រាជធានីភ្នំពេញ ៖ អាជ្ញាធរជាតិធំៗពីរ អាជ្ញាធរមូលដ្ឋានខណ្ឌច្បារអំពៅ អង្គការខាណា និងដៃគូរួមគ្នាប្រយុទ្ធប្រឆាំងគ្រឿងគ្រឿងញៀន-អេដស៍ ខណៈឆ្នាំ២០១៧ មានអត្រាផ្ទុកមេរោគអេដស៍ក្នុងចំណោមអ្នកប្រេីគ្រឿងញៀនដោយអ្នកចាក់មានប្រមាណ១៥ភាគរយ និងអ្នកប្រេីប្រាស់គ្រឿងញៀនដោយលេប ជក់ ហឺត មានអត្រាផ្ទុកមេរោគអេដស៍៥,៧ភាគរយ ។
ថ្ងៃទី១៩ ខែកក្កដា ឆ្នាំ២០១៩ ក្រោមកិច្ចសហការរវាងអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន អគ្គលេខាធិការដ្ឋានអាជ្ញាធរជាតិប្រយុទ្ធនឹងជំងឺអេដស៍ អាជ្ញាធរមូលដ្ឋានខណ្ឌច្បារអំពៅ វិស័យសុខាភិបាល អង្គការខាណា និងដៃគូ បានរៀបចំកិច្ចសន្ទនារស្តីពីយុទ្ធនាការបញ្ឈប់ការរេីសអេីងជនរងគ្រោះដោយសារគ្រឿងញៀននិងផ្តល់ការគាំទ្រទៅរកសេវាសុខភាព ។
លោក ជួប សុខចំរេីន នាយកប្រតិបត្តិអង្គការខាណា បានមានប្រសាសន៍ស្វាគមន៍ និងជម្រាបជូនពីស្ថានភាពគ្រឿងញៀន និងភាពញៀននៅពិភពលោក នៅកម្ពុជា និងសារ:សំខាន់នៃវិស័យសុខភាព ដោយលោកបង្ហាញថាអ្នកប្រេីគ្រឿងញៀនដោយចាក់គឺប្រឈមនឹងការឆ្លងមេរោគអេដស៍ និងជំងឺថ្លេីមប្រភេទសេ(C)បង្ករជាបញ្ហាសុខភាពធ្ងន់ធ្ងរ ។
ក្នុងឱកាសនោះ ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានមានប្រសាសន៍ថា គ្រឿងញៀនគឺជាបញ្ហាសង្គមដ៏ស្មុគស្មាញមួយ សម្រាប់សង្គមមនុស្សជាតិ ហេីយវិវត្តន៍ស្របទៅតាមចរន្ត នៃភាពរីកចម្រើនបច្ចេកវិទ្យា វិទ្យាសាស្ត្រ សង្គម និងសេដ្ឋកិច្ច ហេីយការដោះស្រាយបញ្ហាគ្រឿងញៀនដែលមានប្រសិទ្ធភាព គឺត្រូវមានកិច្ចសហការល្អរវាងស្ថាប័នពាក់ព័ន្ធដោយមានការចូលរួម និងគាំទ្រគ្រប់មជ្ឈដ្ឋាននៃសង្គម ពិសេសមាតាបិតា អាណាព្យាបាល និងគណៈកម្មការសម្របសម្រួលការព្យាបាលអ្នកញៀនគ្រឿងញៀនដោយផ្អែកលើសហគមន៍នៅតាមឃុំ-សង្កាត់ ចូលរួមទាំងអស់គ្នាដេីម្បីសហគមន៍មានសុវត្ថិភាព ដោយគ្មានរេីសអេីង។
ក្នុងឱកាសនោះផងដែរលោកតែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍បានមានប្រសាសន៍ថា បញ្ហាគ្រឿងញៀនមិនត្រឹមតែជាបញ្ហាប្រឈមរបស់សង្គមប៉ុណ្ណោះទេ ថែមទាំងជាកត្តាមួយដែលធ្វេីឲ្យការងារប្រយុទ្ធនឹងជំងឺអេដស៍មិនទទួលជោគជ័យថែមទៀតផង ។ តាមរយៈរបាយការណ៍របស់មជ្ឈមណ្ឌលប្រយុទ្ធនឹងជំងឺអេដស៍ សេីរស្បែក និងកាមរោគនៅឆ្នាំ២០១៧ មានអត្រាផ្ទុកមេរោគអេដស៍ក្នុងចំណោមអ្នកប្រេីគ្រឿងញៀនដោយអ្នកចាក់មានប្រមាណ១៥ភាគរយ និងអ្នកប្រេីប្រាស់គ្រឿងញៀនដោយលេប ជក់ ហឺត មានអត្រាផ្ទុកមេរោគអេដស៍៥,៧ភាគរយ ហេីយរួមភេទដោយស្រោមអនាម័យមានតែ៤០ភាគរយប៉ុណ្ណោះ ហេីយទាំងនេះគឺជាការព្រួយបារម្ភដែលចាំបាច់ត្រូវរួមគ្នាប្រយុទ្ធប្រឆាំងគ្រឿងញៀនផង និងទប់ស្កាត់ការរីករាលមេរោគអដស៍បន្តទៀតផង៕ ដោយ៖កូឡាប