ខេត្តព្រះសីហនុ៖ ប្រជាពលរដ្ឋរស់នៅទីប្រជុំជន ផ្សារវាលរេញ ស្រុកព្រៃនប់ បានសំណូមពរដល់អាជ្ញាធរស្ថាប័នពាក់ព័ន្ធ ជាពិសេសថ្នាក់ដឹកនាំរដ្ឋបាលស្រុកព្រៃនប់ ឲ្យជួយពិនិត្យ និងមានវិធានការស្តារប្រព័ន្ធលូបង្ហូទឹក និងប្រឡាយ នៅជិតប្រជុំផ្សារវាលរេញ និងចាប់ពីជិតស្នាក់ការគណបក្យស្រុក មកទល់មុខសាលាស្រុកជិតសួនច្បាររង្វង់មូល ឲ្យបានឆាប់ផង។
ប្រជាពលរដ្ឋបន្តថា ក្នុងរយៈពេលនេះជំនន់ទឹកភ្លៀងបានដក់ជោកជាំជាប្រចាំថ្ងៃ នៅមូលដ្ឋានខាងលើនេះ បន្ទាប់ពីមានភ្លៀងធ្លាក់ គឺមិនថាភ្លៀងតិច ឬ ច្រើននោះទេ តែងតែមានទឹកដក់នៅតាមផ្លូវជាប់ចិញ្ចើមផ្លូវជាតិលេខ៤ និងលិចតាមមុខផ្ទះ របស់ប្រជាពលរដ្ឋ ដែលធ្វើឲ្យបះពាល់ដល់មុខរបរប្រចាំថ្ងៃ និងបាត់បង់សោភ័ណភាពសណ្តាប់ធ្នាប់ នុងរបៀបរៀបរយសាធារណៈ។
ផ្តើមពីបញ្ហានេះ ប្រជាពលរដ្ឋរំពឹងថា ថ្នាក់ដឹកនាំស្ថាប័នពាក់ព័ន្ធ ជាពិសេសអាជ្ញាធររដ្ឋបាលស្រុកព្រៃនប់ និងធភិបាលខេត្តព្រះសីហនុ នឹងចុះពិនិត្យមានវិធានការស្តារប្រព័ន្ធលូបង្ហូរទឹក និងប្រឡាយ នៅជិតទីប្រជុំជនផ្សារវាលរេញ ដែលបានស្ទះបណ្តាលឲ្យទឹកភ្លៀងជន់លិចឲ្យបានឆាប់ដោយអនុគ្រោះផង៕ ដោយ៖ ដែន សីមា
