អតីតនិស្សិតបញ្ចប់ការសិក្សានៅមហាវិទ្យាល័យអាមេរិច ត្រូវបានតុលាការកាត់ទោសនៅថ្ងៃព្រហស្បតិ៍ម្សិលមិញនេះ ឲ្យជាប់គុកអស់មួយជីវិតពីបទចាប់ជំរិត និងសម្លាប់យ៉ាងឃោរឃៅ លើបញ្ញវន្តចិនម្នាក់ដែលធ្វើដំណើរមកស្រាវជ្រាវនៅអាមេរិច។
ដំបូងឡើយ ជនជាប់ចោទឈ្មោះ Brendt Christensen វ័យ ៣០ឆ្នាំ ប្រឈមនឹងទោសប្រហារជីវិត ប៉ុន្តែមេធាវីរបស់លោក បានទទួលស្គាល់ពីទោសកំហុសរបស់កូនក្តីនៅក្នុងសវនាការ ដើម្បីឲ្យគាត់គេចផុតពីទោសប្រហារជីវិត។
ចៅក្រមអាមេរិច James Shadid បានហៅសកម្មភាពរបស់ជនជាប់ចោទថា ជាសកម្មភាពហឹង្សាខ្លាំងដែលពិបាកពន្យល់ និងបានចោទប្រកាន់គាត់ពីបទធ្វើអ្វីៗដើម្បីបំពេញគំនិតខ្លួនឯង អាត្មានិយមដោយគ្មានការគោរពនរណាម្នាក់ឡើយក្រៅពីខ្លួនឯង។
សូមរំលឹកថា ឧក្រិដ្ឋជនខាងលើបានចាប់ជំរិតអ្នកស្រាវជ្រាវជនជាតិចិនម្នាក់ឈ្មោះ Zhang Yingying ដែលបានធ្វើដំណើរមកអាមេរិចក្នុងខែ មិថុនា ឆ្នាំ ២០១៧។ ការចាប់ជំរិតនោះកើតឡើងនៅចំណតរថយន្ត ក្បែរទីធ្លាសកលវិទ្យាល័យ Illinois ស្ថិតនៅទីក្រុង Champaign ដែលជាទីក្រុងតូចមួយហ៊ុមព័ទ្ធទៅដោយចំការ។
ព្រះរាជអាជ្ញាបញ្ជាក់ថា ឧក្រិដ្ឋជនបានបញ្ចុះបញ្ចូលជនរងគ្រោះឲ្យចូលក្នុងឡានគាត់ និងបានច្របាច់ក វាយនឹងដោយដំបង ចាក់នាង និងបានកាត់សាកសពនាងដើម្បីយកទៅប្លុងចោល។
សាកសពរបស់ជនរងគ្រោះមិនដែលបានត្រូវគេរកឃើញឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia
