះ នៅមានកូនឈើចម្រុះប្រភេទ (គ្រញូង នាងនួន បេង ធ្នង់ គគីរ ឈើទាល គីនីន រាំងភ្នំរាំងទឹក ស្វាយ និងខ្នុរ) សរុបចំនួន ៤២០០ដើម ទៀត ត្រូវបានត្រៀមទុកក្នុងពិធីនេះ សម្រាប់ប្រគេនព្រះសង្ឃនិងចែកជូនបងប្អូនប្រជាពលរដ្ឋ មកពីរដ្ឋបាលខណ្ឌទាំង១៤ ដើម្បីយកទៅដាំនៅតាមទីវត្តអារាម ដងផ្លូវទីសាធារណៈ និងលំនៅដ្ឋាន នៅតាមមូលដ្ឋានរៀងៗខ្លួន៕ ដោយ៖កូឡាប
