ព្រះសីហនុ៖ លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា៖ វិស័យសាធារណការ និងដឹកជញ្ជូន ជាវិស័យមួយ ដែលដើរតួយ៉ាងសំខាន់ ក្នុងការទ្រទ្រង់ និងអភិវឌ្ឍសេដ្ឋកិច្ចឱ្យមានភាពរឹងមាំ និងនិរន្តរភាព។
នៅថ្ងៃទី១៩ ខែកក្កដា ឆ្នាំ២០១៩ នៅសាលាខេត្តព្រះសីហនុ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ក្នុងពិធីប្រកាសផ្ទេរ សម្រួលភារកិច្ច និងចូលកាន់មុខតំណែងប្រធានមន្ទីរថ្មី នៃមន្ទីរសាធារណការ និងដឹកជញ្ជូន ខេត្តព្រះសីហនុ លោកបានថ្លែងថា ការផ្លាស់ប្ដូរ ឬផ្ទេរភារកិច្ចនេះធ្វើឡើងដើម្បីបណ្ដុះពហុជំនាញដល់មន្ត្រី ក៏ដូចជាការបង្កើតវប្បធម៌ចែករំលែកបទពិសោធន៍រវាងមន្ត្រី និងមន្ត្រី ពីអង្គភាពផ្សេងៗ សំដៅពង្រីកចំណេះដឹងចំណេះធ្វើ និងគំនិតផ្ដួចផ្ដើមឱ្យសម្បូរបែប ក្នុងបុព្វហេតុបម្រើជាតិមាតុភូមិឱ្យកាន់តែរីកចម្រើនថែមទៀត។
លោកទេសរដ្ឋមន្ត្រីបានសង្កត់ធ្ងន់ថា៖ បើគ្មានហេដ្ឋារចនាសម្ព័ន្ធរឹងមាំ គ្រប់ច្រកល្ហក ប្រទាក់ក្រឡាគ្នាដូចសរសៃរឈាម តភ្ជាប់ពីតំបន់មួយទៅតំបន់មួយទៀតនោះទេ ក៏គ្មានការអភិវឌ្ឍដែរ ជាក់ស្ដែងខេត្តព្រះសីហនុនេះមានទាំងផ្លូវទឹក ផ្លូវគោក ផ្លូវដែក និងផ្លូវអាកាស ដែលធ្វើឱ្យខេត្តនេះ ជាខេត្តប្រកបដោយសក្ដានុពលមួយ អាចពង្រីកវិសាលភាពរបស់ខ្លួន មិនត្រឹមតែជាខេត្តទេសចរណ៍ប៉ុណ្ណោះទេ តែថែមទាំងជាខេត្តបោះជំហានទៅជាខេត្តឧស្សាហកម្ម ពាណិជ្ជកម្មដ៏មានសន្ទុះរីកចម្រើន។
ជាទីបញ្ចប់ លោកទេសរដ្ឋមន្ត្រីបានក្រើនរំលឹកថា៖ ធ្វើជាមន្ត្រី មិនត្រូវមានជំងឺតួឯកឡើយ ពោលគឺត្រូវសហការគ្នាយ៉ាងស្អិតល្មួតជាមួយមន្ទីរ ស្ថាប័នពាក់ព័ន្ធនៅជុំវិញខេត្ត ដើម្បីអនុវត្តន៍ផែនការ គោលនយោបាយរបស់រាជរដ្ឋាភិបាល ដែលបានដាក់ជូន៕ ដោយ៖ស្រីនាថ
