ខេត្តព្រះសីហនុ៖ នៅព្រឹកថ្ងៃទី១៩ ខែកក្កដា ឆ្នាំ២០១៩នេះ នាសាលប្រជុំសាលាខេត្តព្រះសីហនុ បានរៀបចំពិធីប្រកាស និងផ្ទេរភារកិច្ចប្រធានមន្ទីរសាធារណការ និងដឹកជញ្ជូនខេត្ត ក្រោមអធិបតីភាព លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន។
ពិធីនេះ ក៏មានវត្តមានលោក ជាម ហ៊ីម ប្រធានក្រុមប្រឹក្សាខេត្តព្រះសីហនុ និងលោក គួច ចំរើន អភិបាលខេត្តព្រះសីហនុ ក៏បានចូលរួមជាអធិបតីផងដែរ។
តាមសេចក្តីប្រកាស របស់ក្រសួងសាធារណការ និងដឹកជញ្ជូន បានសម្រេចផ្លាស់ប្តូរតួនាទី លោក ណុប ហេង ចេញពីប្រធានមន្ទីរសាធារណការ និងដឹកជញ្ជូនខេត្តព្រះសីហនុ ទៅកាន់ទីស្តីការក្រសួងសាធារណការ និងដឹកជញ្ជូនវិញ ដោយរង់ចាំទទួលភារកិច្ចថ្មី។ ការផ្លាស់ផ្តូរនេះ បានដាក់ជំនួសដោយ លោក បូរី វង្សសានិត្យ អតីតអនុប្រធាននាយកដ្ឋានហេដ្ឋារចនាសម្ព័ន្ធសាធារណៈ នៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន ត្រូវតែងតាំងជាប្រធានមន្ទីរសាធារណការ និងដឹកជញ្ជូនខេត្តព្រះសីហនុវិញ៕ ដោយ៖ ដែន សីមា
